Read Hmong Daw Kalatias 5 Bible Online

Kalatias 5 - Hmong Daw bible

Kalatias 5

¹Nimno peb muaj kev ywjpheej, rau qhov Yexus Khetos twb tso peb cov uas ua qhev dim lawm. Yog li ntawd, nej yuav tsum muab siab rau ntseeg tsis txhob pub leejtwg coj nej rov qab mus ua qhev dua.

²Nej cia li ua tib zoo mloog kuv tej lus! Kuv yog Paulus, kuv qhia rau nej hais tias, yog nej kam ua kevcai txiav lawm, ces kuj ib yam li nej suav hais tias Yexus Khetos pab tsis tau nej.

³Kuv rov qab qhia dua rau nej hais tias tus uas ua kevcai txiav lawm, tus ntawd yuav tsum coj raws li Vajtswv txoj kevcai txhua nqe huv tibsi.

⁴Nej cov uas xyaum ua raws li Vajtswv txoj kevcai, kom Vajtswv suav hais tias nej yog cov uas ncaj ncees, nej twb ncaim Yexus Khetos mus lawm, nej yuav tsis tau Vajtswv txoj koob hmoov.

⁵Tiamsis peb cia siab hais tias Vajtswv yeej suav hais tias peb yog cov uas ncaj ncees, twb yog vim li no, peb thiaj ntseeg thiab niaj hnub tos Vajtswv tus Ntsujplig ua tus uas pab peb.

⁶Rau qhov peb cov uas twb nrog Yexus Khetos koom ib txojsia lawm, peb tsis suav hais tias, qhov uas ua kevcai txiav yog qhov uas tseemceeb, tiamsis peb suav hais tias qhov tseemceeb yog qhov uas tus ntseeg muaj lub siab hlub lwm tus.

⁷Nej twb ua nej lub neej raws li Vajtswv txojlus uas yog qhov tseeb lawm! Leejtwg tuaj txwv tsis pub nej ua raws li ntawd thiab?

⁸Vajtswv tus uas twb xaiv nej cia lawm, nws yeej tsis txwv nej.

⁹Sawvdaws yeej ibtxwm hais tias, “Ib qhov nyuag keeb xwb, yeej ua rau lub ncuav su tagnrho.”

¹⁰Tiamsis kuv tseem cia siab tau rau nej txhua tus uas nrog Yexus Khetos koom ib txojsia lawm hais tias nej yuav tsis lam mus ntseeg lwm zaj. Thiab kuv paub hais tias tus uas tuaj ua rau nej ntxhov ntawd, txawm yog nws yog leejtwg los Vajtswv yeej yuav rau txim rau nws.

¹¹Cov kwvtij, nej sim xav saib yog kuv qhia hais tias sawvdaws yuav tsum ua kevcai txiav, ces kuv yeej tsis raug kev tsimtxom li. Ua li cas kuv tseem ho raug thiab no? Yog kuv qhia li ntawd tiag, ces zaj uas kuv qhia hais txog Yexus Khetos tus ntoo khaublig yeej yuav tsis ua rau sawvdaws tu siab.

¹²Kuv xav kom cov neeg uas tuaj ua rau nej ntxhov siab ntawd, lawv cia li muab lawv sam.

¹³Cov kwvtij, qhov uas Vajtswv tau xaiv nej cia lawm, twb yog nws xav kom nej muaj kev ywjpheej. Tiamsis nej tsis txhob muab txojkev ywjpheej ntawd ua nej txoj haukev mus ua kev phem kev qias. Nej yuav tsum sib hlub thiab ib leeg txaus siab hlo pab ib leeg.

¹⁴Rau qhov Vajtswv txoj kevcai txhua nqe puavleej muab sau zog ua ib nqe hais li no hais tias, “Hlub koj tej kwvtij zejzog ib yam li koj hlub koj lub cev.”

¹⁵Tiamsis yog nej ua li tej tsiaj, nej ib tug ntxo ib tug thiab ib tug ua limhiam rau ib tug, yog nej ua li ntawd nej ib tug yeej yuav ua rau ib tug raug kev puastsuaj.

¹⁶Kuv qhia rau nej li no: nej yuav tsum cia Vaj Ntsujplig kav nej lub neej, nej tsis txhob cia nej lub siab kav nej ib zaug li.

¹⁷Rau qhov neeg lub siab yeej tsis nyiam tej uas Vaj Ntsujplig nyiam, thiab Vaj Ntsujplig yeej tsis nyiam tej uas neeg lub siab nyiam, neeg lub siab thiab Vaj Ntsujplig yeej ua yeebncuab.

¹⁸Yog Vaj Ntsujplig coj nej kev, ces txoj kevcai yeej tsis muaj hwjchim kav nej lawm.

¹⁹Sawvdaws yeej paub tej uas neeg lub siab nyiam ua, tej ntawd yog li no: Kev ua nkauj ua nraug, kev phem kev qias thiab ua dog ua dig,

²⁰pe dab pe mlom, ua neeb ua yaig, ua yeebncuab, sib ceg sib ntaus, sib khib, sib chim, xav ua tus hlob, sib faib ua pab ua pawg,

²¹ntshaw luag tug, quav yeeb, quav tshuaj, quav cawv, qw ua nqaj ua nqug thiab ua ntau yam uas zoo li tej no. Yav tas los kuv twb ntuas nej ib zaug lawm, tiamsis nimno kuv rov ntuas nej dua ib zaug hais tias cov neeg uas ua tej ntawd, lawv yeej yuav tsis tau Vajtswv lub Tebchaws los ua lawv tug ib zaug li.

²²Tiamsis Vaj Ntsujplig yuav ua rau neeg muaj lub siab sib hlub, zoo siab, nyob kaj siab lug, ua siab ntev, muaj lub siab dawb siab zoo, zoo siab hlo pab lwm tus, ua siab ncaj,

²³tsis khavtheeb thiab paub tswj yus lub siab. Yeej tsis muaj ib txoj kevcai yuav txwv tej no hlo li.

²⁴Cov uas ntseeg Yexus Khetos, lawv twb muab tej kev phem uas lawv lub siab nyiam ua huv tibsi los ntsia rau saum tus ntoo khaublig lawm.

²⁵Vaj Ntsujplig twb pub txojsia rau peb lawm; peb yuav tsum cia nws kav tagnrho peb lub neej.

²⁶Peb tsis txhob muab hlob, ib tug tsis txhob ua rau ib tug chim lossis ib tug tsis txhob khib ib tug.