Read Hmong Njua Chivkeeb 37 Bible Online

Chivkeeb 37 - Hmong Njua bible

Chivkeeb 37

¹Yakhauj tseem nyob huv tebchaws Kana-aas kws nwg txiv ibtxwm nyob thaus u lug lawm.

²Zaaj nuav yog has txug Yakhauj tsev tuabneeg lub neej. Yauxej yog ib tug tub hluas kws noobnyoog muaj kaum xyaa xyoo, nwg moog yug yaaj hab tshis nrug nwg cov tijlaug kws yog Npilehas hab Xilepas kws yog nwg txiv ob tug nam yau cov tub. Yauxej pheej coj tej yaam tsi zoo kws nwg cov tijlaug ua lug pav qha rua nwg txiv noog.

³Taagnrho Yakhauj cov tub, mas Yakhauj hlub Yauxej tshaaj cov huv tuabsi, rua qhov nwg muaj Yauxej thaus kws nwg laug heev lawm. Nwg xaws tau ib lub tsho ntev rua Yauxej naav.

⁴Thaus Yauxej cov tijlaug pum has tas, puab txiv hlub Yauxej tshaaj le hlub puab lawm, puab txhaj ntxub puab tug kwv kawg nkaus le, hab ua rua puab tsi xaav has ib lu lug zoo rua Yauxej.

⁵Muaj ib zag Yauxej txawm ua npau suav, hab thaus nwg qha zaaj npau suav ntawd rua nwg cov tijlaug noog taag, ua rua puab yimfuab ntxub nwg heev.

⁶Yauxej has tas, “Kuv yuav pav kuv zaaj npau suav rua mej noog.

⁷Peb suavdlawg puavleej paav peb cov teg nplej huv teb, thaus paav tau lawm, kuv teg nplej txawm sawv nreg nreeg. Ces mej cov teg nplej sawv lug vij kuv teg hab ca le nyo zum zawg lug pe kuv teg nplej.”

⁸Nwg cov tijlaug nug has tas, “Koj xaav has tas koj yuav tau ua vaajntxwv kaav peb nua los?” Yog le ntawd, puab txhaj yimfuab ntxub nwg heev, vim zaaj npau suav hab tej lug kws nwg pav rua puab noog ntawd.

⁹Ces Yauxej rov ua ib zaaj npau suav dlua hab nwg qha rua nwg cov tijlaug noog has tas, “Kuv ua dlua ib zaaj npau suav, kuv pum lub nub, lub hli hab kaum ib lub nubqub pe kuv zum zawg.”

¹⁰Nwg pav zaaj npau suav nuav rua nwg txiv noog huv tuabsi hab, nwg txiv txawm ywg nwg has tas, “Ua caag koj yuav txawj ua npau suav ua luaj le? Koj xaav has tas koj nam wb hab koj cov tijlaug peb suavdlawg yuav tau lug txhus caug pe koj nua los?”

¹¹Yauxej cov tijlaug yimfuab khib heev, tabsis nwg txiv xaav ntsoov zaaj npau suav ntawd rua nruab sab.

¹²Muaj ib nub Yauxej cov tijlaug moog yug puab txiv paab tsaj rua peg Sekhees,

¹³Yakhauj has rua Yauxej has tas, “Kuv yuav khaiv koj moog peg Sekhees qhov chaw kws koj cov tijlaug yug tsaj.” Yauxej teb has tas, “Kuv maam le moog!”

¹⁴Nwg txiv has rua nwg has tas, “Koj ca le moog saib, yog koj cov tijlaug noj qaab nyob zoo hab tej tsaj los nyob txhij txhua, ces koj rov qaab lug qha rua kuv paub.” Yog le ntawd, nwg txiv txhaj tso nwg sawv kev huv lub Haav Henploos moog lawm. Yauxej moog txug peg Sekhees,

¹⁵hab nwg ncig moog ncig lug ntawm roob mojsaab, muaj ib tug txivneej pum nwg hab nug nwg has tas, “Koj nrhav dlaabtsi?”

¹⁶Yauxej teb has tas, “Kuv tuaj nrhav kuv cov tijlaug kws puab tuaj yug puab cov tsaj, koj puas paub puab nyob qhov twg? Thov koj qha rua kuv.”

¹⁷Tug txivneej ntawd teb has tas, “Puab tsi nyob ntawm nuav lawm. Kuv nov puab has tas, puab yuav moog rua tom lub nroog Dauthaas.” Ces Yauxej txhaj lawv cov tijlaug qaab moog hab pum puab nyob ntawm Dauthaas.

¹⁸Thaus Yauxej cov tijlaug pum Yauxej tuaj txug tim u, cov tijlaug txawm tuavhuv tua Yauxej povtseg.

¹⁹Puab ib leeg has rua ib leeg tas, “Tug kws txawj ua npau suav ntawd tuaj lawm.

²⁰Zag nuav, peb muab nwg tua povtseg hab muab nwg coj moog pov rua huv cov qhov tshij qhuav nuav ib lub. Peb maam dlaag has tas yog tsuv tum nwg lawm. Saib nwg tej npau suav yuav muaj dlaabtsi tshwm tuaj.”

²¹Thaus Lunpees nov puab has le ntawd, nwg nrhav tswvyim paab cawm Yauxej, nwg txhaj has tas, “Ca peb tsi xob muab Yauxej tua povtseg.

²²Peb ca le muab nwg pov rua huv lub qhov tshij kws nyob ntawm roob mojsaab qhua nuav xwb, tsi xob ua kuas nwg nqaj ndluag ntshaav nrug.” Lunpees has le nuav, rua qhov nwg xaav paab kuas Yauxej dlim ntawm puab hab tso nwg rov moog cuag nwg txiv.

²³Thaus Yauxej tuaj txug ntawm cov tijlaug lawm, puab txawm sau nthwv lug nteg nwg hab muab nwg lub tsho ntev kws muaj teg. hle hlo.

²⁴Ces puab txawm coj nwg moog pov rua huv lub qhov tshij kws tsi muaj dlej.

²⁵Thaus puab tseem taabtom noj mov, puab txawm pum ib paab tuabneeg Yisamayees taug kev peg lub nroog Nkile-as tuaj moog rua nraag tebchaws Iziv. Puab caab ntxhuav thauj tej tshuaj tsw qaab hab txumlom moog muag.

²⁶Yudas has rua nwg cov kwvtij has tas, “Yog peb muab peb tug kwv tua povtseg hab npog txujkev tua tuabneeg nuav ca, peb yuav tau dlaabtsi?

²⁷Peb muab nwg muag rua cov tuabneeg Yisamayees ntawd ntshai yuav zoo dlua. Peb tsi xob ua rua nwg nqaj ndluag ntshaav nrug, rua qhov nwg yeej yog peb tug kwv hab nrug peb koom roj koom ntshaav.” Nwg cov kwvtij kuj pum zoo le nwg has,

²⁸thaus cov tub laag tub luam kws yog tuabneeg Midias tuaj txug, cov tijlaug txhaj le nqug Yauxej tawm huv lub qhov tshij lug hab muab nwg muag rua cov Yisamayees ua neeg nkaum dlaim nyaj, luas txhaj coj Yauxej moog rua tebchaws Iziv lawm.

²⁹Thaus Lunpees rov qaab moog xauj huv lub qhov tshij tsi pum Yauxej nyob huv lawm, nwg ntxhuv sab heev hab dlua rhe nwg lub tsho povtseg.

³⁰Nwg rov qaab lug cuag nwg cov kwv hab has rua puab tas, “Tsi pum Yauxej nyob huv lub qhov tshij lawm, sov kuv yuav ua le caag lauj?”

³¹Ces puab txawm muab ib tug tshis tua hab muab Yauxej lub tsho ntev moog raus rua huv cov ntshaav tshis.

³²Puab nqaa lub tsho ntev ntawd moog qha rua puab txiv hab has tas, “Peb khaws tau lub tsho nuav. Koj sim saib puas yog koj tug tub lub tsho los tsi yog?”

³³Yakhauj ncu tau lub tsho ntawd zoo hab has tas, “Yog tag, lub tsho nuav yog Yauxej lub! Tej tsaj nyaum yeej muab kuv tug tub tum lawm tag. Kuv tug tub Yauxej tau raug dlua ua tej dlaim lawm lauj!”

³⁴Yakhauj dlua rhe nwg lub tsho povtseg hab muab ntaub tsaaj lug npua, ua kev tu sab quaj ntsuag. Nwg quaj ncu txug nwg tug tub tau ntev loo.

³⁵Taagnrho nwg tej tub tej ntxhais puavleej lug nplig nwg sab, tabsis nwg yeej tsi noog leejtwg has hab nwg has tas, “Kuv yuav quaj ntsuag kuv tug tub le nuav moog txug thaus kuv txujsa tu moog nrug nwg nyob.” Yog le ntawd, nwg pheej quaj nwg tug tub Yauxej le.

³⁶Thaus cov tub laag tub luam kws yog tuabneeg Midias moog txug nraag tebchaws Iziv lawm, puab txawm muab Yauxej muag rua Pautifas kws yog Falaus ib tug thawj tubrog saib cov tubrog kws zuv Falaus lub loog.