Read Hmong Njua 2 Xamuyees 1 Bible Online

2 Xamuyees 1 - Hmong Njua bible

2 Xamuyees 1

¹Tom qaab kws Xa-ules tuag lawm, Daviv moog tua yeej cov Amalej hab nwg rov lug nyob tau ob nub huv lub nroog Xikelas.

²Nub tom qaab muaj ib tug tub hluas tsiv huv Xa-ules lub yeej lug. Nwg muab nwg tej rig tsho dlua ndluag taag hab tsuab moov aav rua sau nwg taubhau, rua qhov nwg tu sab heev, nwg lug cuag Daviv hab nyo hau hawm Daviv.

³Daviv nug nwg has tas, “Koj lug qhov twg lug?” Nwg teb has tas, “Kuv tsiv huv cov Yixalayees lub yeej lug.”

⁴Daviv has tas, “Muaj xwm dlaabtsi, ca le qha rua kuv.” Nwg teb has tas, “Peb cov tubrog tawg tsiv huv tshaav rog taag, hab peb cov tuabneeg raug tua tuag coob kawg le. Xa-ules hab nwg tug tub Yaunathaas raug luas tua tuag lawm hab.”

⁵Daviv nug nwg has tas, “Ua le caag koj txhaj paub has tas, Xa-ules hab Yaunathaas obtug raug tua tuag lawm?”

⁶Nwg teb has tas, “Thaus ntawd kuv nyob sau lub Roob Nkinpau-as. Kuv pum Xa-ules puag rawv nwg raab muv, cov yeebncuab tej tsheb neeg hab cov tubrog caij neeg tuaj ze zuj zug lawm.

⁷Ces Xa-ules txawm tig lug pum dlheev kuv hab nwg hu kuv. Kuv txhaj nug has tas, ‘Koj has dlaabtsi?’.

⁸Nwg nug kuv has tas, ‘Koj yog leejtwg?’ Kuv teb nwg has tas, ‘Kuv yog ib tug tub hluas Amalej.’

⁹Nwg has tas, ‘Kuv raug mob saab heev, ua caag los kuv yeej yuav tuag, koj ca le lug ntawm nuav hab loos kuas kuv tuag!’

¹⁰Yog le ntawd, kuv txhaj muab nwg loos tuag lawm, rua qhov kuv paub has tas, thaus nwg qaug lawm nwg yeej yuav tuag xwb. Ces kuv txhaj hle lub mom sau nwg taubhau hab dlaws txuj saw ntawm nwg ncej npaab nqaa lug rua koj kws yog kuv tug tswv.”

¹¹Daviv dlua rhe Daviv lub tsho quaj tu sab kawg le, hab taagnrho nwg cov tubrog los puavleej ua ib yaam nkaus.

¹²Puab tu sab, quaj hab yoo mov moog txug thaus yuav tsaus ntuj, vim Xa-ules, Yaunathaas hab cov tubrog Yixalayees kws yog tug TSWV cov tuabneeg raug tua tuag coob heev rua huv tshaav rog lawm.

¹³Daviv nug tug tub hluas kws lug fi xuv rua Daviv ntawd has tas, “Koj nyob qhov twg tuaj?” Nwg teb has tas, “Kuv yog tuabneeg Amalej, tabsis kuv nyob huv koj lub tebchaws.”

¹⁴Daviv nug nwg ntxiv has tas, “Vim le caag koj txhaj khuv muab tug vaajntxwv kws tug TSWV xaiv ntawd tua povtseg?”

¹⁵Ces Daviv txhaj hu nwg cov tubrog ib tug lug hab has tas, “Ca le muab tug hluas nuav tua povtseg!” Tug tubrog ntawd txhaj muab tug hluas Amalej ntawd ntaus hab tua tuag kag lawm.

¹⁶Daviv has rua tug tub hluas Amalej ntawd has tas, “Koj coj lub txim nuav lug rua koj nkaus xwb. Koj rov rau txim rua koj, thaus koj leeg has tas, koj tau tua tug vaajntxwv kws tug TSWV tau xaiv tseg lawm.”

¹⁷Daviv hu ib zaaj nkauj quaj ntsuag rua Xa-ules hab Yaunathaas,

¹⁸hab nwg kuas muab zaaj nkauj ntawd qha rua cov pejxeem Yudas kawm huv tuabsi. (Zaaj nkauj ntawd muab sau tseg rua huv Yasas phoo ntawv.)

¹⁹“Peb cov thawjcoj tuag taag rua sau cov Yixalayees tej ncov roob! Peb cov tubrog kws sab tawv qaug taag huv tuabsi lawm!

²⁰Tsi xob qha zaaj nuav rua huv lub nroog Nkas lossis ntawm tej kev huv lub nroog Asekeloos; tsi xob ua rua cov quaspuj Filitees zoo sab; tsi xob ua rua tej ntxhais kws yog cov tuabneeg tsi ua kevcai txav zoo sab.

²¹“Thov kuas tsi xob muaj naag lossis lwg poob lug rua sau Nkinpau-as tej ncov roob; Thov kuas Nkipau-as tej laj teb qhuav nkig nkuav moog le. Vim cov tubrog kws sab tawv muab puab tej thaiv nav ntaaj tso povtseg ua rua peb poob ntsejmuag kawg le. Xeb yuav noj Xa-ules dlaim thaiv nav ntaaj vim tsi muaj roj pleev lawm.

²²Yaunathaas raab neevnti yeej tsi rov qhuav nkuag ntawm tug tuabneeg raug luas tua cov tshaav lug, hab Xa-ules raab ntaaj tsi rov qhuav nkuag ntawm tug tuabneeg kws muaj zug tej roj lug le.

²³“Xa-ules hab Yaunathaas zoo heev hab ntxim nyam kawg le; ua neej nyob ua ke, tuag moog ua ke; obtug dlha ceev tshaaj dlaav yaa, muaj zug tshaaj tsuv ntxhuav.

²⁴“Cov quaspuj Yixalayees, quaj nyav vim Xa-ules! Nwg muab tej tab ntaub tsuj lug rua mej naav, hab muab saw nyaj saw kub lug rua mej coj.

²⁵“Cov tubrog kws sab tawv qaug taag lawm, Puab raug tua tuag rua huv tshaav rog, Yaunathaas tuag pw xyaab leeg sau ncov roob.

²⁶“Kuv quaj ntsuag rua koj, kuv tug kwvluag Yaunathaas; koj ua zoo rua kuv kawg koj nplooj sab! Koj hlub kuv kawg nkaus le; tseem hlub tshaaj tej quaspuj hlub lawm hab.

²⁷“Cov tubrog kws sab tawv qaug taag huv tuabsi; Puab tej cuabyeej ua rog muab tso tseg taagnrho hab tsi zoo siv lawm.”