Read Hmong Daw Tshwmsim 13 Bible Online

Tshwmsim 13 - Hmong Daw bible

Tshwmsim 13

¹Tom qab ntawd kuv pom ib tug tsiaj tawm hauv hiavtxwv tuaj. Tus tsiaj ntawd muaj kaum tus kub thiab muaj xya lub taubhau; kaum tus kub ntawd puavleej ntoo kausmom kub huv tibsi, thiab xya lub taubhau ntawd txhua lub puavleej muaj ib lub npe phem kawg li uas yog thuam Vajtswv sau rau ntawd.

²Tus tsiaj uas kuv pom ntawd zoo ib yam li tus tsov pomtxwv, nws tej tes taw zoo li tes taw dais, nws lub qhovncauj zoo li tsov ntxhuav lub. Tus zaj ntawd muab hlo nws lub hwjchim, nws lub zog thiab nws lub zwmtxwv rau tus tsiaj ntawd.

³Saib zoo li luag twb muab tus tsiaj ntawd ib lub taubhau txiav tu lawm, tiamsis lub qhov txhab twb zoo lawm. Tej neeg uas nyob thoob plaws hauv qab ntuj no xav tsis thoob li, ces lawv txawm qaug siab rau tus zaj ntawd.

⁴Tej neeg puavleej tuaj pe tus zaj, rau qhov nws muab nws lub hwjchim rau tus tsiaj ntawd lawm. Thiab lawv tseem pe tus tsiaj ntawd, lawv hais tias, “Leejtwg yuav muaj hwjchim npaum li tus tsiaj no, thiab leejtwg yuav tawmtsam yeej nws.”

⁵Luag cia tus tsiaj ntawd hais tej lus phem txob thuam Vajtswv thiab cia tus tsiaj muaj hwjchim ua li ntawd mus txog plaub caug ob lub hlis.

⁶Tus tsiaj ntawd txawm pib cem Vajtswv; nws thuam Vajtswv lub npe, Vajtswv lub chaw nyob, thiab foom tsis zoo rau cov uas nyob saum ntuj ceebtsheej huv tibsi.

⁷Luag cia tus tsiaj ntawd tawmtsam Vajtswv haivneeg thiab luag cia nws kovyeej lawv. Luag tsa nws ua tus kav tagnrho txhua lub tebchaws, tsis hais haivneeg twg, xeem twg thiab cov neeg uas hais yam lus twg los nws kav huv tibsi.

⁸Tej neeg uas nyob hauv qab ntuj no sawvdaws puavleej yuav pe tus tsiaj ntawd. Tsuas yog tshwj cov neeg uas thaum tsis tau tsim ntuj tsim teb, luag twb sau lawv tej npe rau hauv phau ntawv uas sau cov neeg muaj txojsia ntev dhawv mus ibtxhis lawm tej npe. Phau ntawv ntawd yog tus menyuam Yaj uas twb raug luag muab tua lawm phau.

⁹Yog nej leejtwg muaj pobntseg, cia li khaws tej lus no cia!

¹⁰Tsis hais leejtwg los thaum txog hnub uas nws yuav raug luag ntes mus, luag yeej yuav ntes nws coj mus; thaum txog hnub uas nws raug luag muab ntaj tua, nws yeej yuav raug. Yog li ntawd, Vajtswv cov neeg yuav tau ua siab ntev thiab muab siab rau ntseeg.

¹¹Thiab tom qab ntawd kuv pom muaj dua ib tug tsiaj tawm hauv av los. Nws muaj ob tug kub zoo li menyuam yaj tus, nws hais lus ib yam li tus zaj hais.

¹²Thaum nws los nws siv lub hwjchim loj uas thawj tug tsiaj muab rau nws. Nws yuam lub ntiajteb thiab tej neeg uas nyob hauv ntiajteb pe thawj tug tsiaj uas tej qhov txhab twb zoo tas lawm.

¹³Tus tsiaj uas yog tus ob no ua tau tej txujci loj uas sawvdaws xav tsis thoob li thiab; nws ua kom hluavtaws poob saum ntuj los rau hauv ntiajteb no tabmeeg sawvdaws.

¹⁴Nws ua tej txujci loj ntawd dag ntxias neeg ntiajteb. Luag pub nws ua tej txujci ntawd tabmeeg ntawm thawj tus tsiaj. Thiab luag yuam kom neeg ntiajteb puab ib tug mlom zoo li thawj tug tsiaj uas raug luag muab ntaj tua tiamsis ciaj sia rov los lawm ntawd.

¹⁵Luag cia tus tsiaj uas yog tus ob ntawd rau siav rau pa rau tus mlom uas muaj yam ntxwv zoo li thawj tus tsiaj, ces tus mlom ntawd txawm txawj hais lus thiab mus muab cov neeg uas tsis kam pe tus mlom ntawd tua povtseg.

¹⁶Tus tsiaj ob ntawd yuam tej neeg, tsis hais tus hlob tus yau, tus muaj tus pluag, tus ua qhev lossis tus tsis ua qhev, kom mus nias homthawj rau ntawm lawv sab tes xis lossis ntawm hauvpliaj.

¹⁷Lub homthawj ntawd yog tus tsiaj ntawd lub npe. Yog leejtwg tsis muaj lub homthawj ntawd lossis tsis muaj cov lej xamphaj uas qhia hais tias yog tus tsiaj ntawd lub npe, ces tus ntawd muas tsis tau lossis muag tsis tau ib yam dabtsi hlo li.

¹⁸Tus uas muaj tswvyim, nws yeej yuav paub hais tias tus tsiaj ntawd cov lej xamphaj yog li cas, rau qhov cov lej xamphaj ntawd yeej piv txog ib tug txivneej lub npe. Cov lej xamphaj ntawd yog rau pua rau caum rau.