Read Hmong Njua Chivkeeb 43 Bible Online

Chivkeeb 43 - Hmong Njua bible

Chivkeeb 43

¹Huv tebchaws Kana-aas muaj kev tshaib plaab zuj zug ntxiv,

²thaus kws Yakhauj tsev tuabneeg noj tej mov kws puab yuav nraag tebchaws Iziv lug taag lawm, Yakhauj has rua nwg cov tub has tas, “Mej ca le rov qaab moog yuav mivntsiv mov lug rua peb tau noj.”

³Yudas has rua Yakhauj has tas, “Tug nom kws tswj tebchaws Iziv yeej has tu lug nrho rua peb tas, yog peb tseem tsi coj peb tug kwv moog rua nwg, mas kuas peb tsi xob moog tshwm ntsejmuag rua nwg pum ib zag le lawm.

⁴Yog koj tso peb tug kwv ntxawg nrug peb moog, mas peb txhaj yuav kaam moog yuav nplej lug rua koj.

⁵Tabsis yog koj tsi kaam tso nwg moog, peb yuav tsi kaam moog, rua qhov tug nom nraag yeej has rua peb tas, ‘Yog mej tsi coj mej tug kwv ntxawg nrug mej tuaj, mej tsi xob tuaj tshwm ntsejmuag rua kuv pum ib zag ntxiv le lawm.’ ”

⁶Yakhauj has tas, “Vim le caag mej yuav ua rua kuv tau kev nyuaj sab ua luaj, ua le caag tseem yuav qha rua tug nom ntawd paub has tas, mej tshuav ib tug kwv hab nua?”

⁷Puab teb has tas, “Tug nom nraag yeej nug txug peb hab peb tsev tuabneeg huv tuabsi has tas, ‘Mej txiv puas tseem ua neej nyob? Mej puas muaj kwv hab?’ Peb txhaj teb nwg tej lug kws nwg nug peb ntawd. Peb tub tsi paub has tas, nwg yuav kuas peb coj peb tug kwv ntxawg moog rua nwg le.”

⁸Yudas has rua nwg txiv has tas, “Tso tug hluas nrug kuv moog, peb yuav rawm sawv kev moog taamsim nuav, peb suavdlawg txhaj yuav tsi tuag tshaib.

⁹Kuv yuav zoo sab muab kuv txujsa pauv nwg, thov koj tso nwg rua kuv ua tug tsomkwm. Yog kuv coj tsi tau nwg rov lug rua koj, ces ca kuv ua tug ris lub txim nuav moog ibtxhis le.

¹⁰Yog peb tsi xob pheej taabkaum le nuav, ntshai taamsim nuav peb tub rov moog ob ntsug lug lawm.”

¹¹Puab txiv has rua puab tas, “Yog le ntawd, ca peb ua le nuav, muab tej khoom zoo tshaaj plawg kws peb muaj nyob huv tebchaws nuav ntim rua huv mej cov naab coj moog pub rua tug nom nraag xws le: tshuaj tsw qaab, zib ntaab, txumlom, txiv laum fuabxeeb hab tej txiv ntoo.

¹²Mej ca le nqaa nyaj ob npaug moog, mej nqaa cov nyaj kws zag taag nyob huv mej tej naab rov moog rua luas. Tej zag yog luas tsi ncu qaab lawm xwb.

¹³Coj mej tug kwv ntxawg nrug mej moog hab rov moog cuag tug nom nraag.

¹⁴Thov Vaajtswv tug kws muaj fwjchim luj kawg nkaus ua kuas tug nom nraag muaj sab mog muas hab taabncuab mej, nwg txhaj yuav tso Npeenyamees hab mej tug tijlaug rov lug. Txawm yog kuv ob tug tub tso kuv tseg lawm los xijpeem.”

¹⁵Yog le ntawd, puab txhaj coj tej khoom pub hab ob npaug nyaj hab coj puab tug kwv Npeenyamees nrug puab rov moog cuag Yauxej rua nraag tebchaws Iziv lawm.

¹⁶Thaus Yauxej pum Npeenyamees nrug puab tuaj txug lawm, nwg txawm has rua tug tubkhai kws saib nwg lub tsev has tas, “Coj cov tuabneeg nuav moog rua huv kuv tsev. Ca le moog nteg ib tug tsaj lug tua ua zaub ua mov, hab puab yuav nrug kuv noj sus ua ke.”

¹⁷Tug tubkhai ntawd moog ua lawv le Yauxej has hab coj cov tijlaug ntawd moog su huv Yauxej tsev.

¹⁸Thaus kws coj puab moog txug rua huv Yauxej tsev, puab ntshai kawg hab puab xaav has tas, “Ntshai yog tim cov nyaj kws thawj zag muab tso rov rua huv peb cov naab ntaag lauj. Nwg txhaj xaav ntaus peb, txeeb yuav peb tej neeg luav, hab coj peb moog ua nwg qhev.”

¹⁹Puab txhaj moog cuag tug tubkhai kws saib Yauxej tsev ntawm lub qhovrooj kws yuav moog rua huv tsev hab has rua nwg tas,

²⁰“Tug tswv, yog koj txaus sab, peb tub tau tuaj yuav mov ntawm nuav ib zag lawm.

²¹Thaus peb rov moog txug ib tog kev, peb qheb peb cov naab nplej, ua caag cov nyaj kws peb coj tuaj yuav nplej puavleej nyob taag hab peb tej ncauj naab tseem khi le qub. Peb txhaj nqaa cov nyaj nuav huv tuabsi rov tuaj rua koj.

²²Peb tsi paub sov yog leejtwg muab peb cov nyaj rov moog ntsaws rua huv peb cov naab. Zag nuav los peb kuj npaaj tau mivntsiv nyaj coj tuaj thov yuav mov dlua hab.”

²³Tug tubkhai txhaj has tas, “Mej tsi xob nyuaj sab, hab tsi xob ntshai. Mej tug Vaajtswv kws yog mej txiv tug Vaajtswv, muab tej nyaj ntawd ntsaws rov rua huv mej tej naab xwb. Kuv tub tau txais mej cov nyaj lawm.” Ces nwg txawm moog coj Xime-oos lug rua puab.

²⁴Ces tug tubkhai txhaj coj cov tijlaug lug rua huv Yauxej tsev, nwg moog nqaa dlej lug rua puab ntxuav kutaw, hab muab zaub rua puab cov neeg luav noj.

²⁵Puab npaaj puab tej khoom pub tog ca txug thaus taav su Yauxej lug txug, puab yuav muab pub rua nwg, rua qhov luas tub qha rua puab lawm has tas, puab yuav tau nrug Yauxej noj sus ua ke.

²⁶Thaus Yauxej lug txug, puab txhaj moog nqaa puab tej khoom lug rua huv tsev muab pub rua Yauxej hab txhus caug ndlua ntawm Yauxej xubndlag pe ua ntsejmuag ti nkaus huv aav.

²⁷Yauxej nug puab txug kev noj qaab nyob zoo hab has tas, “Mej tub yeej qha kuv has tas mej txiv laug heev, yog le ntawd, nwgnuav nwg nyob le caag lawm? Nwg puas tseem ua neej nyob hab puas noj qaab nyob zoo?”

²⁸Puab teb has tas, “Peb txiv kws yog koj tug tubkhai, nwg noj qaab nyob zoo hab tseem ua neej nyob.” Ces puab rov txhus caug pe Yauxej dlua ib zag ntxiv.

²⁹Thaus Yauxej pum dlheev nwg tug kwv ntxawg Npeenyamees kws yog nrug nwg koom ib leej nam yug, nwg txhaj nug has tas, “Tug nuav yog mej tug kwv ntxawg kws mej qha rua kuv lawm ntaag los? Yauxej has tas, mivtub, thov Vaajtswv foom koob moov rua koj.”

³⁰Ces Yauxej txawm tawm plawg moog lawm, rua qhov nwg pum nwg tug kwv ntxawg, nwg lub sab quaj dlhev puv nkaus kev zoo sab, nwg tauv tsi taug nwg lub kua muag, nwg yuav laug quaj taabmeeg puab, nwg txhaj tawm moog quaj tuabywv ib leeg huv nwg chaav tsev.

³¹Tom qaab kws nwg ntxuav muag taag, nwg maam tawm lug, hab ua tag tauv nwg lub kua muag, nwg txhaj kuas cov tubkhai rau mov rua puab noj.

³²Puab rau ib rooj mov rua Yauxej noj hab rau dlua ib rooj rua Yauxej cov tijlaug noj. Puab rau dlua ib rooj rua lwm qhov rua cov tuabneeg Iziv kws tuaj nrug puab noj mov ntawd noj, rua qhov cov tuabneeg Iziv tsi kaam nrug cov tuabneeg Henplais noj mov ua ke, vim yuav ua rua cov tuabneeg Iziv poob ntsejmuag.

³³Yauxej cov tijlaug moog nyob ncig lub rooj tig xubndlag tuaj rua ntawm Yauxej, lawv le puab tej noobnyoog pib tug hlub moog txug tug ntxawg. Thaus puab pum has tas ua cav puab tau lug nyob txhij txhua lawm tag, puab ib leeg tig saib ib leeg ua rua puab xaav tsi thoob le.

³⁴Cov tubkhai dlaus zaub dlaus mov ntawm Yauxej lub rooj lug rua puab noj, hab puab txhaab rua Npeenyamees noj tsib npaug ntau dlua lwm tug huv tuabsi. Puab txhaj nrug Yauxej noj hab haus moog txug thaus puab noj tsau haus qaug.