Read Hmong Njua Chivkeeb 25 Bible Online

Chivkeeb 25 - Hmong Njua bible

Chivkeeb 25

¹Anplahaas yuav dlua ib tug quaspuj tshab, nwg lub npe hu ua Ketulas.

²Ketulas yug tau Xeelas, Yausaas, Medas, Midias, Isanpas hab Suas rua Anplahaas.

³Yausaas yog Senpas hab Dedaas obtug txiv, hab Dedaas cov xeebntxwv yog cov Asulees, cov Letusees hab cov Le-umees.

⁴Midias cov tub yog Efas, Efelas, Hanauj, Anpidas hab Eladas. Taagnrho cov nuav puavleej yog Ketulas cov xeebntxwv.

⁵Anplahaas tso txhua yaam kws yog nwg tej qubtxeeg qubteg rua Ixaj,

⁶tabsis thaus Anplahaas tseem ua neej nyob, nwg tub muab nwg lub cuabtaam ibtxha faib rua nwg ob tug nam yau tej tub lawm hab. Ces nwg txhaj muab cov tub nuav cais moog nyob rua saab nubtuaj, kuas nyob nrug dleb ntawm nwg tug tub Ixaj.

⁷Anplahaas ua neej nyob tau ib puas xyaa caum tsib xyoos.

⁸Anplahaas txawm tuag thaus nwg muaj noobnyoog laug lawm, nwg yog ib tug tuabneeg laug hab muaj noobnyoog nyob ntev heev; nwg maam tuag moog nrug nwg tej kwvtij hab nwg tej yawmkoob kws tub xub tuag lawm nyob.

⁹Nwg ob tug tub, Ixaj hab Yisamayees coj Anplahaas lub cev moog log rua huv lub Qhov tsua Makepelas kws nyob ze rua ntawm Maales saab nubtuaj, huv Xauhas tug tub Efaloos kws yog tuabneeg Hitis thaaj teb.

¹⁰Yaav nraag ntej Anplahaas tub yuav thaaj teb nuav lug ntawm cov tuabneeg Hitis lawm, puab txhaj kwv Anplahaas moog log nrug Xalas kws yog nwg tug quaspuj ua ke rua huv.

¹¹Tom qaab kws Anplahaas tuag lawm, Vaajtswv tau foom koob moov rua nwg tug tub Ixaj. Thaus ntawd Ixaj nyob ze ntawm “Lub Qhov Tshij Kws Yog Tug Muaj Sa Nyob Hab Tug Pum Kuv.”

¹²Ntawm nuav yog has txug Anplahaas tug tub Yisamayees caajceg kws yog Xalas tug ntxhais qhev Hankas kws yog tuabneeg Iziv yug rua Anplahaas.

¹³Yisamayees muaj kaum ob tug tub, hab teev puab tej npe ib tug zuj zug kws yog pib tug tub hlub moog txug tug tub ntxawg muaj lawv le nuav: Nenpayaus, Kedas, Anpees, Mixames,

¹⁴Misemas, Dumas, Maxas,

¹⁵Hadas, Temas, Yetus, Nafises hab Kedemas.

¹⁶Puab yog yawmkoob ntawm kaum ob xeem tuabneeg, hab puab muab puab tej zog hab tej chaw nyob tis npe lawv le puab tej npe.

¹⁷Yisamayees muaj noobnyoog ib puas peb caug xyaa xyoo rua thaus nwg tuag moog nrug nwg tej kwvtij, tej yawmkoob kws tub xub tuag ua ntej lawm nyob.

¹⁸Yisamayees cov xeebntxwv nyob rua huv cheebtsaam nruab nraab ntawm Havilas hab Sules kws ze tebchaws Iziv saab nubtuaj ntawm txujkev moog rua peg tebchaws Axilias. Puab nyob puab rua ib qho tsi xyaw puab cov kwvtij kws yog Anplahaas cov xeebntxwv.

¹⁹Ntawm nuav yog has txug Anplahaas tug tub Ixaj lub neej.

²⁰Ixaj noobnyoog muaj plaub caug xyoo rua thaus nwg yuav Lanpaas tug muam Lenpekas kws yog Npethuyees tug ntxhais lug ua quaspuj. Npethuyees yog tuabneeg Alamees kws nyob peg tebchaws Mexuputamias.

²¹Vim Lenpekas yeej ibtxwm xeeb tsi taug tub le, Ixaj txhaj thov tug TSWV pub mivnyuas rua Lenpekas. Tug TSWV txhaj teb Ixaj tej lug thov, hab Lenpekas txawm xeeb tub lawm.

²²Lenpekas suab ob tug mivnyuas ntxaib. Thaus tseem tsi tau yug, obtug ib leeg tub tuam ib leeg huv leej nam plaab lawm. Lenpekas txhaj has tas, “Vim le caag muaj tej yaam xwmtxheej zoo le nuav rua kuv?” Yog le ntawd, nwg txhaj nug tug TSWV saib yog vim le caag.

²³Tug TSWV has rua Lenpekas tas, “Muaj ob tsaav tuabneeg nyob huv koj plaab; Koj yuav yug tau ob tsaav tuabneeg kws yuav sis tawmtsaam. Ib tug yuav muaj zug tshaaj ib tug, tug tij yuav ua tug kwv qhev.”

²⁴Thaus txug caij yug lawm, Lenpekas txhaj yug tau ob tug tub ntxaib.

²⁵Thawj tug tub nqaj tawv lab, hab tuaj plaub nplwg loo zoo le lub tsho ntev kws muab tej plaub tsaj ua. Yog le ntawd, txhaj tis nwg lub npe hu ua Exaus.

²⁶Thaus kws yug tau tug kwv, tug kwv tuav rawv Exaus lub laujtaws. Yog le ntawd, txhaj tis nwg lub npe hu ua Yakhauj. Ixaj noobnyoog muaj rau caum xyoo rua thaus kws Lenpekas yug tau ob tug tub ntxaib ntawd.

²⁷Thaus ob tug tub ntawd luj hlub tav hluas lawm, Exaus yog ib tug kws txawj tua nqaj, nwg yog ib tug tuabneeg nyam plhob haav zoov heev, tabsis Yakhauj yog ib tug tuabneeg ncauj lug tsawg hab nwg nyam nyob huv tsev xwb.

²⁸Ixaj nyam Exaus dlua, rua qhov Ixaj nyam noj tej nqaj tsaj qus kws Exaus moog plhob tua tau lug, tabsis Lenpekas nyam Yakhauj dlua.

²⁹Muaj ib nub thaus Yakhauj taabtom hau mivntsiv taum rua huv qhovcub, Exaus moog plhob tua nqaj lug txug. Nwg tshaib plaab heev

³⁰hab nwg has rua Yakhauj tas, “Kuv tshaib plaab heev lawm, thov muab koj laujkaub taum lab mivntsiv pub rua kuv noj.” (Tub yog vim le ntawd txhaj muab nwg tis npe hu ua Edoos.)

³¹Yakhauj teb has tas, “Yog koj muab koj lub meejmom kws yog tijlaug rua kuv, kuv txhaj yuav pub rua koj noj.”

³²Exaus teb has tas, “Ua le los mas! Kuv tub yuav tuag tshaib ntawm nuav, lub nyuas meejmom ua tij yuav muaj qaabhau dlaabtsi rua kuv?”

³³Yakhauj teb has tas, “Koj yuavtsum xub coglug ua ntej rua kuv has tas, koj yuavtsum muab lub meejmom ua tij ntawd rua kuv tsaiv.” Exaus txhaj coglug tseg hab muab nwg lub meejmom ua tijlaug rua Yakhauj.

³⁴Ces Yakhauj txawm muab mivntsiv ncuav hab mivntsiv taum rua Exaus. Thaus nwg noj taag, ces nwg txawm sawv moog lawm. Qhov ntawd tub yog Exaus ua saib tsi taug nwg lub meejmom tijlaug.