Read Hmong Njua Chivkeeb 39 Bible Online

Chivkeeb 39 - Hmong Njua bible

Chivkeeb 39

¹Cov tuabneeg Yisamayees coj Yauxej moog txug nraag tebchaws Iziv, hab puab muab nwg muag rua Pautifas kws yog Falaus tug thawj tubrog saib cov tubrog faajxwm kws zuv Falaus lub loog.

²Tug TSWV nrug nraim Yauxej hab pub nwg teg num vaammeej heev. Nwg nyob huv nwg tug tswv Pautifas kws yog tuabneeg Iziv lub tsev.

³Pautifas pum has tas tug TSWV nrug nraim Yauxej nyob hab ua rua txhua teg num kws Yauxej ua puavleej tav.

⁴Pautifas txaus sab heev rua Yauxej hab tsaa Yauxej ua nwg tug tubkhai, hab tso plhuav nwg lub cuabtaam rua Yauxej ua tug saib.

⁵Txij thaus ntawd lug, tug TSWV txhaj foom koob moov rua tug tuabneeg Iziv ntawd tsev tuabneeg, hab txhua yaam kws nwg muaj nyob huv nwg lub vaaj lub tsev hab huv nwg tej teb, vim Yauxej nrug nwg nyob.

⁶Pautifas muab txhua yaam kws nwg muaj cob rua Yauxej saib hab nwg tso sab plhuav tsi txhawj txug ib yaam dlaabtsi le, tsuas yog tshwj cov zaub mov kws nwg noj nkaus xwb. Yauxej yog ib tug hluas kws cev yag hab zoo nraug heev,

⁷ces tau tsi ntev Yauxej tug tswv tug quaspuj txawm nyam Yauxej, hab nwg taij Yauxej has tas, “Koj moog nrug kuv pw.”

⁸Yauxej tsi kaam moog hab nwg has rua Pautifas tug quaspuj has tas, “Koj saib, txij thaus kuv lug nyob ntawm nuav, kuv tug tswv tso sab plhuav rua kuv tsi muaj kev nyuaj sab txhawj txug ib yaam dlaabtsi nyob huv nwg lub tsev hlo le. Nwg muab txhua yaam kws nwg muaj tso plhuav rua kuv ua tug saib.

⁹Huv lub tsev nuav kuv txhaj yog tug kws muaj peevxwm ib yaam le nwg muaj xwb. Kuv tug tswv yeej tsi txwv kuv ib yaam dlaabtsi le, tsuas tshwj koj kws yog nwg tug quaspuj, nwg txhaj txwv tsi pub kuv kov, kuv yuav ua le caag muaj pluaj sab nrug koj pw hab ua txhum rua Vaajtswv?”

¹⁰Txawm yog nwg naj nub taij kuas Yauxej moog nrug nwg pw los Yauxej yeej tsi kaam moog le.

¹¹Tabsis muaj ib nub Yauxej moog ua num huv tsev lawv le nwg pheej txeev ua, nub ntawd tej tubkhai tsi muaj ib tug nyob huv tsev le lawm.

¹²Pautifas tug quaspuj txawm lug tuav nkaus Yauxej lub tsho hab has tas, “Koj ca le moog nrug kuv pw xwb.” Tabsis Yauxej hle hlo Yauxej lub tsho rua nwg, hab Yauxej tawm plawg tsiv rua nrau zoov lawm.

¹³Thaus Pautifas tug quaspuj pum has tas, Yauxej hle Yauxej lub tsho rua nwg hab tsiv tawm rua nrau zoov lawm,

¹⁴nwg txawm hu cov tubkhai kws zuv nwg lub tsev lug hab ntxeev lug has tas, “Mej sim saib! Tug tuabneeg Henplais kws kuv tug quasyawg coj lug rua huv tsev nuav, nwg ua saib tsi taug peb kag le. Nwg ca le lug huv kuv txaaj hab mos kuv, tabsis kuv qw tawg ntho,

¹⁵ces nwg ca le tsiv rua nrau zoov, hab tseg nwg lub tsho rua ntawm kuv ib saab.”

¹⁶Pautifas tug quaspuj txhaj khaws Yauxej lub tsho ca moog txug thaus Yauxej tug tswv rov qaab lug txug tsev.

¹⁷Ces nwg txawm pav zaaj nuav rua nwg tug quasyawg noog has tas: “Tug tubkhai Henplais kws koj coj lug nrug wb nyob, nwg lug mos kuv huv txaaj.

¹⁸Tabsis thaus kuv qw tawg ntho, nwg tso plhuav kuv tseg tsiv rua nrau zoov hab tseg nwg lub tsho rua ntawm kuv ib saab.”

¹⁹Thaus Yauxej tug tswv nov dlheev tej lug kws nwg tug quaspuj pav has tas, “Koj tug tubkhai tau ua le nuav rua kuv lawm ntaag.” Txhaj ua rua nwg chim heev.

²⁰Yauxej tug tswv txhaj coj Yauxej moog kaw rua huv qhov chaw kws kaw Falaus cov tuabneeg raug txim, ces Yauxej txawm moog nyob rua huv lub tsev lojcuj ntawd lawm.

²¹Tabsis tug TSWV yeej nrug nraim Yauxej hab foom koob moov rua Yauxej, ces tug kws saib lub tsev lojcuj txhaj txaus sab heev rua Yauxej.

²²Nwg tsaa Yauxej ua tug saib taagnrho cov tuabneeg raug txim hab ua tug saib txhua yaam kws nyob huv lub tsev lojcuj.

²³Tug kws saib lub tsev lojcuj tso sab plhuav, tsi moog saib tej num kws nwg tso rua Yauxej ua le, rua qhov tug TSWV nrug nraim Yauxej hab pub tswvyim rua Yauxej ua tau txhua yaam num tav huv tuabsi.