Read Hmong Daw Cov Thawjtswj 3 Bible Online

Cov Thawjtswj 3 - Hmong Daw bible

Cov Thawjtswj 3

¹Yog li ntawd, tus TSWV thiaj tseg qee haivneeg nyob hauv lub tebchaws ntawd sim cov Yixalayees uas tsis tau nrog cov Kana-as ua rog dua.

²Nws ua li no twb yog ua qhia cov Yixalayees txhua tiam kom paub txog kev ua rog, tshwjxeeb yog rau cov uas ibtxwm tsis tau ua rog dua li xwb.

³Cov neeg uas tseg nyob rau hauv cov Filitees tsib lub nroog uas nyob hauv lub tebchaws ntawd, yog cov Kana-as, cov Xidoos thiab cov Hivis uas nyob pem cov Roob Lenpanoos, txij ntua ntawm lub Roob Npa-as Helemoos mus rau ntawm lub Dawm Hamas.

⁴Lawv yog cov uas yuav sim cov Yixalayees siab, saib lawv puas mloog tus TSWV tej lus samhwm uas Mauxes tau qhia rau lawv cov yawgkoob lawm.

⁵Yog li ntawd, cov Yixalayees thiaj tau nyob xyaw cov Kana-as, cov Hitis, cov Amaules, cov Pelixes, cov Hivis thiab cov Yenpus.

⁶Cov Yixalayees tso lawv tej tub tej ntxhais mus yuav cov neeg ntawd tej tub tej ntxhais thiab mus pe lawv tej vajtswv.

⁷Cov Yixalayees tsis nco qab tus TSWV uas yog lawv tus Vajtswv lawm; lawv ua txhaum tus TSWV thiab mus pe tej mlom Npa-as thiab Aselas.

⁸Yog li ntawd, tus TSWV chim heev rau cov Yixalayees nws thiaj tso lawv rau Vajntxwv Kusas Lisathayees uas kav lub tebchaws Mexuputamias tuaj tua yeej lawv. Lawv thiaj raug ntes mus ua nws qhev tau yim xyoo.

⁹Ces cov Yixalayees quaj thov tus TSWV, nws thiaj txib ib tug txivneej mus tso lawv dim. Tus ntawd yog Kalej tus kwv Kenas tus tub Authaniyees.

¹⁰Tus TSWV tus ntsujplig los rau Authaniyees, thiab nws tau ua cov Yixalayees tus thawjcoj. Authaniyees mus ntaus rog thiab tus TSWV pub nws tua yeej tus vajntxwv uas kav tebchaws Mexuputamias.

¹¹Thaum ntawd, lub tebchaws muaj kev thajyeeb tau plaub caug xyoo, ces Authaniyees txawm tuag lawm.

¹²Cov Yixalayees rov ua txhaum rau tus TSWV dua. Vim txojkev txhaum no tus TSWV thiaj ua rau Vajntxwv Enkiloos uas kav tebchaws Mau-am muaj zog tshaj cov Yixalayees.

¹³Enkiloos koom tes nrog cov Amaules thiab cov Amalej; lawv thiaj tuaj tua yeej cov Yixalayees thiab txeeb tau lub nroog Yelikaus uas yog lub nroog toovlaj.

¹⁴Cov Yixalayees thiaj raug Enkiloos yuam ua qhev tau kaum yim xyoo.

¹⁵Ces cov Yixalayees quaj thov tus TSWV, nws thiaj txib ib tug txivneej mus tso lawv dim. Tus ntawd yog Ehus, nws yog tus uas xis sab teslaug thiab yog Nkelas tus tub uas yog xeem Npeenyamees. Cov Yixalayees txib Ehus mus cuag cov Mau-am tus Vajntxwv Enkiloos thiab nqa ib co khoom mus pub nws.

¹⁶Ehus ntaus tau ib rab ntaj ob sab ntse ntev li ib tshim. Nws muab rab ntaj ntawd pav rau ntawm nws sab ncejpuab xis rau sab hauv qab nws lub ris.

¹⁷Ces nws txawm muab cov khoom ntawd pub rau Enkiloos, Enkiloos yog ib tug txivneej uas rog heev.

¹⁸Thaum Ehus muab cov khoom pub rau Enkiloos, Ehus txawm kom cov neeg uas kwv cov khoom ntawd cia li rov mus tsev.

¹⁹Tiamsis Ehus txawm tig mus ntsia pawg pobzeb uas txaug ua duab nyob ze ntawm Nkilenkas, thiab tig hlo los hais rau Enkiloos hais tias, “Vajntxwv, kuv muaj tej lus tseemceeb yuav hais rau koj.” Yog li ntawd, vajntxwv thiaj hais rau nws cov tubtxib hais tias, “Nej cia li tawm mus, cia wb ob leeg nyob xwb.” Ces lawv txawm tawm mus tas lawm.

²⁰Thaum vajntxwv zaum hauv nws chav uas txias laj ntxiag theem tsev saud, Ehus txawm txav zog mus hais rau vajntxwv hais tias, “Vajtswv muaj lus rau kuv tuaj hais rau koj.” Ces vajntxwv txawm sawv tsees.

²¹Ehus muab nws sab teslaug rho hlo rab ntaj ntawm nws sab ncejpuab xis los tib nkaug rau vajntxwv plab.

²²Nws muab rab ntaj thiab tus ko tsij yos tagnrho rau hauv vajntxwv plab, ces cov roj npog nkaus lub qhov nqaij rov rau lawm. Ehus yeej tsis rho rab ntaj tawm hauv vajntxwv plab los li, ces tej zaub mov hauv vajntxwv plab tawm tshau lug tuaj.

²³Ces Ehus txawm tawm plaws rau nraum zoov, kaw nkaus qhovrooj thiab muab xauv kiag cia,

²⁴thiab nws khiav lawm. Cov tubtxib los pom lub qhovrooj tseem xauv kaw nti, tiamsis lawv xav hais tias yog vajntxwv tseem mus plhob hauv tsev dej lawm xwb.

²⁵Lawv tos ntev loo tiamsis vajntxwv pheej tsis los qhib qhovrooj li, lawv thiaj muab yuamsij mus qhib plho qhovrooj. Ua cas lawv tus vajntxwv tuag xyab luas rau hauv plag tsev lawm xwb.

²⁶Thaum lawv tos tau ntev loo ntawd, Ehus twb khiav mus deb heev lawm. Nws khiav mus hla pawg pobzeb uas luag txaug mus rau ntawm lub roob Xe-ilas.

²⁷Thaum nws mus txog pem roob Efalayees, nws thiaj tshuab raj tshuab xyu hu cov txivneej Yixalayees tuaj mus ntaus rog; ces nws coj lawv nqis saum roob los.

²⁸Nws hais rau lawv hais tias, “Nej raws kuv qab! Tus TSWV twb pub nej tua yeej nej cov yeebncuab uas yog cov Mau-am lawm.” Yog li ntawd, lawv thiaj raws Ehus qab mus thiab txeeb tau thaj chaw uas cov Mau-am pheej mus hla tus dej Yauladees; lawv tsis pub ib tug txivneej twg hla mus los li.

²⁹Hnub ntawd lawv tua cov Mau-am tej tubrog uas siab tawv heev tuag kwvyees li kaum txhiab leej; tsis muaj ib tug khiav dim li.

³⁰Txij hnub ntawd los cov Yixalayees yeej cov Mau-am, thiab lub tebchaws muaj kev thajyeeb tau yim caum xyoo.

³¹Tom qab uas Ehus tuag lawm, Anas tus tub Sankas sawv ua thawjcoj. Nws kuj yog ib tug uas tso cov Yixalayees dim, thiab nws muab ib tug pas lawv nyuj nkaug cov Filitees tuag rau pua leej.