Read Hmong Njua 2 Xamuyees 11 Bible Online

2 Xamuyees 11 - Hmong Njua bible

2 Xamuyees 11

¹Xyoo tom qaab, thaus lub caij nplooj ntoos hlaav, yog lub caij kws cov vaajntxwv ibtxwm tawm moog tua rog. Daviv txhaj khaiv Yau-as nrug nwg cov numtswv hab cov tubrog Yixalayees moog tua rog; puab txhaj moog tua yeej cov Amoos hab moog vij lub nroog Lanpas, tabsis Daviv nyob huv lub nroog Yeluxalees.

²Muaj ib nub thaus taav su dlua, Daviv sawv sau nwg lub txaaj nce moog rua sau ruv tsev qhov kws taj taj. Daviv ncig moog ncig lug sau, nwg pum ib tug quaspuj taabtom dlaa dlej huv tug quaspuj ntawd lub tsev, tug quaspuj ntawd zoo nkauj heev.

³Yog le ntawd, Daviv txhaj khaiv tuabneeg moog nug saib tug quaspuj ntawd yog leejtwg. Thaus paub has tas, tug quaspuj ntawd yog Eli-as tug ntxhais Npasenpas, hab yog Uliyas kws yog tuabneeg Hitis tug quaspuj.

⁴Daviv khaiv tuabneeg moog hu Npasenpas, puab txhaj moog coj Npasenpas tuaj cuag Daviv, ces Daviv ca le coj nwg moog nrug Daviv pw. (Npasenpas nyavnyuas coj khaub dluag dlua hab ua kevcai ntxuav taag xwb.) Ces Npasenpas txawm rov moog tsev lawm.

⁵Tom qaab ntawd Npasenpas paub has tas, nwg cev xeeb tub lawm, nwg txhaj tso xuv moog rua Daviv paub.

⁶Ces Daviv txawm khaiv tuabneeg moog has rua Yau-am has tas, “Koj tso Uliyas tug kws yog tuabneeg Hitis lug cuag kuv.” Yog le ntawd, Yau-am txhaj tso Uliyas lug cuag Daviv.

⁷Thaus Uliyas lug txug, Daviv nug nwg txug Yau-am hab cov tubrog saib puas noj qaab nyob zoo, hab kev sis ntaus sis tua le caag lawm.

⁸Ces Daviv rov has rua Uliyas has tas, “Koj ca le moog su tom tsev ib ntus tsaiv.” Uliyas txawm tawm lawm, hab Daviv xaa mivntsiv khoom moog pub rua Uliyas tom tsev.

⁹Tabsis Uliyas tsi moog tsev le; nwg ca le moog nrug cov tubrog kws zuv vaajntxwv pw ntawm roojvaag xwb.

¹⁰Thaus Daviv nov has tas, Uliyas tsi moog tsev, Daviv txawm nug Uliyas has tas, “Koj tub ncaim vaaj tse moog tau ntev lawm, nyavnyuas rov lug txug nuav: vim le caag koj tsi moog saib tsev?”

¹¹Uliyas teb has tas, “Cov tubrog Yixalayees hab cov Yudas puavleej nyob huv tshaav rog hab lub Phijxaab kws ntim Vaajtswv tej lug cog tseg los tseem nrug puab nyob; kuv tug thawj tubrog Yau-am hab nwg cov thawj tubrog puavleej nyob tom tshaav rog, kuv yuav ua le caag moog tsev, moog noj moog haus hab nrug kuv tug quaspuj pw? Koj tseem muaj sa nyob, kuv thov coglug has tas, kuv tsi ua le ntawd ib zag le!”

¹²Yog le ntawd, Daviv txhaj has tas, “Nub nua koj ca le su tuabywv ntawm nuav, pigkig kuv yuav muab koj xaa rov qaab moog.” Nub ntawd Uliyas txhaj su huv lub nroog Yeluxalees ib nub hab nub tom qaab ib nub.

¹³Daviv caw Uliyas lug noj mov hab muab cawv rua nwg haus kuas qaug heev. Tabsis mo ntawd Uliyas kuj tsi moog tsev le hab; Uliyas ca le muab nwg dlaim choj pua pw huv chaav tsev kws cov tubrog zuv vaajntxwv nyob.

¹⁴Ces taagkig sawv ntxuv, Daviv sau ib tsaab ntawv rua Uliyas nqaa moog rua Yau-am.

¹⁵Daviv sau has tas, “Yog qhov twg sis tua nyaav, koj ca le tso Uliyas tuaj tom hauv ntej, ces mej ca le thim rov qaab hab tso nwg tseg kuas nwg raug tua tuag.”

¹⁶Yog le ntawd, thaus Yau-am taabtom moog vij ib lub nroog, nwg txhaj kuas Uliyas moog rua ntawm qhov chaw kws Yau-am paub has tas yeebncuab nyob coob tshaaj plawg.

¹⁷Yeebncuab tawm huv nroog tuaj tua Yau-am cov tubrog, Daviv cov tubrog ibtxha txhaj raug tua tuag, hab Uliyas los raug tua tuag lawm.

¹⁸Ces Yau-am xaa xuv lug qha rua Daviv paub txug tej kev sis tua,

¹⁹hab Yau-am has rua tug xaa xuv tas, “Tom qaab kws koj qha tej kev sis tua rua vaajntxwv taag lawm,

²⁰tej zag nwg yuav chim heev hab nug koj has tas, ‘Vim le caag mej yuav moog ti nkaus huv nroog mej maam le tua puab? Mej tsi paub has tas, puab yuav tua neevnti huv ntsaa yeej tuaj rua mej nua los?

²¹Mej tsi ncu qaab qhov kws Nkide-oos tug tub Anpimelej raug tua tuag los? Anpimelej tuag tub yog ib tug quaspuj huv lub nroog Thenpej tso ib txhib zeb sau ntsaa yeej lug ntaus nwg tuag. Vim le caag mej yuav moog ti nkaus rua ntawm ntsaa yeej le?’ Yog Vaajntxwv nug koj le nuav, koj ca le qha rua nwg has tas, ‘Dlua le ntawd koj tug thawj tubrog Uliyas los raug tua tuag lawm hab.’ ”

²²Yog le ntawd, tug xaa xuv txhaj moog cuag Daviv hab qha txhua yaam kws Yau-am has rua nwg lawm.

²³Nwg has tas, “Peb cov yeebncuab coob tshaaj peb hab puab tawm tuaj tua peb rua nrau ntug nroog, tabsis peb muab puab caum tua thim tsiv rov qaab moog taag rua huv roojvaag nroog lawm.

²⁴Ces puab txhaj tua neevnti saab ntsaa yeej huv tuaj rua peb, vaajntxwv cov thawj tubrog txhaj raug xub neevnti tuag ibtxha lawm; hab koj tug thawj tubrog Uliyas los raug tua tuag lawm hab.”

²⁵Daviv has rua tug xaa xuv tas, “Ca le txhawb Yau-am zug hab has kuas nwg tsi xob tu sab, rua qhov tsi paub has tas sov leejtwg yuav raug tua tuag rua huv tshaav rog. Koj has rua nwg kuas ca le nqeg teg tua hab txeeb kuas tau lub nroog ntawd.”

²⁶Thaus Npasenpas nov has tas, nwg tug quasyawg raug tua tuag lawm, nwg quaj nwg tug quasyawg heev.

²⁷Lub sijhawm kws Npasenpas quaj nwg tug quasyawg dlhau lawm, Daviv txhaj moog coj nwg lug rua huv loog; Daviv yuav Npasenpas ua Daviv tug quaspuj hab Npasenpas yug tau ib tug tub rua Daviv. Tabsis tug TSWV tsi txaus sab rua tej kws Daviv tau ua taag lug ntawd.