Read Hmong Njua Chivkeeb 24 Bible Online

Chivkeeb 24 - Hmong Njua bible

Chivkeeb 24

¹Nwgnuav Anplahaas laug heev lawm, hab tug TSWV tau foom koob moov rua txhua yaam kws Anplahaas ua taag lug lawm.

²Anplahaas has rua nwg tug tubkhai kws laug dlua lwm tug, nwg yog tug saib taagnrho Anplahaas lub cuabtaam has tas, “Koj ca le muab koj txhais teg tso rua huv kuv ceg puabtais hab coglug rua kuv.

³Kuv xaav kuas koj coglug rua kuv ntawm tug TSWV kws yog Vaajtswv tug kaav lub ntuj hab lub nplajteb has tas, koj yuav tsi xaiv cov tuabneeg huv tebchaws Kana-aas nuav tej ntxhais lug rua kuv tug tub yuav ua quaspuj.

⁴Koj yuavtsum moog rua tim kuv lub qub teb qub chaw hab yuav kuv cov kwvtij ib tug ntxhais lug rua kuv tug tub Ixaj ua quaspuj.”

⁵Tabsis tug tubkhai nug has tas, “Yog has tas tug ntxhais tsi kaam nrug kuv lug rua tebchaws nuav, kuv yuav ua le caag? Yuav ca kuv coj koj tug tub moog nyob rua tim koj lub qub teb qub chaw los?”

⁶Anplahaas teb has tas, “Koj ncu ntsoov tsi xob coj kuv tug tub moog nyob rua tid le.

⁷Tug TSWV kws yog Vaajtswv tug kws nyob sau ntuj, tub coj kuv tawm huv kuv txiv lub tsev hab huv kuv cov kwvtij lub tebchaws lug, hab nwg yuav muab lub tebchaws nuav pub rua kuv cov xeebntxwv lawv le nwg tau coglug tseg rua kuv lawm. Nwg yuav tso nwg tug timtswv ua koj ntej moog, kuas koj moog nrhav tau quaspuj rua kuv tug tub.

⁸Yog tug ntxhais ntawd tsi kaam nrug koj lug, koj txhaj dlim ntawm kuv tej lug cog tseg nuav. Tabsis txwv tu nrho tsi pub koj coj kuv tug tub moog tid le.”

⁹Yog le ntawd, tug tubkhai txhaj muab nwg txhais teg tso rua huv Anplahaas kws yog nwg tug tswv ceg puabtais, hab coglug ua lawv le Anplahaas tau has rua nwg lawm.

¹⁰Tug tubkhai kws yog tug saib taagnrho Anplahaas lub cuabtaam, txhaj caab nwg tug tswv kaum tug ntxhuav thauj tej khoom muaj nqes, hab moog rua huv lub nroog kws Nahaus nyob peg tebchaws Mexuputamias saab qaumteb.

¹¹Thaus nwg moog txug peg lawm, nwg kuas cov ntxhuav txhus caug rua ntawm lub qhov tshij kws nyob rua ntawm saab ntug nroog. Thaus ntawd taabtom yuav tsaus ntuj, yog lub caij kws cov quaspuj tawm tuaj nqaa dlej.

¹²Nwg thov Vaajtswv has tas, “Tug TSWV kws yog kuv tug tswv Anplahaas tug Vaajtswv, thov koj paab kuv kuas kuv teg num tav nub nua, hab ua lawv le tej lug kws koj tau cog tseg rua kuv tug tswv lawm.

¹³Kuv taabtom nyob ntawm lub qhov tshij kws yog qhov chaw cov hluas nkauj huv lub nroog nuav tuaj nqaa dlej.

¹⁴Thaus kuv has rua cov hluas nkauj ntawd ib tug tas, ‘Thov txu koj lub hub dlej hab pub mivntsiv dlej rua kuv haus.’ Yog nwg teb has tas, ‘Haus mas, kuv tseem yuav ntaus dlej rua koj cov ntxhuav txhua tug haus hab,’ ces thov kuas tug ntawd yog tug kws koj xaiv rua koj tug tubkhai Ixaj ntaag. Yog qhov nuav tshwmsim, kuv txhaj yuav paub has tas, koj ua lawv le koj tau coglug tseg rua kuv tug tswv lawm tag.”

¹⁵Thaus kws tug tubkhai thov Vaajtswv tsi tau xaus, Lenpekas txawm kwv ib lub hub dlej sau xubpwg tuaj txug ndlua ntawd. Lenpekas yog Npethu-ees tug ntxhais, Npethu-ees yog Anplahaas tug kwv Nahaus hab Melikas obtug tug tub.

¹⁶Lenpekas yog ib tug ntxhais kws zoo nkauj heev, hab nwg tseem yog nkaujxwb. Lenpekas txhaj nqeg moog rua nraag lub qhov tshij, ntaus dlej puv nkaus rua huv nwg lub hub, hab rov qaab lug.

¹⁷Tug tubkhai txhaj dlha loo moog cuag Lenpekas hab has tas, “Kuv thov haus koj cov dlej mivntsiv.”

¹⁸Lenpekas teb has tas, “Kuv tug tswv, koj ca le haus,” Lenpekas txhaj txu plhuav lub hub sau nwg xubpwg lug tuav rua tug tubkhai ntawd haus.

¹⁹Thaus nwg haus taag lawm, Lenpekas has tas, “Kuv yuav ntaus dlej lug rua koj cov ntxhuav haus kuas txaus.”

²⁰Nwg muab lub hub laub kag rua huv dlaab dlej rua cov tsaj ntawd haus taagnrho hab rov loo moog ntaus dlej lug ntxiv rua, nwg ua le ntawd rua tug tubkhai cov ntxhuav tau dlej haus txhua tug le.

²¹Anplahaas tug tubkhai sawv ib caag saib, saib puas yog tug TSWV pub kuas nwg teg num tav los tsi yog.

²²Thaus kws Lenpekas ntaus dlej rua cov ntxhuav haus txaus lawm, tug tubkhai ntawd txhaj muab tau ib lub kauj ntswg kub nyaav ob txag hab ntaus nqe ntau heev, lug khawm rua Lenpekas qhovntswg hab muab ob lub paugteg kub nyaav kaum txaj rua Lenpekas coj ntawm ncej npaab.

²³Tug tubkhai txawm nug has tas, “Thov qha rua kuv saib koj txiv yog leejtwg. Huv nwg lub tsev puas muaj chaw txaus rua kuv cov tuabneeg hab kuv moog su mo nuav?”

²⁴Lenpekas teb has tas, “Kuv txiv yog Npethuyees kws yog Nahaus hab Milekas obtug tug tub ntaag.

²⁵Tom peb tsev muaj quavnyaab hab nyom qhuav ntau, hab nyob tod muaj chaw rua koj su huv tuabsi.”

²⁶Ces tug tubkhai ntawd txawm txhus caug ndlua hab pehawm tug TSWV.

²⁷Nwg has tas, “Ua tug TSWV kws yog kuv tug tswv Anplahaas tug Vaajtswv tsaug, Vaajtswv yog tug ncaaj nceeg hab ua lawv le nwg tau coglug tseg rua kuv tug tswv lawm tag. Tug TSWV yeej coj kuv kev ncaaj nraim tuaj rua ntawm kuv tug tswv cov kwvtij.”

²⁸Tug ntxhais ntawd txhaj rov qaab moog tsev hab pav zaaj nuav qha rua nwg nam hab nwg tsev tuabneeg noog.

²⁹Lenpekas muaj ib tug nug hu ua Lanpaas. Ces Lanpaas txawm tawm plawg rua nrau zoov hab dlha ncaaj nraim moog rua tom lub qhov tshij kws Anplahaas tug tubkhai nyob.

³⁰Thaus Lanpaas pum lub kauj ntswg hab ob lub paugteg kws nwg tug muam coj hab nov tej lug kws Lenpekas pav qha rua leej nam has tas, yog tug txivneej ntawd has rua nwg, Lanpaas txhaj le moog cuag Anplahaas tug tubkhai kws sawv nrug nwg cov ntxhuav nyob ze ntawm lub qhov tshij,

³¹hab has tas, “Koj ca le nrug kuv moog tom tsev. Koj yog tug kws tau txais tug TSWV txuj koob moov lawm. Vim le caag koj tseem yuav sawv ntawm nuav ua dlaabtsi? Kuv tub tu tau txaaj chaw rua koj su tom kuv tsev, hab nyob tod yeej muaj chaw rua koj cov ntxhuav huv tuabsi.”

³²Yog le ntawd, tug tubkhai ntawd txhaj moog rua tom Lanpaas tsev, hab Lanpaas txhaj tsaws tej nraa ntxhuav ca, muab quavnyaab hab nyom qhuav rua cov ntxhuav noj. Ces nwg nqaa dlej lug rua Anplahaas tug tubkhai hab nwg cov tuabneeg ntxuav kutaw.

³³Thaus rau tau mo lawm, tug tubkhai ntawd has tas, “Kuv yuav tsi noj pluag mo nuav moog txug thaus kuv has taag tej lug kws kuv yuav has rua koj tsaiv.” Lanpaas teb has tas, “Koj muaj lug dlaabtsi los ca le has.”

³⁴Nwg teb has tas, “Kuv yog Anplahaas tug tubkhai.

³⁵Tug TSWV foom koob moov ntau kawg nkaus rua kuv tug tswv hab nwg yog ib tug tuabneeg npluanuj heev. Tug TSWV pub rua kuv tug tswv muaj yaaj, muaj tshis, muaj nyuj, muaj nyaj, muaj kub, muaj tubqhe hab ntxhais qhev, muaj ntxhuav hab muaj neeg luav coob kawg le.

³⁶Xalas kws yog kuv tug tswv tug quaspuj tub laug heev lawm los nwg tseem yug tau ib tug tub rua kuv tug tswv hab, mas kuv tug tswv muab taagnrho nwg lub cuabtaam rua tug tub ntawd.

³⁷Kuv tug tswv kuas kuv coglug has tas kuv yuavtsum noog nwg tej lug saamfwm. Nwg has tas, ‘Tsi xob moog yuav cov tuabneeg kws nyob huv tebchaws Kana-aas nuav tej ntxhais lug rua kuv tug tub ua quaspuj hlo le.

³⁸Koj ca le moog lawm tim kuv txiv tsev tuabneeg, moog cuag kuv cov kwvtij, hab xaiv ib tug quaspuj lug rua kuv tug tub Ixaj yuav.’

³⁹Hab kuv nug kuv tug tswv has tas, ‘Yog tug ntxhais tsi kaam nrug kuv lug nua, kuv yuav ua le caag?’

⁴⁰Nwg teb has tas, ‘Tug TSWV kws kuv yeej ibtxwm noog nwg lug, yuav tso ib tug timtswv nrug koj moog hab yuav ua kuas koj teg num tav. Koj yuav moog yuav tau kuv txiv tsev tuabneeg ib tug ntxhais lug rua kuv tug tub ua quaspuj.

⁴¹Tsuas yog muaj tuab qho ua rua koj dlim ntawm kuv lu lug cog tseg xwb, yog koj moog has kuv cov kwvtij tsi kaam, ces koj txhaj yuav dlim ntawm kuv cov lug cog tseg nuav.’

⁴²“Nub nua thaus kuv tuaj txug rua ntawm lub qhov tshij, kuv thov Vaajtswv has tas, ‘Tug TSWV kws yog kuv tug tswv Anplahaas tug Vaajtswv, thov koj paab kuas teg num kws kuv tuaj ua nuav tav.

⁴³Kuv nyob ntawm lub qhov tshij nuav. Thaus ib tug hluas nkauj tawm tuaj kwv dlej, kuv yuav thov kuas nwg muab dlej huv nwg lub hub pub rua kuv haus.

⁴⁴Yog nwg txaus sab muab rua kuv haus hab nwg tseem moog ntaus dlej lug pub rua kuv cov ntxhuav haus huv tuabsi, ces thov kuas nwg yog tug kws koj xaiv rua kuv tug tswv tug tub yuav ua quaspuj ntaag.’

⁴⁵Thaus kuv tseem thov Vaajtswv tuabywv huv kuv lub sab tsi tau taag, kuv txawm pum Lenpekas kwv ib lub hub sau nwg xubpwg hab nqeg moog ntaus dlej huv lub qhov tshij. Kuv txhaj has rua nwg has tas, ‘Thov pub mivntsiv dlej rua kuv haus.’

⁴⁶Nwg txhaj txu kag nwg hub dlej sau xubpwg lug hab has tas, ‘Haus mas, kuv tseem yuav ntaus dlej rua koj cov ntxhuav haus huv tuabsi hab.’ Yog le ntawd, kuv txhaj tau haus, hab nwg ntaus dlej pub rua kuv cov ntxhuav haus huv tuabsi.

⁴⁷Kuv nug nwg has tas, ‘Koj txiv yog leejtwg?’ Hab nwg teb has tas, ‘Kuv txiv yog Npethuyees kws yog Nahaus hab Milekas obtug tug tub.’ Kuv txhaj muab lub kauj ntswg kub khawm nwg qhovntswg hab muab ob lub paugteg rua nwg coj ntawm nwg ncej npaab.

⁴⁸Kuv txhaj txhus caug ndlua pehawm hab ua tug TSWV kws yog kuv tug tswv Anplahaas tug Vaajtswv tsaug, nwg yog tug kws coj kuv kev ncaaj nraim tuaj rua ntawm kuv tug tswv cov kwvtij, yog qhov chaw kws kuv tuaj nrhav tau tug txhais rua kuv tug tswv tug tub.

⁴⁹Nwgnuav yog mej zoo sab hab ua ncaaj rua kuv tug tswv, ces thov qha rua kuv paub, yog tsi tau los thov qha rua kuv paub, kuas kuv txhaj paub txav txim sab has tas yuav ua le caag.”

⁵⁰Lanpaas hab Npethuyees teb has tas, “Qhov nuav yeej yog Vaajtswv pum zoo lawm, peb tsi pum qaab yuav has tau le caag rua koj.

⁵¹Lenpekas nyob ntawd, koj ca le coj nwg moog. Ca nwg ua koj tug tswv tug tub tug quaspuj lawv le tug TSWV tau has tseg ca lawm.”

⁵²Thaus Anplahaas tug tubkhai nov tej lug nuav lawm, nwg txhus caug ndlua pehawm tug TSWV.

⁵³Ces nwg txawm muab tej rig tsho, tej nyaj hab tej saw kub lug rua Lenpekas. Hab nwg tseem muab tau tej khoom pub kws muaj nqes heev rua Lenpekas tug nug hab muab rua nwg nam.

⁵⁴Ces Anplahaas tug tubkhai hab cov tuabneeg kws nrug nwg tuaj, txawm noj haus hab pw ib mos qhov ntawd. Taagkig kaaj ntug, tug tubkhai has tas, “Thov tso kuv rov qaab moog cuag kuv tug tswv.”

⁵⁵Tabsis Lenpekas tug nug hab nwg nam teb has tas, “Thov ca tug ntxhais nrug peb nyob xyaa yim nub lossis kaum nub ntxiv tsaiv, nwg maam nrug mej moog.”

⁵⁶Tabsis tug tubkhai teb has tas, “Mej tsi xob cheem kuv nyob. Tug TSWV tub ua rua kuv teg num kws kuv taug kev tuaj nuav tav taag lawm, thov tso kuv rov moog cuag kuv tug tswv.”

⁵⁷Obtug teb has tas, “Ca peb hu tug ntxhais lug nug saib nwg has le caag.”

⁵⁸Yog le ntawd, obtug txawm hu Lenpekas lug nug has tas, “Koj puas zoo sab nrug tug txivneej nuav moog?” Lenpekas teb has tas, “Kuv yuav moog.”

⁵⁹Yog le ntawd, obtug txhaj le tso Lenpekas hab tug ntxhais qhev laug kws ibtxwm tu Lenpekas nrug Anplahaas tug tubkhai hab nwg cov tuabneeg moog.

⁶⁰Ces puab txawm foom koob moov rua Lenpekas le nuav: “Tug muam, thov kuas koj muaj tub muaj ki ntau txheeb ntau vaam leej; Thov kuas koj cov xeebntxwv txeeb tau puab cov yeebncuab tej nroog!”

⁶¹Ces Lenpekas hab nwg cov ntxhais qhev txhaj caij ntxhuav nrug Anplahaas tug tubkhai, sawv kev moog tsev lawm.

⁶²Ixaj taabtom tuaj txug ntawm lub taj suabpuam ntawm “Lub Qhov Tshij Kws Yog Tug Muaj Sa Nyob Hab Tug Pum Kuv” hab nwg tuaj nyob rua huv tebchaws Kana-aas saab qaabteb.

⁶³Thaus yuav tsaus ntuj Ixaj txawm tawm moog ncig ua si tom teb hab nwg pum ib paab ntxhuav taug kev lug.

⁶⁴Thaus Lenpekas pum dlheev Ixaj, nwg txawm nqeg sau nwg tug ntxhuav nrausqaum lug,

⁶⁵hab nug Anplahaas tug tubkhai has tas, “Tug txivneej kws taabtom taug kev tuaj rua ntawm peb nuav yog leejtwg?” Tug tubkhai teb has tas, “Nwg yog kuv tug tswv ntaag.” Yog le ntawd, Lenpekas txawm muab phuam lug npug nwg lub ntsejmuag.

⁶⁶Tug tubkhai txhaj qha txhua yaam kws nwg moog ua tav taag lug rua Ixaj noog.

⁶⁷Ces Ixaj txhaj coj Lenpekas moog rua huv lub tsevntaub kws thaus Xalas kws yog nwg nam nyob, hab Lenpekas tau lug ua Ixaj tug quaspuj. Ixaj hlub Lenpekas heev, txawm yog nwg nam tuag lawm los nwg rov muaj kev kaaj sab tuaj.