Read Hmong Njua Chivkeeb 5 Bible Online

Chivkeeb 5 - Hmong Njua bible

Chivkeeb 5

¹Ntawm nuav moog yog has txug Adaas tej xeebntxwv. (Thaus Vaajtswv tsim tuabneeg, nwg tsim zoo le nwg tug yaam ntxwv ntaag.

²Vaajtswv tsim tau ib tug txivneej hab ib tug quaspuj. Vaajtswv foom koob moov rua obtug, tis npe rua obtug hab hu obtug ua “Noobneej.”)

³Thaus Adaas muaj ib puas peb caug xyoo lawm, nwg muaj dlua ib tug tub zoo le nwg, hab nwg tis npe hu ua Xej.

⁴Dlhau ntawd lug, Adaas tseem ua neej nyob tau yim pua xyoo, hab nwg tseem muaj mivnyuas coob leej ntxiv

⁵nwg tuag rua thaus nwg noobnyoog muaj cuaj pua peb caug xyoo.

⁶Thaus Xej noobnyoog muaj ib puas tsib xyoos, nwg muaj ib tug tub hu ua Enauses,

⁷dlhau ntawd lug nwg tseem ua neej nyob tau yim pua xyaa xyoo hab nwg tseem muaj mivnyuas coob leej ntxiv,

⁸nwg tuag rua thaus nwg noobnyoog muaj cuaj pua nkaum ob xyoos.

⁹Thaus Enauses noobnyoog muaj cuaj caum xyoo, nwg muaj ib tug tub hu ua Kenaas,

¹⁰dlhau ntawd lug nwg tseem ua neej nyob tau yim pua kaum tsib xyoos, hab nwg tseem muaj mivnyuas coob leej ntxiv;

¹¹nwg tuag rua thaus nwg noobnyoog muaj cuaj pua tsib xyoos.

¹²Thaus Kenaas noobnyoog muaj xyaa caum xyoo, nwg muaj ib tug tub hu ua Mahalalees,

¹³dlhau ntawd lug nwg tseem ua neej nyob tau yim pua plaub caug xyoo, hab nwg tseem muaj mivnyuas coob leej ntxiv.

¹⁴Nwg tuag rua thaus nwg noobnyoog muaj cuaj pua kaum xyoo.

¹⁵Thaus Mahalalees noobnyoog muaj rau caum tsib xyoos, nwg muaj ib tug tub hu ua Yales,

¹⁶dlhau ntawd lug nwg tseem ua neej nyob tau yim pua peb caug xyoo, hab nwg tseem muaj mivnyuas coob leej ntxiv.

¹⁷Nwg tuag rua thaus nwg noobnyoog muaj yim pua cuaj caum tsib xyoos.

¹⁸Thaus Yales noobnyoog muaj ib puas rau caum ob xyoos, nwg muaj ib tug tub hu ua Enauj,

¹⁹dlhau ntawd lug nwg tseem ua neej nyob tau yim pua xyoo, hab nwg tseem muaj mivnyuas coob leej ntxiv.

²⁰Nwg tuag rua thaus nwg noobnyoog muaj cuaj pua rau caum ob xyoos.

²¹Thaus Enauj noobnyoog muaj rau caum tsib xyoos, nwg muaj ib tug tub hu ua Methuxelas.

²²Dlhau ntawd lug, nwg tseem ua neej nyob fwm hab pehawm Vaajtswv tau peb puas xyoo, hab nwg tseem muaj mivnyuas coob leej ntxiv.

²³Nwg ua neej nyob tau peb puas rau caum tsib xyoos.

²⁴Enauj ua nwg lub neej nrug Vaajtswv sis raug zoo, ces nwg txawm ca le pluj lawm, rua qhov Vaajtswv coj nwg moog lawm.

²⁵Thaus Methuxelas noobnyoog muaj ib puas yim caum xyaa xyoo, nwg muaj ib tug tub hu ua Lamej,

²⁶dlhau ntawd lug nwg tseem ua neej nyob tau xyaa pua yim caum ob xyoo, hab nwg tseem muaj mivnyuas coob leej ntxiv.

²⁷Nwg tuag rua thaus nwg noobnyoog muaj cuaj pua rau caum cuaj xyoos.

²⁸Thaus Lamej noobnyoog muaj ib puas yim caum ob xyoos, nwg muaj ib tug tub,

²⁹Lamej muab tis npe hu ua Nau-es, Lamej has tas, “Tug mivnyuas nuav yuav paab peb ris lub nraa nyaav ntawm thaaj aav kws raug Vaajtswv foom tsi zoo lawm kuas sib.”

³⁰Dlhau ntawd lug Lamej tseem ua neej nyob tau tsib puas cuaj caum tsib xyoos, hab nwg tseem muaj mivnyuas coob leej ntxiv.

³¹Nwg tuag rua thaus nwg noobnyoog muaj xyaa pua xyaa caum xyaa xyoo.

³²Thaus Nau-es noobnyoog muaj tsib puas xyoo lawm, nwg maam le muaj peb tug tub, Xees, Haas, hab Yafej.