Read Hmong Njua 2 Xamuyees 10 Bible Online

2 Xamuyees 10 - Hmong Njua bible

2 Xamuyees 10

¹Tau tsi ntev lug tom qaab nuav cov Amoos tug Vaajntxwv Nahases tuag lawm, nwg tug tub Hanoos ua vaajntxwv hloov nwg chaw.

²Vaajntxwv Daviv has tas, “Kuv yuav moog cog phoojywg nrug Hanoos, ib yaam le nwg txiv Nahases tau ua rua kuv lawm.” Yog le ntawd, Daviv txhaj tso nwg cov tubkhai moog nplig Hanoos sab, vim nwg txiv tuag lawm. Thaus puab moog txug huv tebchaws Amoos,

³cov Amoos tej thawjcoj tuaj has rua vaajntxwv tas, “Koj xaav has tas, Daviv tso cov tuabneeg nuav tuaj nplig koj sab, vim qhov kws nwg fwm koj txiv nua los? Tsi yog le ntawd! Yog nwg tso puab tuaj tshuaj saib lub nroog nuav, kuas nwg txhaj tua yeej peb xwb los sas.”

⁴Hanoos txhaj nteg Daviv cov tuabneeg, muab puab tej fwjtxwv chais ib saab, muab puab tej rig tsho txav ntshi kaaj nab ti nkaus peg dluav hab tso puab rov qaab lug tsev.

⁵Ua rua puab txaajmuag rov lug tsev. Thaus Daviv nov has tas muaj tej xwmtxheej nuav, Daviv txhaj khaiv tuabneeg moog has kuas puab nyob tuabywv huv lub nroog Yelikaus moog txug thaus puab tej fwjtxwv rov ntev tuaj tsaiv.

⁶Cov Amoos paub has tas, puab ua rua Daviv ua yeebncuab rua puab lawm, yog le ntawd, puab txhaj ndlav cov Xilias neeg nkaum txheeb leej tubrog kws nyob huv lub nroog Npelehaus hab Xaunpas, kaum ob txheeb leej txivneej huv lub nroog Taunpes hab cov Ma-akas tug vaajntxwv nrug nwg ib txheeb leej txivneej tuaj paab cov Amoos.

⁷Daviv nov le ntawd, nwg txhaj has kuas Yau-am coj taagnrho cov tubrog moog tua puab.

⁸Cov Amoos tuaj nyob taagnrho rua ntawm puab tej chaw tog sis tua ntawm txuj ncauj ke moog rua huv lub nroog Lanpes kws yog puab lub tuamceeb nroog, ua ntej cov Xilias hab cov tuabneeg kws nyob Taunpas hab Makhas moog nyob rua ntawm puab tej chaw tom roob mojsaab.

⁹Yau-am pum yeebncuab cov tubrog kws tuaj tog tua nwg nyob puv nkaus tom ntej tom qaab huv tuabsi lawm. Yog le ntawd, nwg txhaj xaiv kag cov tubrog Yixalayees kws khov kho hab sab tawv, moog sawv tim ntsej tim muag cov Xilias.

¹⁰Nwg muab cov tubrog kws seem tso rua nwg tug kwv Anpisais ua tug saib, Anpisais coj puab moog sawv tim ntsej tim muag cov Amoos.

¹¹Yau-am has rua Anpisais has tas, “Yog koj pum cov Xilias tua yeej kuv, koj ca le lug paab kuv, hab yog kuv pum cov Amoos tua yeej koj, ces kuv lug paab koj.

¹²Ua sab tawv qhawv hab cuab zug khov kho! Ca le tua tag pub rua peb cov pejxeem hab pub rua Vaajtswv tej nroog. Hab thov kuas ua lawv le tug TSWV pum zoo.”

¹³Yau-am hab nwg cov tubrog naam zog moog sis tua, cov Xilias ca le swb hab tig tsiv rov qaab.

¹⁴Thaus cov Amoos pum cov Xilias swb hab tsiv lawm, puab ca le tsi tiv Anpisais hab tsiv moog nkaum rua huv nroog. Ces Yau-am txhaj tseg tsi tua cov Amoos hab thim rov qaab lug rua huv lub nroog Yeluxalees lawm.

¹⁵Cov Xilias paub has tas, puab swb cov Yixalayees lawm, yog le ntawd, puab txhaj hu taagnrho puab cov tubrog tuaj txoos ua ke.

¹⁶Vaajntxwv Hadadexes khaiv tuabneeg moog hu cov Xilias kws nyob ntawm tug dlej Efalates saab nubtuaj hab puab tuaj rua huv lub nroog Helaas kws yog Hadadexes tug thawj tubrog Xaunpas ua tug kaav.

¹⁷Thaus Daviv nov le ntawd, nwg txhaj hu taagnrho cov tubrog Yixalayees tuaj ua ke, puab hlaa tug dlej Yauladees moog rua saab tim, hab moog rua ntawm Halaas, qhov chaw kws cov Xilias tuaj tsuam yeej taabmeeg nwg. Ces puab txawm pib sis tua,

¹⁸cov tubrog Yixalayees muab cov tubrog Xilias lawv tsiv tsi yeej rov qaab. Daviv hab nwg cov tubrog tua cov tubrog Xilias tsaav tsheb neeg tuag xyaa pua leej hab cov tubrog caij neeg tuag plaub caug txheeb leej. Hab puab tua raug Saunpas kws yog cov yeebncuab tug thawj tubrog. Nwg txhaj tuag rua huv tshaav rog lawm.

¹⁹Thaus cov vaajntxwv kws ua Hadadexes qhev paub has tas, puab swb cov Yixalayees lawm, puab txhaj tuaj ua phoojywg rua cov Yixalayees hab leeg ua cov Yixalayees qhev. Cov Xilias ntshai moog paab cov Amoos ntxiv lawm.