Read Hmong Njua Chivkeeb 4 Bible Online

Chivkeeb 4 - Hmong Njua bible

Chivkeeb 4

¹Adaas nrug Evas kws yog nwg quaspuj pw, ces Evas txawm xeeb tub. Evas yug tau ib tug tub hab nwg has tas “Vim tug TSWV paab kuv, kuv txhaj tau ib tug tub.” Yog le ntawd, nwg txhaj tis tug tub ntawd npe hu ua Ka-ees.

²Tom qaab ntawd nwg rov yug tau ib tug tub, hab nwg tis npe hu ua Anpees. Anpees yog ib tug tub yug yaaj, tabsis Ka-ees yog ib tug tub ua qoobloo.

³Muaj ib nub Ka-ees nqaa tej qoobloo kws nwg sau tau lug coj tuaj fij rua tug TSWV.

⁴Ces Anpees kuj muab nwg tej mivnyuas yaaj kws yog thawj tug, coj tuaj tua, hab nwg xaiv tej nqaj zoo coj tuaj fij rua Vaajtswv. Tug TSWV txaus sab heev rua Anpees hab nwg tej khoom fij,

⁵tabsis Ka-ees hab nwg tej khoom fij tsi hum Vaajtswv sab. Yog le ntawd, Ka-ees txhaj chim hab ua ntsejmuag npautawg vog.

⁶Ces tug TSWV has rua Ka-ees has tas, “Vim le caag koj yuav chim ua luaj le? Vim le caag koj ua ntsejmuag npautawg vog le ko?”

⁷Yog koj yeej ua qhov zoo, kuv yuav txais koj tej khoom fij, tabsis yog koj ua phem, txujkev txhum zuv rawv ntawm koj qhovrooj yuav tum koj. Txujkev txhum xaav ua tug kaav koj, tabsis koj yuavtsum ua kuas koj kovyeej nwg.

⁸Tom qaab ntawd, Ka-ees has rua nwg tug kwv Anpees has tas, “Wb tawm moog yos ua si nraag teb.” Thaus obtug moog txug nraag teb lawm, Ka-ees txawm ntxeev sab rua nwg tug kwv hab muab nwg tug kwv tua tuag lawm.

⁹Tug TSWV nug Ka-ees has tas, “Koj tug kwv Anpees moog rua qhov twg lawm?” Nwg teb has tas, “Kuv tsi paub. Kuv yog tug kws tsomkwm kuv tug kwv los?”

¹⁰Ces tug TSWV has tas, “Vim le caag koj yuav ua nruj ua tsiv le ko? Koj tug kwv cov ntshaav kws ndlwg rua huv aav tub quaj hu kuv, thov kuas kuv ua pauj rua koj ntaag.

¹¹Nwgnuav koj raug lu lug foom tsi zoo hab raug ntab tawm tsiv ntawm thaaj aav kws nqug koj tug kwv kws koj muab tua cov ntshaav.

¹²Txawm yog koj khwv cog qoobloo ntau npaum le caag los tej aav ntawd yuav ua rua koj tej qoobloo hlub tsi taug. Koj yuav ua tuabneeg lajlees moog thoob qaab ntuj tsi muaj vaaj tsi muaj tsev nyob.”

¹³Ka-ees has rua tug TSWV has tas, “Koj rau txim rua kuv nyaav tshaaj qhov kuv yuav ris taug lawm.

¹⁴Koj ntab kuv tawm ntawm thaaj aav nuav hab tawm ntawm koj lub xubndlag moog. Kuv yuav ua tuabneeg lajlees moog thoob qaab ntuj tsi muaj vaaj tsi muaj tsev nyob, hab leejtwg ntsib kuv los yuav tua kuv povtseg.”

¹⁵Tabsis tug TSWV teb has tas, “Yeej tsi tau le, yog leejtwg tua Ka-ees povtseg, mas tug ntawd yuav raug txim xyaa npaug ntxiv.” Yog le ntawd, tug TSWV txhaj ntaus cim rua Ka-ees lub cev kuas leejtwg pum los tsi xob tua Ka-ees povtseg.

¹⁶Ces Ka-ees txhaj tsiv ntawm tug TSWV lub xubndlag hab moog nyob rua ib lub tebchaws hu ua “Ncig Moog Ncig Lug” kws yog nyob ntawm lub Vaaj Edees saab nubtuaj.

¹⁷Ka-ees hab nwg tug quaspuj yug tau ib tug tub, obtug tis nwg lub npe hu ua Enauj. Ka-ees rhawv tau ib lub nroog hab nwg muab lub nroog ntawd tis npe hu ua Enauj lawv le nwg tug tub lub npe.

¹⁸Enauj muaj ib tug tub hu ua Iladis, nwg yog Mehuya-ees txiv, Mehuya-ees muaj ib tug tub npe hu ua Methuxa-ees, hab Methuxa-ees muaj ib tug tub hu ua Lamej.

¹⁹Lamej yuav ob tug quaspuj, ib tug hu ua Adahes hab ib tug hu ua Xilas.

²⁰Adahes yug tau ib tug tub hu ua Yanpales, Yanpales yog yawmkoob ntawm cov tuabneeg kws yug tsaj txhu hab nyob tsevntaub.

²¹Yanpales muaj ib tug kwv hu ua Yunpas, Yunpas yog yawmkoob ntawm cov tuabneeg kws txawj ntaus nkauj nogncaas hab tshuab raaj.

²²Xilas yug tau ib tug tub hu ua Tunpas Ka-ees, nwg txawj ntaus txhua yaam cuabyeej kws yog muab tooj muab hlau ntaus. Tunpas Ka-ees tug muam hu ua Na-amas.

²³Lamej has rua nwg ob tug quaspuj tas, “Adahes hab Xilas, meb ca le noog kuv has: kuv tau tua ib tug txivneej povtseg vim nwg ua rua kuv raug mob, kuv tua ib tug tub hluas povtseg vim nwg ntaus kuv.

²⁴Yog leejtwg tua Ka-ees nwg yuav raug txim xyaa npaug, yog leejtwg tua kuv tug ntawd yuav raug txim xyaa caum xyaa npaug.”

²⁵Adaas rov nrug nwg tug quaspuj pw, Evas txhaj rov yug tau ib tug tub, Evas has tas, “Vaajtswv pub kuv muaj dlua ib tug tub lug sawv Anpees tug kws Ka-ees muab tua lawm chaw.” Yog le ntawd, nwg txhaj tis tug tub ntawd npe hu ua Xej.

²⁶Xej muaj ib tug tub, hab Xej muab tis npe hu ua Enauses. Txij thaus ntawd lug tuabneeg txawm pib tuav tug TSWV lub npe pehawm tug TSWV.