Read Hmong Njua Chivkeeb 28 Bible Online

Chivkeeb 28 - Hmong Njua bible

Chivkeeb 28

¹Ixaj txhaj hu Yakhauj lug cuag nwg, foom koob moov rua nwg, hab has rua nwg tas, “Mivtub, koj tsi xob laam yuav cov tuabneeg Kana-aas nuav tej ntxhais.

²Ca le moog lawm tim koj yawm Npethuyees tsev kws nyob tim tebchaws Mexuputamias, hab moog yuav cov ntxhais tid ib tug lug ua koj quaspuj, yuav koj txivdlaab Lanpaas cov ntxhais ib tug ntaag.

³Thov Vaajtswv tug muaj fwjchim luj kawg nkaus foom koob moov rua koj hab pub koj muaj tubki coob, kuas koj tau ua ntau tsaav tuabneeg tug yawmkoob.

⁴Thov kuas nwg foom koob moov rua koj hab koj tej xeebntxwv ib yaam le nwg foom koob moov rua Anplahaas, hab thov kuas koj tau thaaj aav kws Vaajtswv muab pub rua Anplahaas kws koj tau lug nyob nuav lawm ua koj tug.”

⁵Ixaj txhaj tso Yakhauj moog rua tim tebchaws Mexuputamias, moog nrug Lanpaas kws yog Npethuyees kws yog tuabneeg Alamees tug tub kws yog Yakhauj hab Exaus obtug nam Lenpekas tug nug hlub nyob.

⁶Exaus paub has tas, Ixaj foom koob moov rua Yakhauj hab saamfwm tsi pub kuas nwg yuav cov tuabneeg Kana-aas tej ntxhais lug ua quaspuj, hab tso nwg moog nrhav yuav quaspuj rua tim tebchaws Mexuputamias lawm.

⁷Exaus paub has tas Yakhauj yeej noog nam noog txiv lug hab nwg tau moog rua tim tebchaws Mexuputamias lawm tag.

⁸Ces Exaus txhaj paub has tas, nwg txiv Ixaj tsi nyam cov quaspuj kws yog tuabneeg Kana-aas.

⁹Yog le ntawd, nwg txhaj moog yuav Anplahaas tug tub Yisamayees tug ntxhais Mahalas kws yog Nenpayaus tug muam lug ua quaspuj.

¹⁰Yakhauj sawv kev ntawm lub nroog Npesenpas moog rua tim lub nroog Halaas.

¹¹Nwg moog txug ntawm ib thaaj chaw nub poob qho lawm, nwg txhaj pw ib mos ntawm ib tog kev. Nwg muab ib lub pobzeb lug rau ncoo pw tsaug zug.

¹²Nwg ua npau suav pum ib tug ntaiv tuam huv aav nuav moog nto plawg sau ntuj, muaj cov timtswv nce moog hab nqeg lug ntawm tug ntaiv ntawd.

¹³Ua cav txawm pum tug TSWV sawv nreg nreeg ntawm nwg ib saab. Tug TSWV has tas, “Kuv yog Anplahaas hab Ixaj tug Vaajtswv, kuv yuav muab thaaj aav kws koj taabtom pw ntawm ko pub rua koj hab koj cov xeebntxwv ua mej tug.

¹⁴Koj cov xeebntxwv yuav coob npaum nkaus le cov moov aav huv nplajteb nuav. Puab yuav nthuav puab lub tebchaws kuas dlaav moog rua txhua faab, hab kuv yuav foom koob moov ntawm koj hab koj cov xeebntxwv moog rua txhua tsaav tuabneeg kws nyob thoob nplajteb.

¹⁵Ncu ntsoov has tas kuv yuav nrug nraim koj hab tsomkwm koj txhua qhov chaw kws koj moog, hab kuv yuav coj koj rov lug nyob rua ntawm thaaj aav nuav dlua. Kuv yuav nrug nraim koj moog txug thaus kuv ua txhua yaam tav taag lawv le kuv tau coglug rua koj lawm.”

¹⁶Yakhauj tsim dlheev lug hab nwg has tas, “Tug TSWV yeej nyob ntawm nuav tag lauj! Nwg yeej nyob ntawm thaaj chaw nuav, tabsis yog kuv tsi paub xwb!”

¹⁷Nwg ntshai heev hab nwg has tas, “Qhov chaw nuav ua rua kuv ntshai heev! Lub chaw nuav yeej yog Vaajtswv lub tsev hab yog rooj ntug ceebtsheej ntaag lauj.”

¹⁸Taagkig kaaj ntug Yakhauj txhaj muab lub pobzeb kws nwg muab lug rau ncoo ntawd teeb ua qhov chaw tseemceeb ncu tseg. Ces nwg muab roj txiv ntoo laub rua sau lub pobzeb hab muab fij rua Vaajtswv.

¹⁹Nwg txhaj tis npe rua thaaj chaw ntawd hu ua Npethees (Lub nroog ntawd thaus u hu ua Lexes.)

²⁰Yakhauj txawm coglug rua tug TSWV has tas, “Yog koj nrug nraim kuv nyob hab tsomkwm kuv taug kev moog, pub mov rua kuv noj hab rig tsho rua kuv naav,

²¹moog txug thaus kuv rov qaab lug txug rua huv kuv txiv tsev kaaj sab lug, mas koj txhaj yog kuv tug Vaajtswv tag.

²²Lub pobzeb kws kuv teeb ua chaw ncu txug nuav yuav yog qhov chaw pehawm koj ntaag, hab kuv yuav muab txhua yaam kws koj muab rua kuv lawm ib feem kaum rua koj.”