Read Hmong Njua Chivkeeb 32 Bible Online

Chivkeeb 32 - Hmong Njua bible

Chivkeeb 32

¹Thaus Yakhauj taabtom taug kev lug, cov timtswv sau ntuj lug ntsib nwg.

²Thaus Yakhauj pum cov timtswv ntawd nwg has tas, “Ntawm nuav yog Vaajtswv lub yeej”, yog le ntawd, Yakhauj txhaj tis npe rua thaaj chaw ntawd hu ua Mahana-ees.

³Yakhauj tso tuabneeg ua nwg ntej moog has rua nwg tug tijlaug Exaus kws nyob huv tebchaws Edoos.

⁴Nwg kuas cov xaa xuv moog has le nuav rua Exaus: “Kuv yog Yakhauj, yog koj tug tubkhai kws noog lug, thov has rua kuv tug tswv Exaus paub has tas, kuv moog nrug Lanpaas nyob tau ntev loo hab taamsim nuav kuv taabtom rov qaab lug lawm.

⁵Kuv muaj nyuj, neeg luav, yaaj, tshis, hab qhev coob heev. Kuv muaj lug le nuav lug thov koj kws yog tug tswv, kuv ca sab ntsoov has tas koj yuav txaus sab rua kuv.”

⁶Thaus cov tuabneeg kws xaa xuv rov qaab lug cuag Yakhauj, puab has tas, “Peb tub moog cuag koj tug tijlaug Exaus taag lawm, nwg taabtom npaaj sawv kev tuaj tog koj lawm ntaag. Nwg coj tau plaub puas leej tuabneeg nrug nwg tuaj.”

⁷Yakhauj ntshai heev hab nyuaj sab kawg le. Nwg txhaj muab nwg cov tuabneeg faib kag ua ob paab, nwg tseem muab nwg cov yaaj, tshis, nyuj hab ntxhuav faib ua ob paab hab.

⁸Nwg xaav has tas, “Yog Exaus tuaj tua paab ua ntej los kuas paab ua qaab tsiv tau dlim.”

⁹Yakhauj txhaj thov Vaajtswv has tas, “Kuv yawmkoob Anplahaas tug Vaajtswv hab kuv txiv Ixaj tug Vaajtswv, thov koj noog kuv tej lug thov lauj! Tug TSWV, koj has kuas kuv rov qaab moog lawm nraag kuv lub tebchaws hab kuv cov kwvtij, hab koj yuav pub kev tau zoo rua kuv.

¹⁰Tub tsi tsimnyog koj hlub hab ua ncaaj nceeg rua kuv kws yog koj tug tubkhai hlo le. Thaus kuv hlaa tug dlej Yauladees tuaj, kuv tsi muaj dlaabtsi le, tsuas muaj tuab tug paas nreg xwb, tabsis nwgnuav muaj ob paab tuabneeg hab ob paab tsaj coob kawg nrug kuv rov qaab lug.

¹¹Kuv thov koj paab kuas kuv dlim ntawm kuv tug tijlaug Exaus lauj. Kuv ntshai heev, kuv ntshai nyob tsaam nwg tuaj tua peb hab ua rua peb raug kev puamtsuaj, tsi has tej quaspuj hab mivnyuas huv tuabsi.

¹²Thov koj ncu ntsoov tej lug kws koj cog tseg has tas, koj yuav pub kev tau zoo rua kuv hab pub kuas kuv muaj xeebntxwv coob suav tsi txheeb, ib yaam le tej xuabzeb nraag ntug havtxwv.”

¹³Nwg txhaj pw ib mos ntawm thaaj chaw ntawd, hab nwg txhaj xaiv tej tsaj kws nwg muaj ibtxha coj moog pub rua nwg tug tijlaug Exaus le nuav:

¹⁴Ob puas tug maum tshis hab neeg nkaum tug laug tshis, ob puas tug maum yaaj hab neeg nkaum tug laug yaaj,

¹⁵peb caug tug maum ntxhuav nrug cov mivnyuas kws tseem mog, plaub caug tug maum nyuj hab kaum tug txiv nyuj, neeg nkaum tug maum neeg luav hab kaum tug txiv neeg luav.

¹⁶Nwg muab cov tsaj ntawd faib ua tej paab hab nwg kuas nwg cov tubkhai ib leeg moog saib ib paab. Nwg has rua puab tas, “Mej ca le moog ua kuv ntej, ib paab moog kuas nrug ib paab dleb tsawv.”

¹⁷Nwg has rua thawj tug tubkhai has tas, “Thaus twg yog kuv tug tijlaug Exaus tuaj ntsib koj hab nwg nug has tas, ‘Koj tug tswv yog leejtwg? Koj yuav moog qhov twg? Leejtwg yog tug tswv cov tsaj kws ua koj ntej nuav?’

¹⁸Koj yuavtsum teb has tas, ‘Cov tsaj nuav yog koj tug tubkhai Yakhauj le. Nwg kuas coj cov tsaj nuav lug pub rua Exaus kws yog nwg tug tswv. Yakhauj tseem taabtom lug ua peb qaab.’ ”

¹⁹Yakhauj has rua tug tubkhai ob hab tug tubkhai peb hab txhua tug kws nwg tsaa lug saib nwg cov tsaj ntawd ib yaam nkaus has tas: “Thaus mej ntsib Exaus mej yuavtsum has tej lug nuav rua nwg.

²⁰Mej yuavtsum has tas, ‘Yakhauj kws yog koj tug tubkhai tseem ua peb qaab.’ ” Yakhauj xaav has tas, “Kuv tub muab kuv tej tsaj xaa ua ntej moog pub rua nwg lawm, ces thaus kuv moog ntsib nwg, nyaj nwg yuav zaam txim rua kuv.”

²¹Yakhauj xaa tej khoom pub ntawd moog ua ntej, tabsis nwg tseem rov pw ib mos ntawm lub yeej ntawd.

²²Mo ntawd Yakhauj sawv coj nwg ob tug quaspuj, nwg ob tug nam yau, hab nwg kaum ib leeg mivnyuas moog hlaa tug Dlej Yanpaus.

²³Thaus nwg xaa quaspuj mivnyuas hlaa dlhau dlej taag, nwg maam muab tej khoom kws yog nwg tug xaa rua saab dlej tim u huv tuabsi hab,

²⁴tabsis Yakhauj tuab leeg tseem nyob tom qaab. Ces txawm muaj ib tug txivneej lug nrug Yakhauj sis qhau moog txug thaus kaaj ntug txoog.

²⁵Thaus tug txivneej ntawd pum has tas, nwg yuav qhau tsi yeej Yakhauj, nwg txhaj ntaus Yakhauj lub ntsaag ua rua Yakhauj lub pob qej txhaa pluam plhuav.

²⁶Tug txivneej ntawm has tas, “Nub tub yuav tawm, koj ca le tso kuv moog.” Yakhauj teb has tas, “Kuv yuav tsi tso koj moog txug thaus koj foom koob moov rua kuv tsaiv.”

²⁷Tug txivneej ntawm nug Yakhauj has tas, “Koj npe hu le caag?” Nwg teb has tas, “Kuv npe hu ua Yakhauj.”

²⁸Tug txivneej ntawd has tas, “Koj lub npe yuav tsi hu ua Yakhauj ntxiv lawm. Rua qhov koj muaj peevxwm nrug Vaajtswv hab nrug tuabneeg sis qhau, hab ua rua koj yeej lawm. Yog le ntawd, yuav muab koj lub npe tis hu ua Yixalayees.”

²⁹Yakhauj has tas, “Thov koj qha koj lub npe rua kuv.” Tabsis nwg teb Yakhauj has tas, “Vim le caag koj xaav paub kuv lub npe?” Ces nwg txawm foom koob moov rua Yakhauj.

³⁰Yakhauj has tas, “Kuv tub pum Vaajtswv tim ntsej tim muag lawm, tabsis kuv tseem muaj sa nyob.” Yog le ntawd, Yakhauj txhaj tis npe rua thaaj chaw ntawd hu ua Peniyees.

³¹Thaus nub tawm tuaj Yakhauj txhaj sawv kev huv Peniyees moog lawm, hab nwg moog kev cegtawv pluav, rua qhov mob nwg lub ntsaag heev.

³²Txawm yog naj nub nwgnuav los Yixalayees cov xeebntxwv yeej tsi noj thooj nqaj ntawm lub ntsaag ntawd hlo le, rua qhov Vaajtswv ntaus Yakhauj lub ntsaag lawm.