Read Hmong Njua Chivkeeb 12 Bible Online

Chivkeeb 12 - Hmong Njua bible

Chivkeeb 12

¹Vaajtswv has rua Anplaas has tas, “Koj ca le tso koj lub tebchaws, koj cov kwvtij neejtsaa, hab koj txiv lub tsev tseg, hab sawv kev moog rua nraag lub tebchaws kws kuv yuav qha rua koj.

²Kuv yuav pub koj muaj xeebntxwv coob, hab puab yuav ua ib tsaav tuabneeg tseemceeb. Kuv yuav foom koob moov rua koj, kuas koj lub koob lub npe nyob nto moo lug, hab koj yuav ua rua lwm leej lwm tug tau txais koob moov.

³Kuv yuav foom koob moov rua tug kws ua zoo rua koj, Tabsis kuv yuav foom tsi zoo rua tug kws ua phem rua koj. Hab kuv yuav foom koob moov ntawm koj moog rua txhua tsaav tuabneeg kws nyob thoob plawg nplajteb.”

⁴Thaus Anplaas noobnyoog muaj xyaa caum tsib xyoos, nwg txawm tsiv tawm huv lub nroog Halaas lawv le tug TSWV tau has rua nwg lawm, hab Lauj nrug nwg moog.

⁵Anplaas coj Xalais kws yog nwg tug quaspuj, nwg tug kwv Halaas tug tub Lauj, hab taagnrho obtug tej cuabtaam, obtug tej tubqhe hab ntxhais qhev kws nyob huv lub nroog Halaas, hab puab txawm sawv kev moog rua nraag tebchaws Kana-aas lawm. Thaus puab tsiv moog txug rua huv tebchaws Kana-aas lawm,

⁶Anplaas taug kev huv lub tebchaws ntawd lug txug rua ntawm tsob ntoo xeeb huv Maules kws yog qhov chaw tseemceeb huv lub nroog Sekhees. (Thaus lub sijhawm ntawd cov tuabneeg Kana-aas tseem nyob huv lub tebchaws ntawd.)

⁷Tug TSWV tshwm rua Anplaas pum hab has rua nwg tas, “Lub tebchaws nuav yog lub kws kuv yuav muab pub rua koj cov xeebntxwv nyob.” Ces Anplaas txhaj teeb tau ib lub thaaj rua ntawm qhov chaw ntawd rua tug TSWV kws tau lug tshwm rua nwg pum.

⁸Dlhau ntawd, Anplaas txhaj txaav chaw moog rua yaav qaabteb ntawm lub laaj roob kws nyob ntawm lub nroog Npethees saab nubtuaj hab nwg tsaa tsevntaub nyob rua ntawd. Lub nroog Npethees nyob saab nubpoob hab lub nroog A-is nyob saab nubtuaj. Thaus Anplaas nyob qhov ntawd, nwg teeb tau ib lub thaaj rua tug TSWV hab pehawm tug TSWV.

⁹Ces nwg tsiv ib qho rua ib qho, nwg txhaj tsiv moog nyob rua tebchaws Kana-aas yaav qaabteb lawm.

¹⁰Lub sijhawm ntawd muaj kev tshaib nqhes nyob huv tebchaws Kana-aas, Anplaas txhaj tsiv moog nyob rua nraag tebchaws Iziv tau ib ntus.

¹¹Thaus nwg taabtom moog yuav txug ntawm tug nrimteb moog rua huv tebchaws Iziv, nwg has rua nwg tug quaspuj tas, “Kuv paub koj yog ib tug quaspuj kws zoo nkauj heev.

¹²Thaus cov Iziv pum koj, puab yuav has tas, koj yog kuv tug quaspuj. Ces puab yuav tua kuv povtseg hab tseg koj ca.

¹³Koj ca le has rua puab tas, koj yog kuv tug muam xwb; yog vim muaj koj puab txhaj yuav tseg kuv txujsa hab ua zoo rua kuv.”

¹⁴Thaus Anplaas moog dlhau plawg nrimteb rua huv tebchaws Iziv lawm, cov Iziv pum nwg tug quaspuj zoo nkauj heev.

¹⁵Muaj qee leej numtswv pum Xalais zoo nkauj heev, puab txhaj moog pav qha rua Falaus, yog le ntawd, luas txhaj tuaj coj Xalais moog rua huv Falaus lub loog.

¹⁶Vim muaj Xalais, Falaus txhaj ua zoo heev rua Anplaas hab muab yaaj, tshis, nyuj, neeg luav, qhev hab ntxhuav pub rua Anplaas.

¹⁷Tabsis vim Falaus tau coj Xalais moog, tug TSWV txhaj tso tej kaab mob phem lug raug Falaus hab cov tuabneeg huv nwg lub loog nyaav heev.

¹⁸Falaus txhaj tso tuabneeg moog cuag Anplaas hab nug nwg has tas, “Vim le caag koj ua le nuav rua kuv? Ua le caag koj tsi qha ncaaj rua kuv paub tas, Xalais yog koj tug quaspuj?

¹⁹Vim le caag koj txhaj has tas, nwg yog koj tug muam, hab ca kuv coj nwg moog yuav ua kuv tug quaspuj? Koj tug quaspuj nyob ntawm nuav, ca le coj nwg hab tsiv tawm moog!”

²⁰Falaus saamfwm rua nwg cov tubkhai, puab txhaj ntab Anplaas tawm huv puab lub tebchaws, nrug nwg tug quaspuj hab coj txhua yaam kws yog nwg tug huv tuabsi moog.