Read Hmong Njua Chivkeeb 50 Bible Online

Chivkeeb 50 - Hmong Njua bible

Chivkeeb 50

¹Yauxej puag nkaus nwg txiv quaj hab nwj kag nwg txiv lub ntsejmuag.

²Ces Yauxej txhaj has rua cov kws tshuaj lug tu hab muab tshuaj pleev nwg txiv lub cev.

³Puab txhaj muab tshuaj pleev hab tu ntshis nwg txiv lub cev tau plaub caug nub kuas tsi xob lwj. Cov tuabneeg Iziv tuaj nrug paam hab quaj nyav Yakhauj tau xyaa caum nub.

⁴Thaus dlhau xyaa caum nub ntawd lawm, Yauxej has rua Falaus cov numtswv has tas, “Thov mej paab coj kuv cov lug nuav moog has rua Falaus has tas,

⁵‘Thaus kws kuv txiv yuav tuag, nwg kuas kuv coglug rua nwg has tas, kuv yuavtsum coj nwg moog log rua huv lub qhov ntxaa kws nwg tub npaaj tseg rua nwg nyob peg tebchaws Kana-aas lawm. Mas thov Falaus ca kuv coj kuv txiv moog log taag kuv maam rov qaab lug.’ ”

⁶Falaus teb has tas, “Koj ca le coj koj txiv moog log lawv le koj tau coglug tseg rua nwg lawm.”

⁷Ces Yauxej txhaj coj nwg txiv moog log. Taagnrho Falaus cov numtswv, cov kev txwj quas laug kws tu plaub ntug, hab cov thawjcoj huv tebchaws Iziv puavleej nrug Yauxej moog.

⁸Yauxej tsev tuabneeg, nwg cov tijlaug tsev tuabneeg, hab nwg txiv tsev tuabneeg puavleej nrug nwg coj nwg txiv lub cev moog log, tsuas tseg puab tej mivnyuas, tej yaaj, tej tshis hab tej nyuj nyob huv cheebtsaam Nkausees xwb.

⁹Cov tuabneeg kws caij tsheb neeg hab cov tubrog caij neeg nrug Yauxej puab moog coob kawg le.

¹⁰Thaus puab moog txug ntawm lub tshaav ntaus nplej Athas kws nyob saab nubtuaj ntawm tug Dlej Yauladees, puab suavdlawg quaj nyav hab paam Yauxej txiv lawv le kevcai tau xyaa nub.

¹¹Thaus cov tuabneeg Kana-aas pum cov tuabneeg nuav tuaj quaj nyav ntawm lub tshaav ntaus nplej Athas puab has tas, “Cov tuabneeg Iziv lub nteeg tuag nuav yog lub nam nteeg kws luj kawg le.!” Tub yog vim le nuav txhaj tis npe rua thaaj chaw ntawd hu ua Anpees Mixalayees.

¹²Yakhauj cov tub tau ua lawv le kws Yakhauj tau has tseg rua puab lawm,

¹³Puab txhaj kwv puab txiv moog peg tebchaws Kana-aas, hab muab log rua huv lub qhov tsua kws nyob huv Makhepelas thaaj teb kws nyob ntawm Maales saab nubtuaj kws Anplahaas yuav ntawm Efaloos kws yog tug tuabneeg Hitis lug ca ua chaw log tuag.

¹⁴Tom qaab kws Yauxej muab nwg txiv log taag lawm, nwg nrug nwg cov tijlaug hab cov tuabneeg kws nrug nwg moog ntawd, rov qaab lug rua nraag tebchaws Iziv lawm.

¹⁵Tom qaab kws puab txiv tuag lawm, Yauxej cov tijlaug has tas, “Peb yuav ua le caag, yog Yauxej tseem ntxub peb hab ua phem pauj tej kev phem kws peb tau ua rua nwg lawm?”

¹⁶Yog le ntawd, puab txhaj tso tuabneeg moog has rua Yauxej le nuav tas, “Ua ntej kws peb txiv tuag,

¹⁷nwg has kuas peb tuaj has rua koj tas, ‘Thov koj zaam koj cov tijlaug tej kev txhum kws puab tau ua rua koj lawm.’ Mas nwgnuav thov koj zaam txim rua peb cov kws yog koj txiv tug Vaajtswv cov tubkhai hab tej kws peb tau ua taag lug lawm.” Yauxej quaj heev thaus nwg nov dlheev tej lug nuav.

¹⁸Ces Yauxej cov tijlaug txawm ua ke tuaj cuag Yauxej hab qhau cev hlo ntawm nwg xubndlag pe nwg. Puab has tas, “Peb suavdlawg yog koj cov tubqhe.”

¹⁹Yauxej has rua puab tas, “Mej tsi xob ntshai, kuv tsi muaj cuabkaav tsaav kuv lub fwjchim kuas luj dlua Vaajtswv?

²⁰Mej tau tuavhuv ua phem rua kuv lawm tag, tabsis Vaajtswv tau muab qhov phem ntawd hloov ua qhov zoo, ua le ntawd txhaj cawm tau coob leej txujsa, ib yaam le mej pum nub nua ntaag.

²¹Mej cov ua tij tsi xob ntshai. Kuv yuav ua tug saib mej hab mej tej mivnyuas.” Yog le ntawd, Yauxej txhaj ntuag puab ntawm lub sab dlawb paug hab ua rua puab kaaj sab ua neej.

²²Yauxej ua neej nrug nwg txiv tsev tuabneeg nyob huv tebchaws Iziv, Yauxej muaj noobnyoog ib puas kaum xyoo nwg maam le tuag.

²³Nwg ua neej nyob txug thaus nwg pum Efalayees cov mivnyuas hab cov xeebntxwv huv tuabsi. Hab nwg tseem nyob moog txug thaus kws nwg pum Manaxes tug tub Makhis cov mivnyuas lawm hab.

²⁴Nwg has rua nwg cov kwvtij has tas, “Tshuav tsi ntev kuv tub yuav tuag, tabsis Vaajtswv yuav ua tug tsomkwm mej hab coj mej tawm huv lub tebchaws nuav moog rua peg lub tebchaws kws nwg tau coglug tseg has tas, nwg yuav muab pub rua Anplahaas, Ixaj hab Yakhauj puab.”

²⁵Ces Yauxej has kuas cov Yixalayees coglug rua nwg has tas, “Mej coglug tseg rua kuv, yog thaus twg Vaajtswv coj mej moog peg tebchaws Kana-aas, mej yuavtsum nqaa kuv cov pobtxhaa nrug mej moog hab.”

²⁶Yauxej tuag huv tebchaws Iziv thaus nwg muaj noobnyoog ib puas kaum xyoo. Puab muab tshuaj pleev nwg lub cev hab muab tso rua huv hleb tseg.