Read Hmong Njua Chivkeeb 14 Bible Online

Chivkeeb 14 - Hmong Njua bible

Chivkeeb 14

¹Muaj plaub tug vaajntxwv kws yog: Alafees tug kws kaav lub nroog Npanpiloos, Ali-aus tug kws kaav lub nroog Elasas, Khedaule-aumes tug kws kaav lub nroog Elames, hab Tidas tug kws kaav lub nroog Nkauyees,

²tau tawm moog ua rog rua tsib tug vaajntxwv kws yog Npelas tug kws kaav lub nroog Xaudoos, Npisas tug kws kaav lub nroog Kaumaulas, Sinaj tug kws kaav lub nroog Amaas, Semenpes tug kws kaav lub nroog Xenpauyees, hab tug vaajntxwv kws kaav lub nroog Npelas, (lossis yog Xau-as).

³Tsib tug vaajntxwv nuav txhaj koom sab ua ke tuaj ib tog hab txhij tubrog moog nyob rua huv lub Haav Xidees kws taamsim nuav yog lub paag dlej Havtxwv Tuag ntaag.

⁴Puab poob moog ua Khedaule-aumes pejxeem tau kaum ob xyoos, tabsis xyoo kaum peb puab rov tig ntxeev sab sawv tawmtsaam nwg.

⁵Ces xyoo kaum plaub Khedaule-aumes hab cov vaajntxwv kws tuaj nwg tog nrug puab cov tubrog tuaj tua yeej cov Lefayees kws nyob huv lub nroog Atelaus Kalenais, cov Xuximes kws nyob huv lub nroog Hames, cov Emis kws nyob huv lub taj nraag Kili-athayees,

⁶hab cov Haulis kws nyob sau cov laaj roob Edoos, puab txhaj muab cov tuabneeg nuav caum tua moog ti nkaus rua ntawm ntug nroog Epalas kws nyob tom taj zeb suabpuam.

⁷Ces puab txawm tig rov qaab lug txug huv lub nroog Kades (lossis yog Emisapas). Puab ntaus tau taagnrho saab tebchaws Amalej hab puab tua yeej cov tuabneeg Amaules kws nyob rua huv lub nroog Haxaxoos Tamaj.

⁸Ces cov vaajntxwv kws kaav lub nroog Xaudoos, Kaumaulas, Amaas, Xenpauyees hab Npelas (lossis Xau-as), txhaj tau txhij puab cov tubrog tuaj ntaus rog rua huv lub Haav Xidees hab tua

⁹Khedaule-aumes kws yog vaajntxwv kaav lub nroog Elames, Tidas kws yog vaajntxwv kaav lub nroog Nkauyees, Alafees kws yog vaajntxwv kaav lub nroog Sinas, hab Ali-aus kws yog vaajntxwv kaav lub nroog Elasas; tsib tug vaajntxwv nuav ua rog rua plaub tug vaajntxwv.

¹⁰Lub taj ntawd muaj qhov roj aav nplaum ntau heev, ces thaus tug vaajntxwv kws kaav lub nroog Xaudoos hab tug vaajntxwv kws kaav lub nroog Kaumaulas nrhav kev tsiv tawm huv tshaav rog, obtug txhaj poob cov qhov roj aav nplaum ntawd, tabsis dlua le peb tug vaajntxwv tsiv dlim nce moog rua peg roob lawm.

¹¹Ces plaub tug vaajntxwv ntawd txhaj muab txhua yaam kws muaj nyob huv lub nroog Xaudoos hab Kaumaulas, hab tej zaub mov huv tuabsi, coj tsiv moog lawm.

¹²Lauj kws yog Anplaas tug kwv Halaas tug tub, nwg nyob huv lub nroog Xaudoos, puab txhaj nteg tau nwg hab fuab nwg tej cuabtaam coj moog lawm dlu lug.

¹³Tabsis muaj ib tug txivneej tsiv dlim huv tshaav rog lug has txhua yaam rua Anplaas kws yog tuabneeg Henplais kws nyob ze rua ntawm Maales tug kws yog tuabneeg Amaules cov ntoo xeeb. Maales hab nwg ob tug tijlaug, Esekaus hab Aneles puavleej koom teg tuaj Anplaas tog.

¹⁴Thaus Anplaas nov dlheev has tas yeebncuab nteg tau nwg tug kwv Halaas tug tub Lauj lawm, nwg txhaj hu taagnrho peb puas kaum yim leej tubrog huv nwg lub yeej tawm moog caum tua plaub tug vaajntxwv ntawd moog txug ndlua huv lub nroog Daas.

¹⁵Thaus tsaus ntuj lawm nwg txhaj muab nwg cov tubrog faib ua tej paab moog tua cov yeebncuab, plaub tug vaajntxwv ntawd txhaj swb tawg tsiv taag. Anplaas puab tseem caum tua moog txug ndlua peg lub nroog Haunpas kws nyob ntawm Damaxes saab qaumteb,

¹⁶Anplaas txeeb tau txhua yaam kws luas coj moog lawm rov qaab lug huv tuabsi. Hab nwg tseem coj tau nwg tug kwv Halaas tug tub Lauj hab Lauj tej cuabtaam, cov quaspuj hab tej tuabneeg kws raug luas nteg tau lawm rov lug taagnrho huv tuabsi.

¹⁷Thaus Anplaas moog tua yeej vaajntxwv Khedaule-aumes hab peb tug vaajntxwv kws tuaj Khedaule-aumes tog rov qaab lug, tug vaajntxwv kws kaav lub nroog Xaudoos txhaj tuaj tog Anplaas ntawm lub Haav Saves (lossis hu ua lub Haav Vaajntxwv).

¹⁸Mekhixedes kws ua vaajntxwv kaav lub nroog Xalees hab ua ib tug povthawj rua Vaajtswv tug kws muaj fwjchim luj kawg nkaus, txhaj coj ncuav hab cawv txiv maab tuaj pub rua Anplaas,

¹⁹hab foom koob moov rua nwg has tas, “Thov kuas Vaajtswv tug kws muaj fwjchim luj kawg nkaus, tug kws tsim lub ntuj hab lub nplajteb foom koob moov rua Anplaas!

²⁰Thov kuas Vaajtswv tug kws muaj fwjchim luj kawg nkaus kws tau paab koj ntaus yeej koj cov yeebncuab, tau txais koob meej!” Hab Anplaas muab tej khoom kws nwg moog txeeb tau rov qaab lug ntawd ib feem kaum pub rua Mekhixedes.

²¹Tug vaajntxwv kws kaav lub nroog Xaudoos has rua Anplaas tas, “Koj yuav txhua yaam khoom huv tuabsi, tabsis thov muab kuv cov pejxeem rov qaab rua kuv xwb.”

²²Anplaas teb has tas, “Kuv tau tsaa teg coglug taabmeeg tug TSWV, Vaajtswv tug kws muaj fwjchim luj kawg nkaus, tug kws tsim lub ntuj hab lub nplajteb has tas,

²³kuv tsi yuav ib yaam dlaabtsi kws yog koj tug. Txawm yog ib txuj xuv lossis ib txuj nyuas hlua khau khab, kuv tub tsi yuav. Koj txhaj yuav khaav tsi tau has tas, ‘Kuv yog tug kws tsaa Anplaas npluanuj ntaag.’

²⁴Kuv yuav tsi nqaa ib yaam dlaabtsi moog rua kuv yuav le. Kuv tsuas leeg yuav tej zaub mov kws kuv cov tubrog muab noj taag lawm xwb. Tabsis cov kws koom teg paab kuv, Aneles, Esekaus, hab Maales, ca puab yuav tej kws yog puab tug.”