Read Hmong Njua Chivkeeb 3 Bible Online

Chivkeeb 3 - Hmong Njua bible

Chivkeeb 3

¹Naab yog ib tug kws ntse tshaaj txhua yaam tsaj qus kws tug TSWV kws yog Vaajtswv tau tsim huv tuabsi. Naab txhaj nug tug quaspuj has tas, “Vaajtswv yeej txwv kuas meb tsi xob noj txhua yaam txiv ntoo kws nyob huv lub vaaj nuav tag los?”

²Tug quaspuj teb has tas, “Wb yeej noj tau txhua yaam txiv ntoo kws nyob huv lub vaaj nuav,

³tsuas yog tshwj tsob txiv ntoo huv plawv vaaj txhaj tsi noj xwb. Vaajtswv yeej txwv tsi pub wb noj tsob ntoo ntawd tej txiv lossis tsi pub kov tsob ntoo ntawd; yog wb noj, wb yuav tuag.”

⁴Naab teb tug quaspuj has tas, “Tej lug ntawd tsi tseeb, meb yuav tsi tuag ib zag le.

⁵Vaajtswv has le ntawd, rua qhov nwg paub has tas thaus twg meb noj tsob txiv ntoo ntawd, meb yuav zoo le Vaajtswv hab meb yuav paub qhov phem hab qhov zoo.”

⁶Tug quaspuj pum has tas, tsob ntoo ntawd zoo nkauj hab tej txiv ntxim qaab kawg le, tsi yog le ntawd xwb, nwg xaav has tas, tej txiv ntoo ntawd tseem yuav ua rua nwg muaj tswvyim hab. Ces nwg txawm cev teg moog dle cov txiv lug noj. Nwg muab rua nwg tug quasyawg noj hab.

⁷Thaus obtug noj taag lawm, obtug txawm pum tseeb hab paub has tas obtug labqaab, obtug txhaj moog dle nplooj txiv ncuav pas lug xaws naav.

⁸Thaus yuav tsaus ntuj obtug nov tug TSWV kws yog Vaajtswv moog kev huv lub vaaj, obtug txhaj tsiv moog nkaum rua huv cov ntoo lawm.

⁹Tabsis tug TSWV kws yog Vaajtswv hu tug quasyawg has tas, “Koj nyob qhov twg?”

¹⁰Nwg teb has tas, “Kuv nov koj lug rua huv lub vaaj nuav, kuv ntshai koj heev kuv txhaj tsiv moog nkaum lawm, rua qhov kuv labqaab.”

¹¹Vaajtswv nug has tas, “Leejtwg has rua koj tas koj labqaab? Tsi yog koj noj tsob txiv ntoo kws kuv txwv tsi pub koj noj lawm los?”

¹²Tug quasyawg teb has tas, “Tub yog tug quaspuj kws koj muab rua kuv, nwg muab cov txiv ntoo ntawd cev rua kuv noj, kuv txhaj le tau noj lawm.”

¹³Vaajtswv nug tug quaspuj has tas, “Vim le caag koj txhaj ua le ko?” Nwg teb has tas, “Naab ntxag kuv noj!”

¹⁴Tug TSWV kws yog Vaajtswv txhaj has rua naab has tas, “Koj yuav raug txim, vim qhov kws koj ntxag tug quaspuj nuav ua txhum. Taagnrho tej tsaj huv tuabsi, koj yog tug kws yuav tau ris lu lug foom tsi zoo nuav: txij nub nua moog, koj yuav muab koj lub plaab ndlaug sau npoo aav moog le hab noj moov aav moog taag koj lub neej.

¹⁵Kuv yuav ua kuas koj hab tug quaspuj nuav ua yeebncuab, nwg tug xeebntxwv hab koj tug xeebntxwv los yuav ua yeebncuab moog le. Nwg tug xeebntxwv yuav tsoo koj taubhau kuas ntsoog, hab koj yuav tum nwg lub laujtaws.”

¹⁶Vaajtswv has rua tug quaspuj ntawd tas, “Kuv yuav tsub kev txomnyem rua koj thaus koj suab mivnyuas hab tsub kev mob rua koj thaus koj yug mivnyuas. Txawm yog le ntawd los koj tseem xaav nrug koj tug quasyawg ua txwj nkawm, tabsis nwg yuav tswjfwm koj.”

¹⁷Vaajtswv has rua Adaas has tas, “Tub yog vim koj noog koj tug quaspuj lug hab noj cov txiv ntoo kws kuv txwv tsi pub koj noj. Vim koj tau ua le ntawd aav txhaj raug foom tsi zoo. Koj yuav tau siv zug khwv moog taag simneej koj txhaj tau noj tau haus.

¹⁸Aav yuav tuaj nroj hab tuaj xuavpaug, hab koj yuav dle nroj tsuag tom tej teb lug ua zaub noj.

¹⁹Koj yuav ua teb khwv lub fws nrug, koj txhaj tau noj moog txug thaus koj rov moog rua huv cov aav kws koj tawm lug. Kuv muab aav lug puab koj, hab koj yuav rov moog ua aav dlua.”

²⁰Adaas tis nwg tug quaspuj npe hu ua Evas, rua qhov Evas yog txhua tsaav tuabneeg leej nam.

²¹Tug TSWV kws yog Vaajtswv txawm muab tawv tsaj lug ua rig tsho rua Adaas hab nwg tug quaspuj, hab muab rua obtug naav.

²²Tug TSWV kws yog Vaajtswv has tas, “Nwgnuav tug txivneej nuav zoo le peb hab nwg paub qhov phem hab qhov zoo. Yuav tsi pub nwg moog dle tsob txiv ntoo cawm tau txujsa lug noj, nyob tsaam nwg yuav muaj sa nyob moog ibtxhis.”

²³Tug TSWV kws yog Vaajtswv txhaj ntab Adaas tsiv tawm huv lub Vaaj Edees hab kuas nwg moog khawb aav ua noj ua haus ntawm cov aav kws Vaajtswv muab coj lug puab nwg.

²⁴Thaus Vaajtswv muab tug txivneej ntawd ntab tawm lawm, Vaajtswv tso ib cov qhelunpees tuav ib raab ntaaj nplaim tawg kws tig tau moog rua txhua phaab lug zuv lub Vaaj Edees saab nubtuaj, tsi pub leejtwg moog ze tsob txiv ntoo kws cawm tau txujsa.