Read Hmong Njua Chivkeeb 29 Bible Online

Chivkeeb 29 - Hmong Njua bible

Chivkeeb 29

¹Yakhauj txawm rau sab ntso taug kev moog txug rua huv cov tuabneeg kws nyob saab nubtuaj lub tebchaws.

²Taamsim ntawd, nwg saib dlheev pum ib lub qhov tshij nyob huv dlaim teb, hab muaj peb paab yaaj pw pawg lug ncig lub qhov tshij ntawd. Cov yaaj ntawd yeej haus dlej huv lub qhov tshij nuav, luas muab ib dlaim txag zeb luj heev npug lub qhov tshij ntawd.

³Lawv le ibtxwm luas tog thaus cov yaaj lug txhij rua ntawm lub qhov tshij lawm, mas cov tuabneeg yug yaaj maam le muab dlaim txag zeb ntawd tshem tawm hab cug dlej rua cov yaaj haus. Ces puab maam le muab dlaim txag zeb rov lug npug lub qhov tshij dlua.

⁴Yakhauj nug cov tuabneeg yug yaaj has tas, “Kuv cov phoojywg, mej tuaj qhov twg tuaj?” Puab teb has tas, “Peb tuaj tom lub nroog Halaas tuaj.”

⁵Yakhauj rov nug dlua has tas, “Mej puas paub Lanpaas kws yog Nahaus tug tub?” Puab teb has tas, “Peb paub nwg hab.”

⁶Yakhauj rov nug has tas, “Nwg puas noj qaab nyob zoo?” Puab teb has tas, “Nwg noj qaab nyob zoo hab, koj saib tid maj, nwg tug ntxhais Laxees taabtom taav nwg paab yaaj tuaj txug tid.”

⁷Yakhauj has tas, “Taamsim nuav tseem ntxuv heev tsi tau txug lub caij kws taav tej tsaj moog tsev, ua caag mej tsi cug dlej rua mej cov tsaj haus hab coj rov moog noj zaub dlua?”

⁸Puab teb has tas, “Peb tsi ua le ntawd, tog txug thaus cov tsaj lug txhij rua ntawm nuav tsaiv, peb maam muab dlaim txag zeb tshem tawm hab cug dlej rua cov tsaj haus.”

⁹Thaus Yakhauj taabtom nrug puab thaam, Laxees txawm taav nwg txiv paab yaaj lug txug ndlua ntawd hab.

¹⁰Thaus Yakhauj pum Laxees coj Yakhauj txivdlaab Lanpaas paab yaaj lug txug ndlua ntawd lawm, Yakhauj txawm moog rua ntawm lub qhov tshij, muab dlaim txag zeb tshem tawm, hab ntaus dlej rua cov yaaj haus.

¹¹Nwg nwj kag Laxees hab quaj zoo sab heev.

¹²Nwg has rua Laxees has tas, “Kuv yog Lenpekas tug tub, kuv nam hab koj txiv yog muagnug ntaag.” Laxees txhaj dlha moog qha rua nwg txiv,

¹³hab thaus Lanpaas nov has tas nwg tug muam tug tub Yakhauj tuaj, nwg txawm dlha loo moog tog Yakhauj, hab coj Yakhauj lug tsev. Yakhauj qha txhua yaam rua Lanpaas noog,

¹⁴Lanpaas has rua Yakhauj has tas, “Tseeb lawm lauj, koj yeej yog kuv nqaj tawv hab roj ntshaav tag.” Yakhauj nrug Lanpaas nyob tau ib hlis nkaus.

¹⁵Lanpaas has rua Yakhauj has tas, “Koj hab kuv wb txawm yog txheeb ze los tsi tsimnyog koj yuav ua num pub dlawb rua kuv xwb. Koj xaav yuav nqe zug pistsawg?”

¹⁶Lanpaas muaj ob tug ntxhais, tug hlub hu ua Le-as, hab tug yau hu ua Laxees.

¹⁷Le-as tsi tshua zoo nkauj, tabsis Laxees zoo nkauj hab txaus nyam heev.

¹⁸Yakhauj nyam Laxees dlua, yog le ntawd, nwg txhaj has rua Lanpaas has tas, “Yog koj kaam kuv yuav Laxees ua quaspuj, kuv yuav ua num rua koj xyaa xyoo.”

¹⁹Lanpaas teb has tas, “Kuv zoo sab muab Laxees rua koj, zoo dlua le kuv muab rua lwm tug, koj ca le nrug kuv nyob ntawm nuav.”

²⁰Yakhauj txhaj ua num xyaa xyoo kuas tau Laxees ua quaspuj. Txawm yog sijhawm ntev npaum le ntawd los zoo le ob peb nyuas nub rua Yakhauj xwb, rua qhov nwg nyam Laxees heev.

²¹Ces Yakhauj has rua Lanpaas has tas, “Kuv tub ua num puv xyaa xyoo lawm, ca le muab Laxees rua kuv yuav.”

²²Yog le ntawd, Lanpaas txhaj ua ib rooj mov hab caw txhua tug tuaj nrug nwg noj tshoob.

²³Yog tag mas yuavtsum muab Laxees rua Yakhauj, tabsis mo ntawd Lanpaas muab Le-as moog rua Yakhauj, ces Yakhauj txhaj nrug Le-as pw.

²⁴(Lanpaas muab nwg tug ntxhais qhev Xilepas rua nwg tug ntxhais Le-as ua Le-as tug ntxhais qhev.)

²⁵Thaus kaaj ntug Yakhauj maam le paub has tas tug kws nrug nwg pw ntawd yog Le-as. Nwg txhaj moog has rua Lanpaas has tas, “Vim le caag koj txhaj ua le nuav rua kuv? Kuv ua num rua koj yog xaav yuav Laxees xwb. Vim le caag koj dlaag kuv?”

²⁶Lanpaas teb has tas, “Peb cov tuabneeg nyob tebchaws nuav, tsi muaj cai xub muab tug ntxhais yau qua ua ntej tug ntxhais hlub.

²⁷Tog xyaa nub kuas ua tshoob dlhau tsaiv, kuv maam le muab Laxees rua koj, yog koj kaam rov qaab ua num rua kuv xyaa xyoo ntxiv.”

²⁸Yakhauj kuj pum zoo ua le ntawd, ces thaus xyaa nub kws ua tshoob ntawd dlhau lawm, Lanpaas txhaj muab Laxees txis rua Yakhauj yuav ua quaspuj.

²⁹(Lanpaas muab nwg tug ntxhais qhev kws hu ua Npilehas rua Laxees ua nwg tug ntxhais qhev.)

³⁰Yakhauj nrug Laxees pw hab nwg hlub Laxees heev dlua le nwg hlub Le-as. Yakhauj rov ua num rua Lanpaas xyaa xyoo ntxiv.

³¹Thaus Vaajtswv pum has tas, Yakhauj hlub Le-as tsi npaum le hlub Laxees, nwg txhaj ca Le-as muaj mivnyuas xwb, tabsis tsi pub kuas Laxees muaj taug mivnyuas.

³²Le-as txawm xeeb tub hab yug tau ib tug tub tag. Nwg txhaj has tas, “Tug TSWV pum kuv tej kev lwj sab, nyaj zag nuav kuv tug quasyawg yuav hlub kuv”; yog le ntawd, nwg txhaj tis tug tub ntawd npe hu ua Lunpees.

³³Le-as rov xeeb tub hab yug tau ib tug tub. Nwg has tas, “Tug TSWV pub kuv rov muaj tug tub nuav hab, rua qhov nwg nov has tas, kuv tug quasyawg tsi hlub kuv”; yog le ntawd, nwg txhaj tis tug tub ntawd npe hu ua Xime-oos.

³⁴Le-as rov xeeb tub hab yug tau ib tug tub ntxiv. Nwg has tas, “Zag nuav kuv tug quasyawg yuav muab sab npuab kuv, rua qhov kuv tub yug tau peb tug tub rua nwg lawm”; yog le nwg txhaj tis tug tub ntawd npe hu ua Levis.

³⁵Le-as rov xeeb tub hab yug tau ib tug tub ntxiv. Nwg has tas, “Zag nuav kuv yuav ua tug TSWV tsaug”; yog le ntawd, nwg txhaj tis npe rua tug tub ntawd hu ua Yudas. Ces nwg txawm tseg tsi muaj mivnyuas lawm.