Read Hmong Njua Chivkeeb 16 Bible Online

Chivkeeb 16 - Hmong Njua bible

Chivkeeb 16

¹Xalais kws yog Anplaas tug quaspuj yeej ibtxwm xeeb tsi taug tub le. Tabsis nwg muaj ib tug ntxhais qhev kws yog tuabneeg Iziv hu ua Hankas,

²ces Xalais txawm has rua Anplaas tas, “Tug TSWV tseem tsi tau pub kuv muaj mivnyuas. Koj ca le moog nrug kuv tug ntxhais qhev pw, tej zag nwg yuav muaj taug mivnyuas rua kuv.” Anplaas pum zoo ua lawv le Xalais has ntawd.

³Yog le ntawd, Xalais txhaj muab Hankas rua Anplaas ua nam yau. (Qhov nuav yog tom qaab kws Anplaas tub lug nyob rua huv tebchaws Kana-aas tau kaum xyoo lawm.)

⁴Anplaas moog nrug Hankas pw, ces Hankas txawm xeeb tub. Thaus Hankas paub tas nwg xeeb tub lawm, nwg txawm khaavtheeb heev hab saib tsi taug Xalais.

⁵Ces Xalais has rua Anplaas has tas, “Tub yog vim koj ntaag Hankas txhaj le saib tsi taug kuv. Kuv yog tug kws muab nwg rua koj, tabsis txij thaus nwg paub has tas nwg xeeb tub lawm, nwg txawm ca le saib tsi taug kuv. Thov kuas tug TSWV txav txim rua wb, saib yog koj ua txhum lossis yog kuv ua txhum!”

⁶Anplaas teb has tas, “Nwg yog koj tug ntxhais qhev kws koj tswjfwm, koj ca le ua rua nwg lawv le koj pum zoo.” Ces Xalais txhaj le tsimtxom Hankas heev, Hankas txhaj le tsiv lawm.

⁷Tug TSWV tug timtswv lug ntsib Hankas rua ntawm ib tug dlej txhawv kws nyob huv taj suabpuam ntawm txujkev kws moog rua huv lub nroog Sules

⁸hab nug has tas, “Hankas kws yog Xalais tug ntxhais qhev, koj tuaj dlaabtsi ntawm nuav hab koj yuav moog qhov twg?” Hankas teb has tas, “Tub yog kuv tsiv Xalais kws yog kuv tug tswv.”

⁹Tug timtswv has tas, “Koj ca le rov qaab moog cuag Xalais, hab ua nwg tug ntxhais qhev xwb.”

¹⁰Ces tug timtswv rov has ntxiv tas “Kuv yuav pub rua koj muaj xeebntxwv coob heev, kuas tsi muaj leejtwg yuav suav txheeb le.

¹¹Koj yuav yug tau ib tug tub, hab koj yuav tis nwg lub npe hu ua Yisamayees, rua qhov tug TSWV tub nov koj lub suab quaj vim koj txujkev txomnyem sab lawm.

¹²Tabsis koj tug tub yuav ua lub neej le tug neeg luav qus, nwg yuav tawmtsaam txhua leej txhua tug, hab txhua leej txhua tug yuav tawmtsaam nwg. Nwg yuav ua tuabneeg twmzeej tsi nrug kwvtij nyob ua ke.”

¹³Hankas xaav has tas, “Puas yog kuv pum Vaajtswv tag, hab kuv tseem muaj sa nyob qha txug zaaj nuav?” Yog le ntawd, nwg txhaj tis npe rua tug TSWV kws nrug nwg has lug ntawd tas, “Tug TSWV kws Pum.”

¹⁴Vim le ntawd tuabneeg txhaj hu lub qhov tshij kws nyob nruab nraab ntawm Kades hab Npeledis has tas, “Tug kws Pum Kuv hab tug kws Muaj Sa Nyob lub Qhov Tshij.”

¹⁵Hankas yug tau ib tug tub rua Anplaas, hab Anplaas tis tug tub ntawd lub npe hu ua Yisamayees.

¹⁶Lub sijhawm ntawd Anplaas noobnyoog muaj yim caum rau xyoo.