Read Hmong Njua Chivkeeb 48 Bible Online

Chivkeeb 48 - Hmong Njua bible

Chivkeeb 48

¹Tom qaab ntawd muaj tuabneeg moog qha rua Yauxej has tas, nwg txiv mob nyaav heev. Yauxej txhaj coj nwg ob tug tub kws yog Manaxes hab Efalayees moog saib nwg txiv Yakhauj.

²Thaus muaj tuabneeg moog qha rua Yakhauj paub has tas, nwg tug tub Yauxej tuaj saib nwg, nwg txhaj ua tag sawv sau txaaj lug nyob quastsawg.

³Yakhauj has rua Yauxej has tas, “Vaajtswv tug kws muaj fwjchim luj kawg nkaus tau tshwm lug rua kuv pum peg lub nroog Luxes kws nyob huv tebchaws Kana-aas hab foom koob moov rua kuv.

⁴Vaajtswv has rua kuv tas, ‘Kuv yuav pub rua koj muaj tubki coob, koj cov xeebntxwv yuav fuamvaam moog ua ntau tsaav tuabneeg, kuv yuav muab lub tebchaws nuav pub rua koj cov xeebntxwv nyob ua puab tug moog ibtxhis le.’ ”

⁵Yakhauj rov has rua Yauxej has tas, “Koj ob tug tub kws yog Efalayees hab Manaxes kws yug ua ntej kuv lug nyob huv tebchaws Iziv nuav, obtug puavleej yog kuv tubki ib yaam le Lunpees hab Xime-oos obtug ntaag.

⁶Yog koj tseem muaj tub ntxiv, puab yuav tsi yog kuv cov tub lawm. Tej qubtxeeg qubteg kws puab yuav tau txais yog lug ntawm Efalayees hab Manaxes obtug lawm xwb.

⁷Thaus kuv rov peg tebchaws Mexuputamias lug, koj nam Laxees tau tuag rua huv tebchaws Kana-aas, tsi dleb ntawm Efalates, mas ua rua kuv tau kev quaj ntsuag, kuv txhaj muab nwg log rua ntawm ntug kev kws moog rua huv lub zog Efalates.” (Nwgnuav yog lub nroog Npelehees.)

⁸Thaus Yakhauj pum Yauxej ob tug tub, nwg nug has tas, “Ob tug tub nuav yog leejtwg?”

⁹Yauxej teb has tas, “Ob tug tub nuav yog kuv ob tug tub kws Vaajtswv muab pub rua kuv huv lub tebchaws Iziv nuav ntaag.” Yakhauj txawm has tas, “Coj obtug lug rua kuv saib, kuv yuav foom koob moov rua obtug.”

¹⁰Rua qhov Yakhauj noobnyoog laug heev lawm, nwg ob lub qhovmuag plooj hab pum kev tsi tseeb pistsawg. Yauxej txhaj coj Yauxej ob tug tub lug rua Yakhauj saib, Yakhauj txhaj puag nkaus hab nwj obtug.

¹¹Yakhauj has rua Yauxej tas, “Kuv tsi xaav has tas, kuv yuav rov pum koj lub ntsejmuag ib zag ntxiv le, tabsis nwgnuav Vaajtswv tub pub kuv pum koj cov mivnyuas lawm hab.”

¹²Ces Yauxej txhaj tsaws obtug ntawm Yakhauj xubndlag lug, Yauxej txhus caug ndlua nyo hau ua ntsejmuag ti nkaus huv aav pe Yakhauj.

¹³Yauxej tuav nwg ob tug tub teg moog cuag nwg txiv. Yauxej saab teg xis tuav Efalayees teg moog rua Yakhauj saab teg txhumphem, hab nwg saab teg txhumphem tuav Manaxes teg rua Yakhauj saab teg xis.

¹⁴Tabsis Yakhauj muab nwg ob txhais teg sis qhab, nwg cev nwg saab teg xis moog tuav Efalayees kws yog tug kwv lub taubhau, hab nwg cev nwg saab teg txhumphem moog tuav Manaxes kws yog tug tijlaug lub taubhau.

¹⁵Ces Yakhauj txawm foom koob moov rua Yauxej le nuav. “Thov Vaajtswv tug kws kuv yawmkoob Anplahaas hab kuv txiv Ixaj pehawm, foom koob moov rua ob tug mivtub nuav! Thov Vaajtswv tug kws coj kuv txuj hauv kev lug txug naj nub nua, foom koob moov rua obtug!

¹⁶Thov tug timtswv ceebtsheej kws nwg tau cawm kuv dlim ntawm tej kev ntxhuv sab, foom koob moov rua obtug! Thov kuas kuv lub npe, kuv yawm Anplahaas lub npe hab kuv txiv Ixaj lub npe nyob nrug ob tug tub nuav moog! Thov kuas obtug muaj tubki hab xeebntxwv fuamvaam ua ib tsaav tuabneeg coob.”

¹⁷Yauxej ntxhuv sab heev thaus nwg pum nwg txiv muab nwg txiv saab teg xis tso rua sau Efalayees taubhau, yog le ntawd, nwg txhaj tshem nwg txiv txhais teg sau Efalayees taubhau moog tso rua sau Manaxes taubhau.

¹⁸Yauxej has rua Yakhauj has tas, “Txiv, ua le ko tsi yog lawm. Tug nuav yog tug tub hlub, tso koj txhais teg xis rua sau nwg taubhau.”

¹⁹Yakhauj tsi kaam, nwg has tas, “Tub, kuv paub lawm, kuv paub zoo. Manaxes cov xeebntxwv yuav fuamvaam coob hab ua ib tsaav tuabneeg tseemceeb. Tabsis nwg tug kwv yuav tau ua tuabneeg tseemceeb dlua tug tijlaug, hab nwg tej xeebntxwv tseem yuav fuamvaam coob hab ua ntau tsaav tuabneeg.”

²⁰Yog le ntawd, nub ntawd Yakhauj txhaj foom koob moov rua obtug has tas, “Yog cov Yixalayees foom koob moov rua ib tug twg, puab yuavtsum tuav meb ob lub npe. Puab yuav has tas, ‘Thov Vaajtswv foom koob moov rua koj lawv le nwg tau foom rua Efalayees hab Manaxes obtug.’ ” Qhov kws Yakhauj ua le nuav tub yog nwg muab Efalayees tso ua Manaxes ntej.

²¹Ces Yakhauj has rua Yauxej has tas, “Koj tub pum lawm has tas, kuv tub yuav tuag, tabsis Vaajtswv yuav nrug nraim koj nyob hab yuav coj koj rov qaab moog nyob peg koj tej yawmkoob lub tebchaws.

²²Kuv yuav muab lub nroog Sekhees, cheebtsaam kws zoo ua noj ua haus kws kuv nqaa ntaaj nqaa neev moog txeeb tau ntawm cov tuabneeg Amaules teg lug, pub rua koj ua koj tug, kuv tsi pub rua koj cov tijlaug.”