Read Hmong Njua Chivkeeb 45 Bible Online

Chivkeeb 45 - Hmong Njua bible

Chivkeeb 45

¹Yauxej tauv tsi taug nwg lub kua muag taabmeeg nwg cov tubkhai le lawm, nwg txhaj has rua puab tas, “Mej ca le tawm moog.” Tsi muaj cov Iziv nrug puab nyob ntawd le lawm, Yauxej txhaj qha rua nwg cov tijlaug hab nwg tug kwv has tas nwg yog leejtwg tag.

²Yauxej tsaa suab hlo quaj, ua rua cov tuabneeg Iziv puavleej nov, hab muaj tuabneeg moog pav zaaj nuav qha rua huv Falaus lub loog.

³Yauxej has rua nwg cov tijlaug has tas, “Kuv yog Yauxej ntaag. Kuv txiv puas tseem muaj sa nyob?” Thaus nwg cov tijlaug nov nwg has tej lug nuav, ua rua puab ntshai kawg hab teb tsi taug ib lus le.

⁴Yauxej has rua puab tas, “Mej ca le txaav lug ze kuv.” Puab txhaj txaav zog lug rua ntawm Yauxej. Ces Yauxej has rua puab tas, “Kuv yog mej tug kwv Yauxej kws mej muab muag moog rua nraag tebchaws Iziv ntaag.

⁵Nwgnuav mej tsi xob txhawj lossis tu sab qhov kws mej muab kuv muag lug rua ntawm nuav, yeej yog Vaajtswv khaiv kuv ua mej ntej lug, txhaj cawm tau tuabneeg txujsa.

⁶Tej kev tshaib nqhes nuav, xyoo nuav nyavnyuas yog xyoo ob xwb, tseem tshuav tsib xyoos tom ntej nuav ntxiv, mas yuav tsi muaj leejtwg cog hab sau tau qoobloo hlo le.

⁷Vaajtswv khaiv kuv ua mej ntej lug kuas cawm tau mej dlim kev puamtsuaj, kuas mej hab mej cov xeebntxwv txhaj muaj sa nyob.

⁸Tsi yog mej muag kuv lug rua ntawm nuav, tabsis yog Vaajtswv khaiv kuv lug; hab nwg tsaa kuv ua Falaus ib tug nom kws luj. Kuv tau ua tug saib taagnrho Falaus tej vaaj tse; hab kaav taagnrho lub tebchaws Iziv nuav.

⁹“Taamsim nuav mej ca le maaj nrooj rov qaab moog cuag kuv txiv hab qha rua nwg has tas, ‘Yauxej kws yog koj tug tub has le nuav: Vaajtswv tsaa kuv ua tug kaav taagnrho lub tebchaws Iziv lawm, kuas koj ca le lug nrug kuv nyob tsi xob ua sab nyaav.

¹⁰Coj taagnrho mej cov mivnyuas, cov xeebntxwv hab mej tej yaaj, tej tshis, tej nyuj hab txhua yaam kws mej muaj lug nyob rua huv cheebtsaam Nkausees, txhaj yog qhov chaw kws nyob ze kuv.

¹¹Yog koj lug nyob huv Nkausees, mas kuv txhaj yuav paab tau koj. Kev tshaib nqhes tseem tshuav tsib xyoos ntxiv tom ntej nuav, mas kuv tsi xaav kuas koj tsev tuabneeg, hab koj tej tsaj txhu tuag tshaib le.’ ”

¹²Yauxej has ntxiv tas, “Nwgnuav mej txhua tug, hab kwv Npeenyamees puavleej pum has tas kuv yog Yauxej tag.

¹³Mej ca le qha rua kuv txiv paub has tas, kuv muaj fwjchim luj npaum le caag nyob huv tebchaws Iziv nuav, hab qha txhua yaam kws mej tau pum lawm rua nwg noog. Mej ca le maaj nrooj coj nwg lug nyob ntawm nuav.”

¹⁴Yauxej cev loo teg moog puag nkaus nwg tug kwv Npeenyamees quaj; Npeenyamees los tsaa hlo suab quaj puag nkaus Yauxej ib yaam nkaus hab.

¹⁵Yauxej tseem quaj los nwg tub moog puag cov tijlaug hab nwj puab ib tug rua ib tug. Tom qaab ntawd nwg cov tijlaug maam pib nrug nwg thaam.

¹⁶Thaus muaj tuabneeg moog qha zaaj nuav rua huv Falaus lub loog has tas, Yauxej cov tijlaug tuaj saib Yauxej, Falaus hab nwg cov numtswv nrug Yauxej zoo sab kawg le.

¹⁷Falaus has rua Yauxej has tas, “Has rua koj cov tijlaug kuas tsaws nraa rua puab tej tsaj thauj hab rov qaab moog lawm peg tebchaws Kana-aas.

¹⁸Kuas puab moog coj puab txiv hab tej quaspuj mivnyuas lug cuag kuv. Kuv yuav muab thaaj aav zoo kawg nkaus huv tebchaws Iziv nuav rua puab, puab txhaj yuav muaj noj muaj haus nplua mag.

¹⁹Has kuas puab coj tsheb neeg huv tebchaws Iziv nuav moog tog koj txiv hab puab tej quaspuj mivnyuas lug nyob huv tebchaws Iziv nuav.

²⁰Kuas puab tsi xob khauvxwm puab tej khoom kws yog cuabyeej toomtxeem kws yuav muab tso tseg, tej kws zoo tshaaj plawg huv tebchaws Iziv nuav kuv yuav muab rua puab.”

²¹Yakhauj cov tub ua lawv le tej lug kws has rua puab lawm. Yauxej muab tau ntau lub tsheb neeg rua puab, lawv le Falaus has rua Yauxej, hab muab zaub mov ntau heev rua puab coj moog tau noj taug kev.

²²Yauxej muab tau ib leeg ib cev rig tsho hloov rua nwg cov tijlaug, tabsis nwg muab tau peb puas dlaim nyaj hab tsib ce rig tsho rua Npeenyamees.

²³Nwg muab tau kaum tug neeg luav thauj tej khoom kws zoo tshaaj plawg huv tebchaws Iziv moog rua nwg txiv, hab muab dlua kaum tug thauj nplej, ncuav hab lwm yaam zaub mov rua puab tau noj taug kev.

²⁴Nwg txhaj xaa nwg cov tijlaug rov qaab. Hab thaus puab sawv kev moog, nwg has rua puab tas, “Mej tsi xob sis caav sis tshe tom tej tog kev mag.”

²⁵Puab tawm huv tebchaws Iziv rov qaab moog tsev, moog cuag puab txiv Yakhauj nyob rua peg tebchaws Kana-aas.

²⁶Puab has rua Yakhauj has tas, “Yauxej tseem muaj sa nyob! Nwg yog tug kws kaav tebchaws Iziv ntaag!” Yakhauj xaav tsi thoob hab nwg tsi ntseeg tej lug kws puab has ntawd.

²⁷Tabsis thaus puab pav tej lug kws Yauxej has rua puab txhua lu rua Yakhauj noog taag, hab thaus nwg pum cov tsheb kws Yauxej xaa tuaj tog nwg moog nyob nraag tebchaws Iziv, nwg txhaj rov zoo sab.

²⁸Nwg has tas, “Zoo kuv sab heev lawm lauj! Kuv tug tub Yauxej tseem muaj sa nyob tag! Kuv yuavtsum moog pum nwg ua ntej kuv tuag.”