Read Hmong Daw 1 Xamuyees 10 Bible Online

1 Xamuyees 10 - Hmong Daw bible

1 Xamuyees 10

¹Xamuyees txawm muab hwj roj hliv rau Xa-ules taubhau, nwj nws thiab hais tias, “Tus TSWV tsa koj ua tus kav nws haivneeg Yixalayees. Koj yuav kav nws haivneeg thiab cawm kom lawv dim ntawm lawv cov yeebncuab txhais tes. Zaj uas kuv hais qhia rau koj no yuav ua rau koj paub hais tias, tus TSWV tau xaiv koj ua tus kav nws haivneeg.

²Hnub no thaum koj ncaim kuv mus lawm, koj yuav ntsib ob tug txivneej ze Laxees lub ntxa ntawm Xelexas hauv xeem Npeenyamees cheebtsam av. Nkawd yuav qhia rau koj hais tias, luag twb nrhiav tau cov neesluav uas koj tuaj nrhiav lawm. Koj txiv tsis txhawj txog cov neesluav, tiamsis nws txhawj koj heev, nws nroo hais tias, ‘Xyov kuv tus tub mus dua qhov twg lawm, kuv yuav ua li cas thiaj zoo?’

³Thaum koj dhau ntawd mus txog ntawm tsob ntoo xeeb pem Tanpaules, koj yuav ntsib peb tug txivneej tabtom coj khoom tuaj fij rau Vajtswv pem lub nroog Npethees. Peb tug txivneej ntawd, ib tug cab ib tug thav tshis, ib tug nqa peb lub ncuav thiab ib tug nqa ib hnab tawv cawv txiv hmab.

⁴Lawv yuav hawm koj thiab muab ob lub ncuav rau koj, koj cia li txais ob lub ncuav ntawd.

⁵Dhau ntawd mus, thaum koj mus txog saum Vajtswv lub Roob ntawm lub nroog Nkinpe-as, qhov chaw uas cov Filitees tsuam yeej. Koj yuav ntsib ib pab cevlus ntawm lub roojvag nroog, lawv tabtom ntaus nkauj nogncas loj, ntaus nruas npuaj, tshuab raj thiab ntaus nkauj nogncas me, nqis saum roob uas teeb lub thaj fij los. Lawv seevcev thiab qw zoo siab heev.

⁶Thaum ntawd, tus TSWV tus ntsujplig yuav los kav hlo koj lub siab, koj yuav nrog lawv seevcev, qw zoo siab thiab koj lub siab yuav hloov hlo tsis thooj li qub lawm.

⁷Thaum muaj tej xwmtxheej no tshwm, koj yuav ua txhua yam raws li Vajtswv qhia rau koj ua.

⁸Koj yuav ua kuv ntej mus rau hauv lub nroog Nkilenkas, kuv yuav tuaj ntsib koj nrad thiab muab tsiaj tua hlawv fij thiab fij khoom ua kev sib raug zoo rau tus TSWV. Koj nyob xya hnub tos kom kuv tuaj txog, kuv mam qhia rau koj paub hais tias koj yuav tsum ua dabtsi.”

⁹Thaum Xa-ules yuav ncaim Xamuyees mus, Vajtswv twb hloov Xa-ules lub siab dua tshiab lawm. Hnub ntawd txawm muaj txhua yam tshwm raws li Xamuyees tau hais rau Xa-ules lawm.

¹⁰Thaum Xa-ules thiab nws tus tubtxib los txog hauv lub nroog Nkinpe-as, muaj ib pab cevlus txawm tuaj ntsib Xa-ules. Tamsim ntawd Vajtswv tus ntsujplig los kav hlo Xa-ules lub siab, nws thiaj nrog lawv dhia seevcev thiab qw zoo siab.

¹¹Thaum cov neeg uas ibtxwm paub Xa-ules pom nws ua li ntawd, lawv txawm sib nug hais tias, “Dabtsi ua rau Kises tus tub ua li ntawd? Xa-ules txawm cia li ua ib tug cevlus lawm thiab los?”

¹²Muaj ib tug txivneej nyob hauv lub nroog ntawd nug hais tias, “Cov cevlus ntawd ne, lawv txiv ho yog leejtwg?” Twb yog vim li no, sawvdaws thiaj hais tias, “Xa-ules txawm ua ib tug cevlus lawm thiab los?”

¹³Thaum Xa-ules seevcev thiab qw zoo siab li ntawd tas, nws txawm mus rau pem lub thaj uas nyob saum lub laj roob lawm.

¹⁴Xa-ules tus txiv hlob pom Xa-ules thiab Xa-ules tus tubtxib, nws nug nkawd hais tias, “Neb mus qhov twg los?” Xa-ules teb hais tias, “Wb mus nrhiav neesluav los, wb nrhiav tsis tau, ces wb txawm mus cuag Xamuyees lawm.”

¹⁵Xa-ules tus txiv hlob nug hais tias, “Nws hais li cas rau neb?”

¹⁶Xa-ules teb hais tias, “Nws hais rau wb hais tias, luag twb nrhiav tau cov neesluav lawm.” Tiamsis Xa-ules tsis qhia rau nws txiv hlob paub txog qhov uas Xamuyees hais tias, Xa-ules yuav tau ua vajntxwv li.

¹⁷Xamuyees hu cov pejxeem tuaj sib sau pehawm tus TSWV hauv lub nroog Mixepas,

¹⁸nws hais rau lawv hais tias, “Tus TSWV uas yog cov Yixalayees tus Vajtswv hais tias, ‘Kuv coj nej tawm nram tebchaws Iziv los thiab cawm nej dim ntawm cov neeg Iziv thiab lwm haivneeg uas tsimtxom nej.

¹⁹Kuv yog nej tus Vajtswv uas cawm nej dim ntawm nej txojkev txomnyem nyuaj siab, tiamsis hnub no nej tso kuv tseg thiab thov kom kuv tsa ib tug vajntxwv kav nej. Yog li ntawd, nej txhua xeem thiab txhua cuab cia li tuaj sib sau tabmeeg tus TSWV.’ ”

²⁰Xamuyees hu ib xeem zuj zus los, ces tus TSWV xaiv xeem Npeenyamees.

²¹Xamuyees hu xeem Npeenyamees ib tsev zuj zus los, ces tus TSWV xaiv Matis tsevneeg. Thaum Matis tsevneeg cov txivneej los, ces tus TSWV xaiv Kises tus tub Xa-ules. Sawvdaws nrhiav nws, tiamsis tsis pom nws nyob qhov twg,

²²lawv nug tus TSWV hais tias, “Nws tuaj ntawm no los tsis tuaj?” Tus TSWV teb hais tias, “Xa-ules khiav nkaum tom qab cov hnab rau khoom.”

²³Yog li ntawd, lawv thiaj mus coj Xa-ules los cuag sawvdaws, thiab lawv pom hais tias Xa-ules siab tshaj sawvdaws huv tibsi.

²⁴Xamuyees hais rau sawvdaws hais tias, “Tus txivneej no yog tus uas tus TSWV xaiv! Peb cov no tsis muaj ib tug zoo li nws li.” Thiab sawvdaws qw hais tias, “Thov kom vajntxwv muaj sia nyob ntev!”

²⁵Xamuyees qhia vajntxwv tes haujlwm tej uas vajntxwv muaj cai ua rau cov pejxeem sawvdaws paub, thiab nws muab tej ntawd sau cia rau hauv ntawv coj mus khaws tseg rau hauv chav uas pehawm Vajtswv. Ces Xamuyees txawm kom sawvdaws rov mus tsev.

²⁶Xa-ules los rov mus tsev rau pem lub nroog Nkinpe-as lawm. Cov nomtswv uas muaj hwjchim uas Vajtswv tshoov siab lawm los kuj nrog Xa-ules mus thiab.

²⁷Tiamsis muaj qee leej uas tsis thoob tsib to nrog hais tias, “Tus txivneej no yuav pab tau peb li cas?” Lawv hais lus saib tsis taus Xa-ules thiab tsis muab ib yam dabtsi rau nws li.