Read Hmong Njua Chivkeeb 18 Bible Online

Chivkeeb 18 - Hmong Njua bible

Chivkeeb 18

¹Tug TSWV lug tshwm rua Anplahaas pum ntawm cov ntoo xeeb huv thaaj chaw Maales. Nub ntawd tshaav ntuj kub heev nwg txhaj tawm tuaj nyob ntawm nwg lub qhovrooj tsevntaub,

²nwg tsaa qhovmuag saib pum peb tug txivneej sawv nreg nreeg tod. Thaus nwg pum dlheev puab, nwg txawm sawv tseeg moog cuag puab. Nwg txhus caug ndlua nyo ua ntsejmuag ti nkaus aav,

³nwg has tas, “Kuv tug tswv, yog mej txaus sab rua kuv, thov tsi xob dlhau ntawm mej tug tubkhai nuav moog; kuv nyob ntawm nuav yuav tu mej.

⁴Ca kuv moog nqaa mivntsiv dlej tuaj rua mej ntxuav kutaw tsaiv, thov mej su huv qaab tsob ntoo nuav kuas lug sav.

⁵Kuv tseem yuav moog nqaa mivntsiv zaub mov tuaj rua mej noj, mej txhaj yuav muaj zug taug kev moog ntxiv. Mej tub tuaj txug ntawm kuv tsev nuav lawm, thov ca kuv tu mej tsaiv.” Puab teb has tas, “Koj ca le moog ua lawv le koj has.”

⁶Anplahaas maaj ceev nrooj rov moog rua huv tsevntaub hab has rua Xalas has tas, “Kawgkag, koj ca le moog muab ib naab moov nplej kws zoo tshaaj plawg, lug puab ua ncuav hab muab cub.”

⁷Ces Anplahaas txawm dlha loo moog rua nraag paab tsaj hab nteg tau ib tug mivnyuas nyuj tseem mog hab rog rog, coj lug rua ib tug tubkhai, kuas nwg muab tua hab ua kawgkag kuas sav.

⁸Nwg txhaj muab mivntsiv roj mig nyuj qhuav, mivntsiv kua mig nyuj, hab cov nqaj kws hau tau sav lawm, coj moog rau kag rua ntawm cov txivneej ntawd xubndlag. Anplahaas rau zaub rau mov rua puab noj huv qaab tsob ntoo ntawd.

⁹Ces puab nug Anplahaas has tas, “Xalas kws yog koj tug quaspuj nyob qhov twg?” Anplahaas teb has tas, “Xalas nyob huv tsevntaub.”

¹⁰Puab cov ntawd muaj ib tug has rua Anplahaas has tas, “Cuaj hlis tom ntej nuav kuv yuav rov qaab tuaj dlua, hab Xalas kws yog koj tug quaspuj yuav yug tau ib tug mivtub.” Xalas sawv saab huv lub qhovrooj tsevntaub kws ncaaj ntawm Anplahaas nrausqaum, noog puab sis thaam.

¹¹Anplahaas hab Xalas tub laug heev lawm, hab Xalas tub tseg tsi coj khaub dluag le lawm.

¹²Yog le ntawd, Xalas txhaj luag tuabywv hab xaav has tas, “Nwgnuav kuv laug heev hab tub dlhau noobnyoog muaj mivnyuas lawm, kuv tseem yuav muaj taug kev zoo sab hab los? Kuv tug quasyawg los kuj laug lawm hab.”

¹³Ces tug TSWV nug Anplahaas has tas, “Vim le caag Xalas luag hab has tas, ‘Kuv laug npaum le nuav lawm, kuv tseem yuav muaj taug mivnyuas hab los?’

¹⁴Tug TSWV yeej ua tau ib puas tsaav yaam huv tuabsi, lawv le kuv tau has lawm, cuaj hlis tom ntej nuav kuv yuav rov tuaj dlua, hab Xalas yeej yuav yug tau ib tug mivtub.”

¹⁵Xalas ntshai heev, nwg txhaj tsi leeg has tas nwg tau luag, nwg has tas, “Kuv tsi tau luag as.” Tug TSWV teb has tas, “Tseeb tag, koj tub luag tuabywv huv sab lawm.”

¹⁶Tom qaab ntawd peb tug txivneej txawm sawv kev moog rua ntawm ib qhov chaw kws ntxim puab yuav saib pum lub nroog Xaudoos, Anplahaas txawm xaa puab sawv kev hab nrug puab moog.

¹⁷Hab tug TSWV xaav has tas, “Kuv yuav tsi zais tej kws kuv taabtom yuav ua ntawd rua Anplahaas.

¹⁸Nwg cov xeebntxwv yuav tau ua ib tsaav tuabneeg tseemceeb hab muaj fwjchim heev, hab kuv yuav foom koob moov ntawm nwg moog rua txhua tsaav tuabneeg kws nyob thoob nplajteb.

¹⁹Kuv tau xaiv nwg kuas nwg yuavtsum qha nwg cov tub hab cov xeebntxwv kuas noog kuv lug, ua zoo hab ua ncaaj ua nceeg. Yog puab ua le ntawd, mas kuv yuav ua txhua yaam rua nwg lawv le kuv tau coglug tseg ca lawm.”

²⁰Ces tug TSWV has rua Anplahaas has tas, “Muaj lug tsi zoo tuaj tawmtsaam lub nroog Xaudoos hab lub nroog Kaumaulas, ob lub nroog ntawd tej kev txhum luj kawg le.

²¹Kuv txhaj lug saib, saib puas muaj tseeb lawv le tej lug kws kuv nov ntawd.”

²²Ces ob tug txivneej txawm sawv kev moog rua huv lub nroog Xaudoos lawm, tabsis tug TSWV tseem nrug Anplahaas nyob.

²³Anplahaas txaav zog moog ze rua ntawm tug TSWV hab nug has tas, “Koj yuav ua kuas cov tuabneeg tsi muaj txim nrug cov tuabneeg muaj txim raug kev puamtsuaj taag huv tuabsi los?

²⁴Yog muaj tsib caug leej kws yog tuabneeg ncaaj nceeg nyob huv lub nroog ntawd, koj puas yuav ua kuas lub nroog ntawd raug kev puamtsuaj? Koj txawm yuav tsi tseg lub nroog ntawd nyob kuas tsib caug leej kws ncaaj nceeg ntawd dlim los?

²⁵Tseeb tag, koj yeej tsi muab cov tuabneeg ncaaj nceeg tua nrug cov tuabneeg txhum ib zag le. Yog koj ua le ntawd, cov tuabneeg ncaaj nceeg yuav raug txim nrug cov tuabneeg txhum ua ke. Koj yeej yuav tsi ua le ntawd. Tug kws txav txim rua tej tuabneeg nplajteb taagnrho yeej yog tug kws txav txim ncaaj nceeg xwb.”

²⁶Tug TSWV teb has tas, “Yog kuv pum muaj txug tsib caug leej kws ncaaj nceeg nyob huv lub nroog Xaudoos, kuv yuav tseg tsi tua cov tuabneeg kws nyob huv lub nroog vim tsib caug leej kws ncaaj nceeg ntawd.”

²⁷Anplahaas rov has ntxiv tas, “Tug TSWV, thov koj zaam txim rua kuv qhov kws kuv muaj lub sab tawv rov has koj dlua ib zag ntxiv, tug TSWV, kuv yog tuabneeg xwb, tub tsi tsimnyog kuv has ib yaam dlaabtsi rua koj le.

²⁸Tabsis yog has tas muaj txug plaub caug tsib leeg kws ncaaj nceeg, yog tsi muaj txug tsib caug leej ne, koj yeej yuav ua kuas lub nroog ntawd puamtsuaj taag huv tuabsi, vim tu tsib leeg ntawd xwb los?” Tug TSWV teb has tas, “Yog kuv pum muaj plaub caug tsib leeg kws ncaaj nceeg nyob rua huv, kuv yuav tsi ua kuas lub nroog ntawd puamtsuaj.”

²⁹Anplahaas rov has dlua ntxiv has tas, “Yog muaj txug plaub caug leej nyob rua huv xwb ne?” Tug TSWV teb has tas, “Yog kuv pum muaj plaub caug leej nyob rua huv, kuv yuav tsi ua kuas lub nroog ntawd puamtsuaj.”

³⁰Anplahaas rov has dlua tas, “Tug TSWV, thov koj tsi xob chim, rua qhov kuv xaav rov has dlua. Yog has tas muaj txug peb caug leej nyob huv xwb ne, koj tsua yuav ua le caag rua?” Tug TSWV teb has tas, “Yog kuv pum muaj peb caug leej nyob rua huv, kuv yuav tsi ua kuas lub nroog puamtsuaj.”

³¹Anplahaas has tas, “Thov koj zaam txim rua kuv, rua qhov kuv muaj lub sab tawv rov thov koj dlua ib zag ntxiv. Yog has tas muaj neeg nkaum leej nyob rua huv xwb ne?” Tug TSWV teb has tas, “Yog kuv pum muaj neeg nkaum leej nyob rua huv, kuv yuav tsi ua kuas lub nroog puamtsuaj.”

³²Anplahaas has tas, “Tug TSWV, thov koj tsi xob chim lauj, kuv thov has ib zag ntxiv xwb. Yog has tas muaj kaum leej nyob rua huv xwb ne, koj tsua yuav ua le caag rua?” Tug TSWV teb has tas, “Yog kuv pum muaj kaum leej nyob rua huv, kuv yuav tsi ua kuas lub nroog puamtsuaj.”

³³Tom qaab kws tug TSWV nrug Anplahaas thaam taag lawm, nwg txawm sawv kev moog, hab Anplahaas txawm rov qaab lug tsev lawm.