Read Hmong Njua 2 Xamuyees 13 Bible Online

2 Xamuyees 13 - Hmong Njua bible

2 Xamuyees 13

¹Daviv tug tub Axaloos muaj ib tug muam tsi tau yuav quasyawg, nwg hu ua Tamaj, hab nwg zoo nkauj heev. Anoos kws yog dlua Daviv ib tug tub nyam nwg heev.

²Anoos nyam Tamaj heev, ua rua Anoos ca le mob le lawm, rua qhov Tamaj tseem yog ib tug nkaujxwb kws tsi tau thaam dlua hluas nraug, Anoos paub has tas nwg yuav moog cuag tsi tau Tamaj.

³Tabsis Anoos muaj ib tug phoojywg yog tuabneeg ntse heev, hu ua Yaunadas, nwg yog Daviv tug tijlaug Samas tug tub.

⁴Yaunadas nug Anoos has tas, “Koj tub yog vaajntxwv tug tub ntaag, ua caag kuv pum koj pheej ntsoog ib nub dlhau ib nub le, yog ua le caag tag?” Anoos teb has tas, “Kuv nyam Tamaj kws yog kuv tug kwv nraab Axaloos tug muam heev.”

⁵Yaunadas has rua Anoos has tas, “Koj ua txuj tsaab mob hab moog pw tuabywv sau txaaj, kuas koj txiv lug saib koj, ces koj has rua koj txiv tas, ‘Thov koj moog has Tamaj lug pub mov rua kuv noj. Kuv xaav pum nwg lug ua zaub mov hab muab mov rua kuv noj.’ ”

⁶Yog le ntawd, Anoos ua txuj tsaab mob hab moog pw lawm. Vaajntxwv Daviv txhaj moog saib Anoos, hab Anoos has rua Daviv has tas, “Thov koj ca Tamaj lug ua ob lub ncuav ci ntawm nuav rua kuv pum, hab ca nwg muab cov ncuav ntawd rua kuv noj.”

⁷Yog le ntawd, Daviv txhaj tso tuabneeg moog hu Tamaj huv lub loog lug hab has tas, “Koj ca le moog huv Anoos tsev hab ua mov rua nwg noj.”

⁸Tamaj txhaj moog rua huv hab pum Anoos pw sau txaaj. Tamaj txhaj muab ib cov moov nplej ntse dlej zuaj ua ib cov ncuav rua Anoos saib ntsoov. Ces Tamaj txawm muab cov ncuav ntawd cub,

⁹hab nwg muab rua Anoos noj, tabsis Anoos tsi kaam noj le. Anoos has tas, “Ntab cov tuabneeg ntawd tawm moog.” Ces puab txawm tawm lawm.

¹⁰Anoos txhaj has rua Tamaj has tas, “Nqaa cov ncuav lug rua ntawm kuv lub txaaj nuav, hab koj muab rua kuv noj.” Tamaj txhaj nqaa ncuav moog rua Anoos.

¹¹Thaus Tamaj cev ncuav rua Anoos, Anoos ca le qawm nkaus Tamaj hab has tas, “Koj ca le nrug kuv pw!”

¹²Tamaj has tas, “Tsi xob muab kuv mos ua phem ua qas! Tej nuav peb cov Yixalayees yeej ibtxwm tsi ua le!

¹³Kuv yuav coj kuv txujkev txaajmuag moog zais rua qhov twg? Hab koj los yuav txaajmuag nyob huv tsaav tuabneeg Yixalayees moog le. Koj ca le moog thov vaajntxwv, kuv paub has tas, nwg yuav muab kuv rua koj.”

¹⁴Tabsis Anoos tsi noog Tamaj has le; Anoos muaj zug dlua Tamaj, Anoos txhaj khawm nkaus Tamaj hab muab nwg yuam kag.

¹⁵Ces Anoos ca le ntxub Tamaj heev. Anoos ntxub Tamaj heev dlua thaus kws nwg pib nyam Tamaj lawm. Anoos txhaj ntab Tamaj has tas, “Koj ca le tsiv moog!”

¹⁶Tamaj has tas, “Tsi tau, yog koj ca le ntab kuv tawm moog le nuav tseem txhum luj tshaaj qhov kws koj nyavnyuas ua taag rua kuv nuav hab!” Tabsis Anoos tsi noog Tamaj has le.

¹⁷Anoos hu nwg ib tug tubkhai lug hab has tas, “Ca le caab tug quaspuj nuav tawm moog! Muab nwg thawb rua saab nrau hab laag qhovrooj rua!”

¹⁸Ces tug tubkhai ntawd txhaj muab Tamaj thawb ntag rua saab nrau hab laag kag qhovrooj rua lawm. Tamaj naav ib dlaim tab ntev hab lub tsho teg ntev, yog tej tab rua vaajntxwv cov ntxhais kws tseem yog nkaujxwb naav rua tam ntawd.

¹⁹Tamaj tsuab tshauv rua sau nwg taubhau, muab nwg dlaim tab dlua hab muab nwg ob txhais teg npug nwg lub ntsejmuag tsaa hlo suab quaj tawm tsiv lawm.

²⁰Thaus Tamaj tug nug Axaloos pum dlheev nwg. Axaloos nug has tas, “Anoos mos koj los? Tug muam, tsi xob muab qhov ntawd lug ua rua koj nyuaj sab. Anoos tub yog koj ib tug nug nraab hab, ca le ua tuabywv tsi xob qha rua leejtwg paub le.” Yog le ntawd, Tamaj txhaj moog nyob huv Axaloos tsev, Tamaj nyuaj sab hab tu sab kawg le.

²¹Thaus Vaajntxwv Daviv nov tej xwm nuav, ua rua nwg chim heev.

²²Ces Axaloos ntxub Anoos heev, rua qhov Anoos muab nwg tug muam mos, hab Axaloos tsi nrug Anoos thaam le lawm.

²³Tau ob xyoos tom qaab nuav Axaloos muab nwg cov yaaj lug txav plaub rua ntawm lub nroog Npa-aas Haxaus kws nyob ze lub nroog Efalayees, hab nwg caw taagnrho vaajntxwv cov tub tuaj koom huv tuabsi.

²⁴Axaloos moog cuag Vaajntxwv Daviv hab has rua Vaajntxwv has tas, “Vaajntxwv, kuv muab kuv cov yaaj lug txav plaub, mas thov caw koj hab koj cov numtswv moog koom.”

²⁵Vaajntxwv teb has tas, “Mivtub, kuv tsi moog, yog peb suavdlawg moog, mas yuav ua num nyaav rua koj heev.” Axaloos taij heev, tabsis vaajntxwv tsi kaam moog le, nwg foom koob moov rua Axaloos hab ca Axaloos rov moog lawm.

²⁶Tabsis Axaloos has tas, “Yog koj tsi kaam moog le, thov koj tso kuv tug tijlaug Anoos nrug peb moog?” Vaajntxwv nug has tas, “Vim le caag koj yuav kuas Anoos moog?”

²⁷Tabsis Axaloos taij heev, thaus kawg Daviv txhaj tso Anoos hab taagnrho Daviv cov tub nrug Axaloos moog. Axaloos npaaj tau ib rooj mov luj, phim rua vaajntxwv noj xwb,

²⁸Axaloos has rua nwg cov tubkhai tas, “Mej saib, thaus twg Anoos haus cawv qaug heev lawm, ces thaus kuv kuas mej tua, mej ca le tua nwg kuas tuag. Tsi xob ntshai. Kuv yuav ris lub txim nuav tsi pub kuas raug mej. Ca le ua khov kho hab ua sab tawv qhawv xwb!”

²⁹Yog le ntawd, cov tubkhai txhaj ua lawv le Axaloos has, hab muab Anoos tua tuag lawm. Ces taagnrho Daviv cov tub kws seem txhaj sawv ceev nrooj moog caij puab cov neeg zaag hab tsiv moog lawm.

³⁰Thaus puab taabtom taug kev rov lug tsev, muaj tuabneeg lug has rua Daviv has tas, “Axaloos muab koj cov tub tua tuag taag, tsi muaj ib tug seem le.”

³¹Vaajntxwv ca le sawv tseeg dlua rhe nwg lub tsho quaj tu sab heev, hab nwg qhau cev hlo quaj dlaa luam rua huv aav. Cov tubkhai kws nrug nwg nyob ua ke ntawd los puab dlua puab tej tsho povtseg nrug nwg nyuaj sab ib yaam nkaus.

³²Tabsis Daviv tug tijlaug Samas tug tub Yaunadas has tas, “Vaajntxwv, koj tsi xob xaav has tas puab tua taagnrho koj cov tub. Anoos tuab leeg txhaj raug tua tuag xwb. Koj saib Axaloos yeej muaj lub sab xaav ua le nuav txij thaus kws Anoos muab nwg tug muam Tamaj mos lug lawm.

³³Yog le ntawd, koj tsi xob ntseeg tej lug fi xuv kws has tas, koj cov tub tuag taag lawm; tsuas yog Anoos tuab leeg txhaj raug tua tuag xwb.”

³⁴Thaus lub sijhawm ntawd Axaloos kuj tsiv lawm hab. Ces taamsim ntawd tug tub faajxwm txawm pum ib paab tuabneeg taug kev nqeg sau Roob Haulunayees lug. Nwg txhaj moog tshaab xu tej kws nwg pum ntawd rua vaajntxwv.

³⁵Yaunadas has rua Daviv has tas, “Cov ntawd yog koj cov tub rov qaab lug, lawv le puastaab kuv has rua koj lawm.”

³⁶Ces thaus has cov lug ntawd xaus, Daviv cov tub lug txug ndlua; puab suavdlawg txawm tsaa hlo suab quaj, Daviv hab nwg cov numtswv los kuj quaj tu sab kawg.

³⁷Axaloos tsiv moog cuag Amihus tug tub Talemais kws ua vaajntxwv kaav lub nroog Nkesus, hab moog nyob huv lub nroog ntawd tau peb xyoos. Daviv quaj Anoos tau ntev loo;

³⁹Tabsis thaus kws nwg txujkev ncu Anoos dlhau lawm, nwg ncu txug nwg tug tub Axaloos kws ncaim nwg moog lawm.