Read Hmong Daw Tes Haujlwm 14 Bible Online

Tes Haujlwm 14 - Hmong Daw bible

Tes Haujlwm 14

¹Thaum Paulus thiab Npananpas nyob hauv lub nroog Ikauni-us, pheej muaj neeg tsimtxom nkawd thiab. Nkawd mus qhia Vajtswv Txojlus hauv cov Yudais tej tsev sablaj, muaj cov Yudais thiab lwm Haivneeg los ntseeg coob heev.

²Tiamsis cov Yudais uas tsis ntseeg ntxias kom lwm Haivneeg nrog lawv ntxub cov uas ntseeg Yexus.

³Yog li ntawd, ob tug timthawj txawm nyob hauv lub nroog ntawd tau ntev loo. Nkawd muaj lub siab tawv qhia txog tus Tswv uas pub hwjchim rau nkawd ua tej txujci tseemceeb kom sawvdaws paub hais tias Vajtswv txoj koob hmoov uas nkawd qhia yog txoj tseeb.

⁴Ces cov neeg uas nyob hauv lub nroog ntawd txawm tawg ua ob pab: ib pab tuaj cov Yudais tog thiab ib pab tuaj ob tug timthawj tog.

⁵Lwm Haivneeg thiab cov Yudais qee leej txawm nrog lawv cov thawjcoj tuavhauv ua phem thiab muab pobzeb yuav ntaus ob tug timthawj.

⁶Thaum ob tug timthawj hnov li ntawd, nkawd txawm khiav mus rau nram lub nroog Lixathas thiab lub nroog Denpis uas nyob hauv tebchaws Likaunias thiab hauv tej cheebtsam uas nyob ibncig ntawd lawm.

⁷Thiab nkawd qhia txojmoo zoo rau cov neeg hauv ob lub nroog ntawd.

⁸Nyob hauv lub nroog Lixathas muaj ib tug txivneej tuag ceg thaum nruab thiab los, nws mus tsis taus kev li.

⁹Tus txivneej ntawd ua tib zoo mloog tej lus uas Paulus qhia. Paulus tsa qhovmuag saib nws thiab pom hais tias nws muaj kev ntseeg txaus pab nws ob txhais ceg zoo.

¹⁰Ces Paulus txawm hais nrov nrov rau nws hais tias, “Koj cia li sawv tsees.” Tus ntawd txawm sawv tsees ncig mus ncig los.

¹¹Thaum sawvdaws pom tej uas Paulus ua ntawd, lawv ua lawv cov lus Likaunias qw nrov nrov hais tias, “Tej vajtswv txia ua neeg los cuag peb lawm.”

¹²Lawv txawm muab Npananpas hu ua Xus thiab muab Paulus hu ua Helemes, rau qhov Paulus yog tus qhia.

¹³Tus povthawj uas teev tus vajtswv Xus, nws lub tuamtsev nyob sab nraum ntug nroog, nws txawm cab ib tug txiv nyuj thiab nqa paj ntoos tuaj txog ntawm lub roojvag uas yuav mus rau hauv lub nroog. Tus povthawj ntawd thiab cov pejxeem yuav coj tej ntawd tuaj fij rau ob tug timthawj.

¹⁴Thaum Npananpas thiab Paulus hnov hais tias lawv yuav ua li ntawd rau nkawd, nkawd txawm muab nkawd ob lub tsho dua rhe thiab khiav mus rau hauv cov neeg coob coob ntawd. Nkawd hais nrov nrov rau lawv hais tias,

¹⁵“Nej ua dabtsi li no? Wb yog neeg ib yam li nej thiab xwb! Wb tuaj ntawm no, yog tuaj qhia Txojmoo Zoo rau nej, kom nej tso tej uas nej ua tsis muaj qabhau tseg thiab los ntseeg tus Vajtswv uas muaj sia nyob. Nws yog tus uas tsim lub ntuj, lub ntiajteb, dej hiavtxwv thiab ib puas tsav yam uas nyob saum nruab ntug thiab hauv hiavtxwv.

¹⁶Yav tas los Vajtswv cia txhua haivneeg nyias ua raws li nyias lub siab nyiam.

¹⁷Tes haujlwm zoo uas Vajtswv ibtxwm ua yog nws pub muaj tshav muaj nag kom tej qoobloo siav raws caij raws nyoog thiab pub zaub mov rau nej noj kom nej tau nyob kaj siab lug. Tej no qhia rau sawvdaws paub tseeb hais tias muaj Vajtswv tiag.”

¹⁸Txawm yog ob tug timthawj qhia li ntawd rau lawv los lawv pheej yuav muab khoom fij rau nkawd, nkawd cheem yuav luag tsis yeej lawv.

¹⁹Thaum cov Yudais uas nyob hauv lub nroog Ati-aukias hauv tebchaws Pixidias thiab hauv lub nroog Ikauni-us tuaj txog lawv txawm ntxias kom sawvdaws tuaj lawv tog. Lawv muab pobzeb ntaus Paulus thiab muab nws cab tawm hauv lub nroog mus; lawv xav hais tias nws tuag lawm.

²⁰Tiamsis thaum cov ntseeg tuaj sawv vij Paulus, Paulus sawv thiab rov mus rau hauv lub nroog. Hnub tom qab Paulus thiab Npananpas txawm mus rau nram lub nroog Denpis lawm.

²¹Thaum Paulus thiab Npananpas qhia txojmoo zoo hauv lub nroog Denpis muaj ntau leej los ntseeg. Tom qab ntawd, nkawd txawm rov mus rau pem lub nroog Lixathas, lub nroog Ikauni-us, thiab lub nroog Ati-aukias hauv cheebtsam Pixidias.

²²Nkawd nplig thiab txhawb kom cov ntseeg muab siab rau ntseeg tsis txhob tso kev ntseeg tseg. Nkawd qhia lawv hais tias, “Peb cov ntseeg yeej yuav raug ntau yam kev txomnyem, peb thiaj tau mus Vajtswv lub Tebchaws.”

²³Paulus thiab Npananpas tsa muaj cov txwjlaug rau txhua pawg ntseeg; nkawd ua kevcai yoo mov thiab thov Vajtswv, nkawd muab lawv fij rau Vajtswv tus uas lawv ntseeg thiab cia siab rau.

²⁴Tom qab ntawd nkawd txawm hla cheebtsam Pixidias mus txog nram tebchaws Pafilias.

²⁵Nkawd qhia Vajtswv Txojlus hauv lub nroog Penkas tas, ces nkawd txawm mus rau hauv lub nroog Atalias,

²⁶thiab nkawd caij nkoj los rau tim lub nroog Ati-aukias uas cov ntseeg tsa nkawd ua ob tug ua tes haujlwm qhia txojmoo zoo uas nimno nkawd twb ua tiav lawm.

²⁷Thaum nkawd rov qab los txog hauv lub nroog Ati-aukias, nkawd hu cov ntseeg tuaj ua ke; nkawd piav txhua yam uas Vajtswv tau pab nkawd thiab qhia qhov uas Vajtswv qhib kev rau lwm Haivneeg los ntseeg Vajtswv lawm rau lawv mloog.

²⁸Nkawd nrog cov ntseeg ntawd nyob tau ib ntus.