Read Hmong Daw Yauhas 20 Bible Online

Yauhas 20 - Hmong Daw bible

Yauhas 20

¹Hnubkaj thaum sawv ntxov uas kaj ntug txoog, Malis Madalas mus txog ntawm lub ntxa thiab nws pom daim txiag zeb uas npog lub rooj ntxas twb dov rau ib cag lawm.

²Malis txawm khiav rov qab los cuag Ximoos Petus thiab tus thwjtim uas Yexus hlub, thiab nws hais rau nkawd hais tias, “Lawv twb muab tus Tswv nqa tawm hauv qhov ntxa lawm, peb tsis paub xyov lawv coj nws mus tso qhov twg lawm.”

³Petus thiab tus thwjtim ntawd txawm mus rau tom lub ntxa.

⁴Nkawd sib tw khiav mus, tiamsis tus thwjtim ntawd khiav ceev dua Petus nws thiaj xub mus txog ntawm lub ntxa.

⁵Nws khoov ntshis mus xauj hauv lub qhov ntxa; nws pom daim ntaubmag uas qhwv Yexus hle ua ib pawg rau hauv, tiamsis nws tsis nkag mus rau hauv.

⁶Thaum Ximoos Petus mus txog, nws txawm nkag plaws mus saib hauv lub qhov ntxa. Nws pom daim ntaubmag uas qhwv Yexus hle ua ib pawg rau hauv,

⁷thiab nws pom daim ntaub uas qhwv Yexus taubhau tais tso rau ib cag tsis nyob nrog daim ntaubmag uas qhwv Yexus.

⁸Tus thwjtim uas xub mus txog ntawm lub ntxa mam li nkag mus rau hauv, nws tau pom tej ntawd thiab ntseeg. (

⁹Nkawd tseem tsis tau totaub Vajtswv txojlus uas hais tias nws yuav sawv hauv qhov tuag rov qab los.)

¹⁰Tom qab ntawd, nkawd rov qab los tsev lawm.

¹¹Tiamsis Malis tseem sawv ntawm lub qhov ntxa sab nraud quaj. Thaum nws tseem quaj quaj ntawd nws khoov ntshis xauj hauv lub qhov ntxa,

¹²nws pom ob tug timtswv ceebtsheej hnav ris tsho dawb paug zaum ntawm qhov chaw uas tso Yexus lub cev rau; ib tug zaum pem taubhau thiab ib tug zaum nram kotaw.

¹³Nkawd nug Malis hais tias, “Mentxhais, ua li cas koj quaj?” Malis teb nkawd hais tias, “Xyov lawv coj kuv tus Tswv mus tso rau qhov twg lawm, kuv tsis paub li.”

¹⁴Thaum Malis hais li ntawd tas nws tig hlo los pom Yexus sawv ntawm nws ib sab, tiamsis nws tsis paub hais tias yog Yexus.

¹⁵Yexus nug Malis hais tias, “Mentxhais, ua li cas koj quaj?” Malis xav hais tias Yexus yog tus txivneej uas tu lub vaj ntawd, nws thiaj nug hais tias, “Tus tswv, yog koj muab nws mus tso rau qhov twg lawm, thov koj qhia rau kuv; kuv yuav mus nqa nws rov qab los.”

¹⁶Yexus hais rau Malis hais tias, “Malis!” Malis tig hlo mus saib Yexus thiab ua lus Henplais hais rau Yexus hais tias, “Lanpaunis!” (Lo lus no txhais hais tias, “Xibhwb.”)

¹⁷Yexus hais rau Malis hais tias, “Koj tsis txhob tuav kuv, rau qhov kuv tseem tsis tau rov mus cuag kuv Txiv. Koj cia li mus hais rau kuv cov kwvtij hais tias, ‘Kuv yuav rov mus cuag tus uas yog kuv Txiv thiab nej Txiv; nws yog kuv tus Vajtswv thiab nej tus Vajtswv.’ ”

¹⁸Yog li ntawd, Malis Madalas thiaj rov qab mus qhia rau cov thwjtim hais tias, “Kuv twb pom tus Tswv lawm”; thiab Malis qhia Yexus tej lus rau lawv.

¹⁹Hnubkaj thaum tsaus ntuj, cov thwjtim sib sau ua ke rau hauv ib lub tsev thiab liaj qhovrooj huv tibsi, rau qhov lawv ntshai cov Yudais tej nomtswv. Thaum ntawd Yexus los sawv nruab nrab hauv lawv; Yexus hais rau lawv hais tias, “Nej cia li muaj kev kaj siab.”

²⁰Thaum Yexus hais li ntawd tas, nws cev nws ob txhais tes thiab thws nws sab tav rau lawv saib. Cov thwjtim zoo siab heev rau qhov lawv pom tus Tswv lawm.

²¹Yexus rov hais rau lawv dua hais tias, “Nej cia li muaj kaj siab. Leej Txiv txib kuv los li cas, kuv yuav txib nej mus ib yam nkaus li ntawd.”

²²Thaum Yexus hais li ntawd tas, nws txawm tshuab pa rau lawv thiab hais tias, “Nej cia li txais yuav Vaj Ntsujplig tus Dawbhuv.

²³Yog nej zam txim rau leejtwg, Vajtswv yuav zam txim rau tus ntawd; yog nej tsis zam txim rau leejtwg, Vajtswv yuav tsis zam tus ntawd lub txim thiab.”

²⁴Thaumas (tus uas muaj dua ib lub npe hu ua Ntxaib) yog ib tug ntawm kaum ob tug thwjtim, nws tsis nrog cov thwjtim nyob ua ke thaum Yexus los tshwm rau lawv pom.

²⁵Cov thwjtim qhia rau Thaumas hais tias, “Peb twb pom tus Tswv lawm.” Thaumas hais rau lawv hais tias, “Yog kuv tsis pom cov qhov ntsia hlau ntawm nws ob txhais tes tsis tau muab kuv tus ntivtes xuas lub qhov ntsia hlau thiab yog kuv tsis tau xuas lub qhov uas lawv nkaug nws sab tav mas kuv yeej tsis ntseeg li.”

²⁶Tau ib limtiam tom qab, Yexus cov thwjtim rov tuaj sib sau rau hauv lub tsev ntawd dua; zaum no Thaumas nrog lawv nyob. Lawv liaj qhovrooj huv tibsi, tiamsis Yexus los sawv nruab nrab hauv lawv thiab hais tias, “Nej cia li muaj kev kaj siab.”

²⁷Yexus hais rau Thaumas hais tias, “Koj cia li saib kuv ob txhais tes thiab cev koj tus ntivtes los xuas. Cev koj txhais tes los xuas lub qhov ntawm kuv sab tav. Tsis txhob ua xyem xyav, cia li ntseeg.”

²⁸Thaumas teb Yexus hais tias, “Koj yog kuv tus Tswv thiab yog kuv tus Vajtswv!”

²⁹Yexus hais rau Thaumas hais tias, “Koj pom kuv, koj thiaj ntseeg xwb los? Tus uas tsis tau pom kuv tiamsis nws ntseeg, tus ntawd tau koob hmoov.”

³⁰Yexus ua ntau yam txujci tseemceeb rau nws cov thwjtim pom, tiamsis tsis tau muab sau rau hauv phau ntawv no.

³¹Tej uas sau rau hauv phau ntawv no yog sau los qhia kom nej ntseeg hais tias Yexus yog tus Mexiyas uas yog Vajtswv tus Tub; txhua tus uas ntseeg Yexus yuav tau txojsia ntev dhawv mus ibtxhis.