Read Hmong Daw 1 Kauleethaus 2 Bible Online

1 Kauleethaus 2 - Hmong Daw bible

1 Kauleethaus 2

¹Cov kwvtij, thaum kuv tuaj xyuas nej, kuv tsis tau tuaj qhia Vajtswv txojlus tseeb uas tsis muaj neeg paub rau nej kom zoo mloog lossis qhia raws li kuv lub tswvyim xwb.

²Rau qhov kuv npaj siab hais tias thaum kuv tuaj txog tim nej, kuv yuav tsis qhia lwm zaj rau nej li, kuv tsuas qhia kom nej paub Yexus Khetos thiab qhov uas Yexus tuag saum tus ntoo khaublig rau nej xwb.

³Yog li ntawd, thaum kuv tuaj nrog nej nyob, kuv qaug zog thiab ntshai ua ibce tshee hnyo.

⁴Tej lus uas kuv hais thiab tej lus uas kuv qhia tsis yog neeg lub tswvyim, tiamsis yog tej lus uas qhia kom sawvdaws pom Vajtswv tus Ntsujplig lub hwjchim.

⁵Yog li ntawd, qhov uas nej ntseeg Vajtswv tsis yog nej cia siab rau neeg lub tswvyim, tiamsis yog nej cia siab rau Vajtswv lub hwjchim.

⁶Kuv yeej hais tej lus txawj ntse rau cov neeg uas paub tab lawm xwb, tiamsis tsis yog cov neeg tiam no lossis yog cov nomtswv tiam no tej tswvyim uas tabtom yuav ploj mus.

⁷Tiamsis kuv qhia Vajtswv lub tswvyim uas nyob nraim nkoos tsis muaj leejtwg paub. Lub tswvyim ntawd Vajtswv twb npaj tseg rau peb thaum uas tsis tau tsim lub ntiajteb no los lawm.

⁸Cov nomtswv uas kav lub ntiajteb no yeej tsis muaj ib tug paub lub tswvyim ntawd; yog lawv paub lawm, lawv yuav tsis muab tus Tswv uas muaj tshwjchim ci ntsa iab ntsia rau saum tus ntoo khaublig li.

⁹Tiamsis muaj lus sau tseg rau hauv Vajtswv txojlus hais tias, “Tej uas qhovmuag tsis tau pom lossis qhovntsej tsis tau hnov, thiab tej uas neeg lub siab xav tsis txog hais tias yuav muaj los. Vajtswv npaj tej ntawd tseg rau cov neeg uas hlub Vajtswv lawm.”

¹⁰Tiamsis Vajtswv txib Vaj Ntsujplig los qhia zaj no rau peb paub; rau qhov Vaj Ntsujplig yeej paub txhua yam uas Vajtswv xav huv tibsi.

¹¹Neeg ib leeg yeej tsis paub ib leeg lub siab, tsuas yog nyias thiaj paub nyias lub siab xwb; ib yam nkaus li ntawd tsuas yog Vajtswv tus Ntsujplig thiaj paub Vajtswv lub siab xwb.

¹²Peb tsis cia siab rau neeg lub tswvyim; tiamsis peb cia siab rau Vaj Ntsujplig tus uas Vajtswv txib los, kom peb thiaj paub txhua yam uas Vajtswv pub rau peb.

¹³Yog li ntawd, thaum peb qhia Vajtswv zaj rau cov neeg uas muaj Vajtswv tus Ntsujplig lawm, peb hais tej lus uas Vajtswv tus Ntsujplig qhia rau peb xwb, peb tsis hais tej lus uas cov neeg txawj ntse qhia rau peb.

¹⁴Tus uas tsis muaj Vaj Ntsujplig, tus ntawd yeej tsis tau txais tej uas Vajtswv tus Ntsujplig pub, rau qhov lawv pom hais tias tej ntawd tsis muaj qabhau dabtsi, thiab lawv tsis totaub txog tej ntawd, rau qhov lawv tsis muaj Vaj Ntsujplig lawv thiaj tsis totaub tej ntawd.

¹⁵Tus uas muaj Vaj Ntsujplig, tus ntawd thiaj paub hais tias yam twg muaj nqis thiab yam twg tsis muaj nqis, tiamsis tsis muaj leejtwg paub tus ntawd lub siab.

¹⁶Raws li Vajtswv txojlus hais tias, “Leejtwg thiaj paub tus Tswv lub siab? Leejtwg thiaj qhia tau nws?” Tiamsis peb twb muaj lub siab ib yam li Yexus Khetos lub lawm thiab.