Read Hmong Njua Chivkeeb 9 Bible Online

Chivkeeb 9 - Hmong Njua bible

Chivkeeb 9

¹Vaajtswv foom koob moov rua Nau-es hab nwg cov tub has tas, “Mej yuav muaj tub muaj ki coob, kuas mej txhaj muaj xeebntxwv fuamvaam moog nyob puv nplajteb.

²Txhua yaam tsaj, tsi has tsaj nyeg, tsaj qus, naab, qaav, naag noog, hab tej ntseg puavleej ntshai mej. Kuv yuav muab tej tsaj ntawd tso rua mej kaav.

³Txij nuav moog kuv pub txhua yaam tsaj, noog, hab ntseg rua mej noj, ib yaam le tej zaub kws kuv tub pub rua mej noj lawm.

⁴Tabsis mej tsi xob noj tej nqaj kws txhaam ntshaav, rua qhov ntshaav yog yaam kws ua kuas muaj txujsa.

⁵Yog leejtwg tua tuabneeg, kuv yuav rau txim tuag rua tug ntawd. Yog tej tsaj tum tuabneeg tuag, kuv yuav rau txim tuag rua tej tsaj ntawd ib yaam nkaus.

⁶Yog leejtwg tua tuabneeg, mas lwm tug yuav muab tug ntawd tua ib yaam nkaus, rua qhov Vaajtswv tsim tuabneeg muaj tug yaam ntxwv zoo le Vaajtswv.

⁷“Mej yuav muaj tubki coob, kuas mej tej xeebntxwv fuamvaam moog nyob puv lub nplajteb.”

⁸Vaajtswv has rua Nau-es hab nwg cov tub tas,

⁹“Txij nuav moog kuv coglug tseg rua koj hab koj cov xeebntxwv,

¹⁰hab txhua yaam kws muaj sa, txhua yaam noog, hab txhua yaam tsaj kws nrug mej tawm huv lub nkoj lug.

¹¹Kuv coglug tseg rua mej has tas: kuv yuav tsi tso dlej lug nyaab txhua yaam kws muaj sa kuas puamtsuaj le zag nuav, hab dlej yuav tsi nyaab lub nplajteb kuas puamtsuaj le nuav ib zag ntxiv lawm.

¹²Lub cim kws kuv coglug tseg moog ibtxhis rua mej hab txhua yaam kws muaj sa,

¹³mas yog kuv yuav ua kuas muaj ib tug dluab zaaj sawv rua sau cov fuab. Tug dluab zaaj ntawd yog lub cim kws kuv coglug tseg nrug tuabneeg nplajteb.

¹⁴Thaus twg kuv ua kuas muaj fuab roog sau nruab ntug, ces tug dluab zaaj ntawd yuav tshwm tuaj rua sau cov fuab.

¹⁵Kuv yuav ncu ntsoov tej lug kws kuv cog tseg rua mej hab txhua yaam tsaj, mas kuv yuav tsi tso dlej lug nyaab txhua yaam kws muaj sa kuas puamtsuaj ib zag ntxiv le lawm.

¹⁶Thaus tug dluab zaaj sawv tshwm sau cov fuab, kuv pum tug dluab zaaj ntawd, kuv yuav ncu txug tej lug kws kuv tau cog tseg moog ibtxhis rua mej hab txhua yaam kws muaj sa nyob huv nplajteb nuav.

¹⁷Tug dluab zaaj nuav yog lub cim kws kuv coglug tseg rua txhua yaam kws muaj sa nyob huv nplajteb.”

¹⁸Nau-es cov tub kws tawm huv lub nkoj lug yog: Xees, Haas hab Yafej. (Haas yog Kana-aas txiv.)

¹⁹Nau-es peb leeg tub nuav yog txhua tsaav tuabneeg kws nyob huv nplajteb nuav cov yawmkoob.

²⁰Nau-es yog tuabneeg ua laj ua teb, nwg yog thawj tug kws xub cog txiv maab ntaag.

²¹Thaus nwg haus kua txiv maab, ua rua nwg qaug heev, hab nwg ca le hle rig tsho pw labqaab huv tsevntaub.

²²Thaus Haas kws yog Kana-aas txiv, pum nwg txiv pw labqaab le ntawd, nwg txawm tawm moog has qha rua nwg ob tug tijlaug.

²³Ces Xees hab Yafej txhaj moog muab tau ib lub tsho ntev nthuav kag rua nrau obtug nrausqaum hab muab khuam rua sau obtug xubpwg. Obtug txhaj kwv thaub qaab moog rua huv lub tsevntaub coj moog npug obtug txiv, obtug tig ntsejmuag rua ib caag vim obtug tsi xaav pum obtug txiv labqaab le ntawd.

²⁴Thaus Nau-es zoo cawv tsim lug nwg paub tej kws nwg tug tub ntxawg ua rua nwg,

²⁵Nau-es txhaj has tas, “Kana-aas raug foom tsi zoo lawm! Nwg yuav ua nwg ob tug tijlaug qhev.

²⁶Ca le ua tug TSWV kws yog Xees tug Vaajtswv tsaug! Kana-aas yuav ua Xees qhev moog le.

²⁷Thov kuas Vaajtswv ua rua Yafej caajceg fuamvaam! Thov Vaajtswv ca Yafej tej xeebntxwv nrug Xees tsaav tuabneeg nyob ua ke. Kana-aas yuav ua Yafej qhev.”

²⁸Tom qaab dlej nyaab nplajteb taag lawm, Nau-es tseem ua neej nyob tau peb puas tsib caug xyoo ntxiv,

²⁹hab nwg tuag rua thaus nwg noobnyoog muaj cuaj pua tsib caug xyoo.