Read Hmong Njua 2 Xamuyees 14 Bible Online

2 Xamuyees 14 - Hmong Njua bible

2 Xamuyees 14

¹Yau-am paub has tas Vaajntxwv Daviv ncu Axaloos heev,

²yog le ntawd, Yau-am txhaj khaiv tuabneeg moog hu ib tug quaspuj ntse heev huv lub nroog Tekau-as tuaj cuag nwg. Thaus tug quaspuj ntawd tuaj txug lawm, Yau-am has rua tug quaspuj ntawd tas, “Koj ua txuj ua le tug tuabneeg kws raug kev txomnyem quaj ntsuag: muab koj tej tsoog tsho quaj ntsuag lug naav hab tsi xob ntsis plaubhau le. Koj ua ib yaam le ib tug quaspuj kws muaj kev quaj ntsuag lug ntev lawm.

³Ces koj ca le moog cuag vaajntxwv hab has tej lug kws kuv qha koj has rua nwg.” Yau-am txawm qha tej lug ntawd rua tug quaspuj ntawd.

⁴Tug quaspuj ntawd txhaj moog cuag vaajntxwv, nwg txhus caug ndlua pe vaajntxwv hab has tas, “Vaajntxwv, thov paab kuv lauj!”

⁵Vaajntxwv nug tug quaspuj ntawd has tas, “Koj xaav kuas kuv paab koj dlaabtsi?” Tug quaspuj ntawd teb has tas, “Vaajntxwv, kuv tug quasyawg tuag lawm, kuv ua ib tug puj ntsuag kws txomnyem heev.

⁶Vaajntxwv, kuv muaj ob tug tub xwb, muaj ib nub obtug txawm sis tshe tom teb, tsi muaj leejtwg cheem obtug le, ces tug kwv txawm muab tug tijlaug tua tuag lawm.

⁷Nwgnuav taagnrho kuv cov kwvtij tawmtsaam kuv heev hab puab kuas kuv ca le muab kuv tug tub cob rua puab, puab yuav muab nwg tua povtseg vim qhov kws nwg tua nwg tug tijlaug lawm. Yog puab ua le ntawd tag, mas kuv tsi muaj tub le lawm. Puab txawm yuav rhuav tshem kuv txujkev ca sab hab yuav ca kuv tug quasyawg tsi muaj ib tug tub lug ris nwg lub npe le?”

⁸Vaajntxwv teb has tas, “Koj ca le rov qaab moog tsev, kuv maam le saib zaaj nuav.”

⁹Tug quaspuj ntawd has tas, “Vaajntxwv, txawm yog koj ua le caag los thov ca kuv hab kuv tsev tuabneeg ris lub txim nuav; thov ca koj hab koj tsev tuabneeg kws luas fwm tsi xob tau ris lub txim nuav.”

¹⁰Vaajntxwv teb has tas, “Yog leejtwg tseem ua rua koj ntxhuv sab hab, ca le coj nwg tuaj cuag kuv, tug ntawd yuav tsi ua rua koj ntxhuv sab ntxiv lawm.”

¹¹Tug quaspuj ntawd has tas, “Vaajntxwv, koj ca le thov tug TSWV kws yog koj tug Vaajtswv paab kuv cov kwvtij kws yuav ua pauj rua kuv tug tub kws tuag lawm, kuas tsi xob ua txhum kws yuav muab kuv tug tub kws tseem nyob nuav tua povtseg.” Daviv teb has tas, “Kuv coglug rua koj ntawm tug TSWV kws muaj sa nyob has tas, kuv yuav tsi pub koj tug tub ib txuj plaubhau poob rua huv aav le.”

¹²Tug quaspuj ntawd has tas, “Vaajntxwv, thov ca kuv has ib lus ntxiv hab.” Vaajntxwv teb has tas, “ca le has.”

¹³Tug quaspuj ntawd has rua vaajntxwv has tas, “Vim le caag koj tseem ua tej yaam tsi yog rua Vaajtswv tsaav tuabneeg hab? Koj tau txav txim rov rua koj tug tub kws moog nyob rua lwm lub tebchaws lawm tsi pub rov qaab lug.

¹⁴Peb yuav tuag taag; peb zoo le cov dlej kws muab laub rua huv aav lawm yeej muab tsi tau rov qaab lug le lawm. Vaajtswv tsi txuv leejtwg txujsa le, tabsis nwg nrhav kev paab kuas coj tau tug tuabneeg kws raug ntab tawm lawm kuas tau rov qaab lug.

¹⁵Vaajntxwv, kuv tuaj has cov lug nuav rua koj, mas yog tej tuabneeg suavdlawg ua rua kuv ntshai, kuv txhaj xaav has tas, yog kuv tuaj has tej lug nuav rua koj, koj yuav ua lawv le kuv tej lug thov.

¹⁶Kuv xaav has tas koj yuav noog kuv tej lug thov hab yuav paab kuas kuv dlim ntawm tug kws muaj lub sab pheej nrhav kuv tug tub hab kuv tua povtseg, hab muab wb ntab tawm huv lub tebchaws kws Vaajtswv muab rua nwg tsaav tuabneeg nyob nuav lawm.

¹⁷Kuv xaav has tas, koj yuav coglug paab kuas kuv muaj kev kaaj sab, rua qhov vaajntxwv yeej zoo ib yaam le Vaajtswv tug timtswv hab muaj peevxwm muab qhov zoo cais tawm ntawm qhov phem. Thov tug TSWV kws yog koj tug Vaajtswv nrug nraim koj.”

¹⁸Vaajntxwv teb has tas, “Kuv yuav nug koj, mas koj yuavtsum teb txhua yaam kws yog qhov tseeb xwb.” Tug quaspuj ntawd teb has tas, “Vaajntxwv, koj nug kuv los tau.”

¹⁹Daviv nug nwg has tas, “Puas yog Yau-am khaiv koj tuaj has tej lug nuav rua kuv?” Tug quaspuj ntawd teb has tas, “Vaajntxwv, yeej tsi muaj leejtwg yuav zaam dlhau koj tej lug nug le, kuv nyob ntawm nuav teb koj tej lug nug ntaag. Tub yog koj tug thawj tubrog Yau-a kuas kuv tuaj hab qha kuas kuv has tej lug nuav.

²⁰Tabsis qhov kws nwg ua nuav tub yog ua kuas dlaws tau koj tej teebmeem ntaag. Kuv tug vaajntxwv yeej yog tug txawj ntse ib yaam le Vaajtswv tug timtswv hab paub txhua yaam kws yuav tshwm lug.”

²¹Tom qaab ntawd vaajntxwv has rua Yau-am has tas, “Kuv pum zoo ua le koj has. Koj ca le moog hab coj tug tub hluas Axaloos rov qaab lug.”

²²Yau-am txhaj txhus caug ndlua hawm Daviv hab has tas, “Vaajntxwv kws yog kuv tug tswv, thov Vaajtswv foom koob moov rua koj! Nwgnuav kuv paub has tas koj pum zoo nrug kuv, vim koj ua lawv le kuv tau thov koj lawm.”

²³Ces Yau-am txhaj moog rua peg Nkesus hab coj Axaloos rov qaab lug rua huv lub nroog Yeluxalees.

²⁴Tabsis vaajntxwv saamfwm tsi pub Axaloos moog nyob huv lub loog le. Vaajntxwv has tas, “Kuv tsi xaav ntsib nwg tim ntsej tim muag.” Yog le ntawd, Axaloos txhaj nyob huv nwg lub tsev xwb, tsi moog tshwm rua vaajntxwv pum le.

²⁵Nyob huv tebchaws Yixalayees tsi muaj leejtwg kws luas qhuas npaum le qhuas Axaloos; sau Axaloos taubhau moog ti huv nwg kutaw tsi muaj ib qho phem le.

²⁶Nwg cov plaubhau tuab heev, ib xyoo nwg txav ib zag xwb. Thaus nwg cov plaubhau ntev tuaj lawm nyaav kawg le. Muab nwg cov plaubhau luj nyaav tsib choj lawv le numtswv tej teev kws hum txaj.

²⁷Axaloos muaj peb tug tub hab ib tug ntxhais hu ua Tamaj, Tamaj yog ib tug ntxhais kws zoo nkauj heev.

²⁸Axaloos nyob huv lub nroog Yeluxalees tau ob xyoos tsi tau pum vaajntxwv hlo le.

²⁹Axaloos txhaj tso tuabneeg moog has rua Yau-am, kuas paab nwg moog thov vaajntxwv; tabsis Yau-am tsi tuaj cuag Axaloos le. Axaloos rov tso tuabneeg moog hu Yau-am dlua los Yau-am tsi kaam tuaj cuag nwg le.

³⁰Yog le ntawd, Axaloos txhaj has rua nwg cov tubkhai tas, “Mej saib, Yau-am thaaj laj nyob npuas kuv thaaj, hab nplej tseem puv nkaus huv thaaj laj. Mej ca le moog tis suavtawg hlawv.” Yog le ntawd, puab txhaj moog tis suavtawg hlawv Yau-am thaaj laj.

³¹Yau-am txhaj moog rua tom Axaloos tsev hab nug has tas, “Vim le caag koj cov tubkhai tis suavtawg hlawv kuv thaaj laj?”

³²Axaloos teb has tas, “Rua qhov thaus kuv tso tuabneeg tuaj hu koj, koj tsi tuaj le. Kuv xaav kuas koj moog paab kuv nug vaajntxwv has tas, ‘Vim le caag kuv txhaj rov peg Nkesus lug nyob rua huv nuav? Yog kuv nyob tuabywv peg, yuav zoo dlua kuv nyob ntawm nuav.’ ” Hab Axaloos has ntxiv tas, “Kuv xaav teem sijhawm moog cuag vaajntxwv, yog has tas, kuv ua txhum tag, thov nwg ca le muab kuv tua povtseg.”

³³Yog le ntawd, Yau-am txhaj moog cuag Vaajntxwv Daviv hab muab Axaloos tej lug txhua lu has rua Daviv noog. Vaajntxwv tso tuabneeg moog hu Axaloos, Axaloos txhaj moog cuag vaajntxwv hab nwg txhus caug ndlua hawm vaajntxwv. Vaajntxwv zoo sab hab puag nkaus Axaloos nwj.