Read Hmong Njua Chivkeeb 46 Bible Online

Chivkeeb 46 - Hmong Njua bible

Chivkeeb 46

¹Yakhauj sau taagnrho txhua yaam kws nwg muaj coj huv tuabsi moog, hab thaus nwg moog txug nraag lub zog Npesenpas, nwg muab tsaj lug tua fij pub rua nwg txiv Ixaj tug Vaajtswv.

²Mo ntawd nwg ua ywgtoog pum Vaajtswv lug has rua nwg hab hu nwg has tas, “Yakhauj, Yakhauj!” Yakhauj teb has tas, “Vaajtswv, kuv nyob ntawm nuav.”

³Vaajtswv has tas, “Kuv yog Vaajtswv, kuv yog koj txiv tug Vaajtswv ntaag. Koj tsi xob ntshai qhov kws koj moog nyob nraag tebchaws Iziv, kuv yuav pub kuas koj cov xeebntxwv fuamvaam coob ua tau ib tsaav tuabneeg tseemceeb nyob rua nraag.

⁴Kuv yuav nrug koj moog nraag tebchaws Iziv, hab kuv yuav coj koj cov xeebntxwv rov lug nyob rua huv lub tebchaws nuav. Yauxej yuav nrug koj nyob thaus koj tuag.”

⁵Yakhauj txawm sawv kev tawm huv lub zog Npesenpas moog. Yakhauj cov tub muab Yakhauj, puab cov mivnyuas kws tseem yau, hab puab tej quaspuj tsaws caij cov tsheb neeg kws Falaus tso tuaj tog puab.

⁶Puab caab puab tej tsaj txhu hab coj puab tej cuabyeej toomtxeem kws puab muaj huv tebchaws Kana-aas moog nraag tebchaws Iziv huv tuabsi. Yakhauj coj taagnrho nwg cov xeebntxwv nrug nwg moog, xws le:

⁷Nwg cov tub, cov ntxhais, hab cov ntxhais xeebntxwv.

⁸Taagnrho Yakhauj tsev tuabneeg txhua tug kws nrug nwg tsiv moog nyob nraag tebchaws Iziv, Lunpees yog nwg tug tub hlub, hab

⁹Lunpees cov tub yog: Hanauj, Palus, Hexeloos hab Kalimis.

¹⁰Xime-oos cov tub yog: Yemuyees, Yamees, Auhas, Yakhees, Xauhas, hab Sa-ules kws yog tug quaspuj tuabneeg Kana-aas tug tub.

¹¹Levis cov tub yog: Nkesoos, Kauhas, hab Malalis.

¹²Yudas cov tub yog: Selas, Pelej hab Zelas. (Yudas muaj dlua ob tug tub yog Eles hab Aunaas, obtug tuag rua huv tebchaws Kana-aas lawm.) Peles ob tug tub yog: Hexeloos hab Hamaules.

¹³Ixakhas cov tub yog: Taulas, Puahas, Yasus hab Simeloos.

¹⁴Xenpuloos cov tub yog: Xelas, Eloos hab Yahelees.

¹⁵Ntawm nuav yog cov tub kws Le-as yug rua Yakhauj thaus nyob peg tebchaws Mexuputamias, xaam nwg tug ntxhais Dinas nrug puab. Taagnrho nwg cov tub hab cov ntxhais kws Le-as yug muaj peb caug peb leeg.

¹⁶Khas cov tub yog: Xefoos, Hankis, Sunis, Exenpoos, Elis, Alaudis hab Alelis.

¹⁷Aseles cov tub yog: Eenas, Isevas, Isevis, Npeliyas hab puab tug muam kws hu ua Selas. Npeliyas ob tug tub yog Henpeles hab Makhiyees.

¹⁸Kaum rau leej nuav puavleej yog Yakhauj cov xeebntxwv kws yog Le-as tug ntxhais qhev Xilepas kws Lanpaas muab rua nwg tug ntxhais Le-as yug.

¹⁹Laxees kws yog Yakhauj tug quaspuj yug tau ob tug tub rua Yakhauj yog: Yauxej hab Npeenyamees.

²⁰Nyob huv tebchaws Iziv Yauxej muaj ob tug tub, Manaxes hab Efalayees, obtug yog Pautifelas kws yog tug povthawj kws nyob huv lub nroog Aunis tug ntxhais Axenas yug.

²¹Npeenyamees cov tub yog: Npelas, Npekeles, Asenpees, Nkelas, Na-amas, Ehis, Lauses, Mupees, Hupees hab Alaudis.

²²Kaum plaub leeg nuav puavleej yog Yakhauj cov xeebntxwv kws yug lug ntawm Laxees.

²³Daas tug tub yog: Husees.

²⁴Nathalis cov tub yog: Yahexees, Nkunis, Yexes hab Silees.

²⁵Xyaa leej nuav puavleej yog Yakhauj cov xeebntxwv kws yog Laxees tug ntxhais qhev Nilehas kws Lanpaas muab rua nwg tug ntxhais Laxees yug.

²⁶Taagnrho Yakhauj cov tub hab cov xeebntxwv kws nrug nwg tsiv moog nyob nraag tebchaws Iziv muaj rau caum rau leej, tsi suav Yakhauj cov nyaab.

²⁷Xaam Yauxej ob tug tub kws yug nraag tebchaws Iziv rua hab, Yakhauj tsev tuabneeg muaj xyaa caum leej kws tsiv moog nyob nraag tebchaws Iziv.

²⁸Yakhauj khaiv Yudas ua ntej moog nug Yauxej kuas qha kev moog rua ntawm Nkausees. Thaus puab tub lug txug rua ntawm cheebtsaam Nkausees lawm,

²⁹Yauxej txhaj caij tsheb neeg moog ntsib nwg txiv rua ntawm Nkausees. Thaus obtug sis ntsib, Yauxej puag nkaus nwg txiv hab quaj ntev loo.

³⁰Yakhauj has rua Yauxej has tas, “Txawm yog kuv tuag los kuv yeej zoo sab, rua qhov kuv tub pum koj hab kuv paub has tas koj tseem muaj sa nyob.”

³¹Yauxej has rua nwg cov tijlaug hab nwg txiv tsev tuabneeg has tas, “Kuv yuav moog qha rua Falaus paub has tas, kuv cov kwvtij hab kuv txiv tsev tuabneeg kws nyob peg tebchaws Kana-aas tub lug txug kuv lawm.

³²Kuv yuav qha rua Falaus has tas, mej yog cov tuabneeg yug yaaj hab tu tsaj txhu, mas mej caab mej tej tsaj luj, tsaj miv hab coj taagnrho mej tej cuabyeej toomtxeem kws mej muaj nrug mej lug.

³³Thaus Falaus hu mej moog nug saib mej ua num dlaabtsi,

³⁴mej teb nwg has tas, ‘Peb hab peb cov yawmkoob yeej yog tuabneeg yug tsaj thaus u lug txug naj nub nua.’ Mej yuavtsum teb le nuav, nwg txhaj yuav ca mej nyob ntawm cheebtsaam Nkausees nuav.” Yauxej has le nuav rua qhov cov tuabneeg Iziv yeej ibtxwm tsi nyam cov tuabneeg yug yaaj.