Read Hmong Njua Chivkeeb 6 Bible Online

Chivkeeb 6 - Hmong Njua bible

Chivkeeb 6

¹Thaus tuabneeg fuamvaam moog nyob puv nplajteb, hab yug tau tej ntxhais coob,

²muaj ib cov timtswv qaum ntuj pum cov ntxhais ntawd zoo nkauj heev, yog le ntawd puab txawm tuaj yuav cov ntxhais kws puab nyam ua quaspuj.

³Ces tug TSWV has tas, “Kuv yuav tsi pub tuabneeg muaj sa nyob ntev moog ibtxhis, rua qhov puab yog tuabneeg kws txawj tuag. Txij nuav moog puab tsuas muaj sa nyob ntev le ib puas neeg nkaum xyoo lawm xwb.”

⁴Tam ntawd hab tam tom qaab nuav, muaj cov tuabneeg luj heev nyob huv nplajteb nuav, puab yog xeebntxwv ntawm tuabneeg nplajteb tej ntxhais kws yuav cov timtswv qaum ntuj. Puab yog cov tuabneeg kws ua tau heev hab muaj koob meej nyob txheej thaus u lug lawm.

⁵Thaus tug TSWV pum txhua tug tuabneeg kws nyob huv nplajteb nuav, muaj lub sab ua phem ua qas hab xaav phem txhua lub sijhawm,

⁶tug TSWV tu sab hab khauvxwm qhov kws nwg tsim tuabneeg lug nyob huv lub nplajteb nuav. Nwg tu sab kawg le.

⁷Yog le ntawd, tug TSWV txhaj has tas, “Kuv yuav muab cov tuabneeg kws kuv tau tsim nuav hab tej tsaj luj tsaj miv, tej noog kws yaa sau nruab ntug ua kuas puamtsuaj huv tuabsi moog. Kuv tu sab heev, vim kuv tau tsim puab lug.”

⁸Tabsis tug TSWV txaus sab heev rua Nau-es.

⁹Zaaj nuav yog has txug Nau-es lub neej. Nau-es muaj peb leeg tub, Xees, Haas hab Yafej. Nau-es yog ib tug tuabneeg ncaaj nceeg hab nwg yeej ibtxwm ua zoo taag nwg simneej. Nwg ua neej lawv le Vaajtswv sab nyam,

¹¹tabsis dlua le lwm tug, Vaajtswv pum has tas suavdlawg puavleej ua txhum huv tuabsi, hab pheej ua kev phem kev qas heev zuj zug moog thoob plawg txhua qhov chaw.

¹²Vaajtswv saib lub nplajteb, nwg pum kev phem kev qas puv nkaus, rua qhov tej tuabneeg puavleej ua phem kawg le.

¹³Vaajtswv txhaj has rua Nau-es has tas, “Kuv txav txim sab yuav ua kuas tuabneeg tuag tu noob. Kuv yuav ua kuas puab raug kev puamtsuaj taag huv tuabsi moog, rua qhov lub nplajteb nuav puv nkaus puab txujkev ua nruj ua tsiv xwb.

¹⁴Koj ca le moog muab cov ntoo kubtwg lug txua ua ib lub nkoj, ua kuas muaj ntau chaav rua huv lub nkoj ntawd hab muab roj ntoos lug leem kuas thoob plawg saab huv hab saab nrau huv tuabsi.

¹⁵Txua lub nkoj ntawd qhov ntev kuas muaj peb puas tshim, qhov dlaav kuas muaj tsib caug tshim, hab qhov sab kuas muaj peb caug tshim.

¹⁶Muab vuag vuv lub nkoj ntawd rua hab tseg le ib tshim thoob plawg, tsi xob xov kuas ti rua sau cov vuag. Lub nkoj ntawd ua kuas muaj peb tshooj hab ua lub qhovrooj rua ib saab.

¹⁷Kuv yuav tso dlej lug nyaab lub nplajteb nuav kuas txhua tsaav yaam kws muaj sa nyob raug puamtsuaj moog. Txhua yaam kws nyob huv nplajteb nuav yuav tuag taag huv tuabsi.

¹⁸Tabsis kuv yuav coglug rua koj. Koj ca le coj koj tug quaspuj, koj cov tub, hab koj cov nyaab moog nyob huv lub nkoj.

¹⁹Coj txhua yaam tsaj ib yaam ib nkawg hab txhua yaam noog ib yaam ib nkawg nrug koj moog nyob huv lub nkoj, kuas tej tsaj ntawd txhaj tsi tuag.

²¹Npaaj txhua yaam zaub mov coj moog rua koj tsev tuabneeg hab tej tsaj tau noj nyob huv lub nkoj.”

²²Nau-es txhaj ua txhua yaam lawv le Vaajtswv tau has.