Read Hmong Njua 2 Xamuyees 15 Bible Online

2 Xamuyees 15 - Hmong Njua bible

2 Xamuyees 15

¹Tom qaab nuav Axaloos npaaj ib lub tsheb neeg, ob tug txiv neeg hab tsib caug leej txivneej moog ua nwg ntej.

²Axaloos pheej sawv ntxuv moog sawv ntawm ntug kev ze lub roojvaag nroog. Thaus muaj tuabneeg tuaj xaav kuas vaajntxwv nrug tu plaub ntug, Axaloos txawm hu nwg lug hab nug saib nwg tuaj qhov twg tuaj. Thaus kws tug tuabneeg ntawd qha rua Axaloos has tas nwg yog xeem twg lawm,

³Axaloos has rua nwg tas, “Koj yog tug yeej cai lawm, tabsis vaajntxwv tsi tau tsaa leejtwg lug ua tug sawv nwg cev tu koj rooj plaub nuav.”

⁴Hab Axaloos has ntxiv tas, “Kheev laam yog kuv tau ua tug tu plaub ntug! Yog muaj leejtwg muaj plaub ntug tuaj cuag kuv, kuv yuav tu nwg tej plaub ntug kuas ncaaj nceeg.”

⁵Thaus tug tuabneeg ntawd txaav zog lug hawm Axaloos, Axaloos puag nkaus tug ntawd hab nwj kag.

⁶Axaloos ua le ntawd rua cov Yixalayees txhua tug kws tuaj thov vaajntxwv paab tu puab tej plaub ntug. Yog le ntawd, puab txhaj fwm Axaloos heev.

⁷Tom qaab ntawd plaub xyoos, Axaloos thov Vaajntxwv Daviv has tas, “Vaajntxwv, thov ca kuv moog nraag Henploos hab muab khoom fij rua tug TSWV lawv le kuv tau coglug tseg.

⁸Thaus kuv tseem nyob huv lub nroog Nkesus peg tebchaws Xilias, kuv tau coglug rua tug TSWV has tas, yog nwg coj kuv rov lug rua huv lub nroog Yeluxalees, kuv yuav moog pehawm nwg huv Henploos.”

⁹Vaajntxwv tso lug has tas, “Koj ca le moog kaaj sab lug.” Yog le ntawd, Axaloos txhaj moog rua nraag Henploos lawm.

¹⁰Tabsis Axaloos khaiv tuabneeg moog has rua txhua xeem Yixalayees has tas, “Thaus twg mej nov suab raaj suab xyu nrov, suavdlawg ca le qw has tas, ‘Axaloos ua vaajntxwv kaav lub nroog Henploos lawm!’ ”

¹¹Axaloos caw tau ob puas leej txivneej huv lub nroog Yeluxalees nrug nwg moog; puab tsi paub dlaabtsi le, puab txhaj zoo sab hlo ua ntsejmuag luag ntxhi nrug Axaloos moog.

¹²Thaus Axaloos taabtom hlawv tsaj ua khoom fij, Axaloos khaiv tuabneeg moog hu Ahithaufees kws yog Vaajntxwv Daviv tug tuavxaam huv lub nroog Nkilaus tuaj cuag Axaloos. Txujkev ntxeev sab tawmtsaam Vaajntxwv Daviv muaj zug heev zuj zug tuaj, hab cov tuabneeg kws tuaj Axaloos tog coob zuj zug ntxiv.

¹³Muaj tuabneeg moog has qha rua Daviv has tas, “Cov pejxeem Yixalayees tub coglug tuaj Axaloos tog lawm.”

¹⁴Yog le ntawd, Daviv txhaj has rua nwg cov numtswv kws nrug nwg nyob huv lub nroog Yeluxalees has tas, “Peb yuavtsum tsiv taamsim nuav, tej zag ib plag sau nuav, Axaloos yuav tuaj txug, nwg yuav tua yeej peb hab yuav muab txhua tug kws nyob huv lub nroog nuav tua huv tuabsi. Yog peb xaav kuas peb dlim ntawm Axaloos txhais teg, peb ca le tsiv taamsim nuav ntaag.”

¹⁵Puab teb has tas, “Vaajntxwv, peb yeej tog nrhw yuav ua txhua yaam le koj has.”

¹⁶Yog le ntawd, vaajntxwv txhaj nrug nwg tsev tuabneeg, hab nwg cov numtswv tawm tsiv, tsuas tseg nwg kaum tug nam yau, nyob tu lub loog xwb.

¹⁷Thaus vaajntxwv hab nwg cov tubrog tawm huv lub nroog moog, puab moog txoos ua ke rua ntawm lub tsev tom kawg.

¹⁸Taagnrho nwg cov numtswv puavleej sawv ntawm vaajntxwv hauv ntej, ca cov tubrog faajxwm moog ua nwg ntej. Hab rau pua leej tubrog huv lub nroog Nkas kws tuaj nwg tog los puavleej moog ua nwg ntej huv tuabsi lawm hab.

¹⁹Vaajntxwv has rua Ithais kws yog puab tug thawjcoj has tas, “Vim le caag koj txhaj nrug peb moog? Koj yog tuabneeg txawv tebchaws kws tsiv huv koj lub tebchaws tuaj nkaum huv lub tebchaws nuav xwb, koj ca le rov qaab moog nrug tug vaajntxwv tshab nyob.

²⁰Koj nyavnyuas tuaj nyob huv nuav tau ib ntus xwb, kuv yuav ua le caag coj koj nrug kuv moog? Kuv tub tsi paub sov kuv yuav moog qhov twg. Koj ca le coj koj cov tuabneeg nrug koj rov qaab, thov tug TSWV ua zoo hab ua ncaaj rua koj.”

²¹Tabsis Ithais teb has tas, “Vaajntxwv, kuv thov tuav tug TSWV lub npe coglug rua koj has tas, koj moog qhov twg kuv yuav nrug koj moog qhov ntawd, txawm yog yuav caj hab tuag los xijpeem.”

²²Daviv teb has tas, “Zoo lawm! Ca le moog!.” Yog le ntawd, Ithais txhaj nrug Daviv cov tuabneeg hab puab tej quaspuj mivnyuas moog lawm.

²³Thaus Daviv cov tuabneeg sawv kev moog tu qaab lawm, cov pejxeem tsaa hlo suab quaj. Vaajntxwv txhaj hlaa lub Haav Kiloos lawv nwg cov tuabneeg qaab hab puab moog rua tom taj suabpuam lawm.

²⁴Tug povthawj Xadaus hab cov Levis kws kwv lub Phijxaab kws ntim Vaajtswv tej lug cog tseg nrug nraim Daviv. Puab muab lub phijxaab txu tsi kwv moog txug thaus kws cov tuabneeg tsiv tawm huv nroog taag lawm. Tug povthawj Anpiyathas los nrug puab nyob ntawd hab.

²⁵Vaajntxwv has rua Xadaus has tas, “Mej ca le kwv lub Phijxaab rov qaab moog ca rua huv nroog. Yog tug TSWV txaus sab rua kuv tag, muaj ib nub nwg yuav coj kuv rov qaab lug pum lub phijxaab hab qhov chaw kws ca lub phijxaab nuav dlua.

²⁶Tabsis yog nwg tsi pum zoo rua kuv rov lug, ces nwg yuav ua le caag rua kuv los nyob ntawm nwg pum zoo.”

²⁷Hab Daviv has rua Xadaus has tas, “Koj puas yog tug kws pum yaav tom ntej? Ca le coj koj tug tub Ahima-as hab Anpiyathas tug tub Yaunathaas rov qaab moog nyob huv nroog kaaj sab lug.

²⁸Lub sijhawm nuav, kuv yuav moog nyob ntawm tug dlej kws txujkev hlaa moog rua tom taj suabpuam tog moog txug thaus kuv tau txais koj tej xuv tsaiv.”

²⁹Yog le ntawd, Xadaus hab Anpiyathas txhaj kwv lub Phijxaab kws ntim Vaajtswv tej lug cog tseg rov lug ca rua huv lub nroog Yeluxalees hab obtug lug nyob rua huv lawm.

³⁰Daviv nce moog quaj sau Roob Txiv ntoo roj; Daviv hle khau hab muab ntaub kauv nwg taubhau, rua qhov nwg tu sab heev. Txhua tug kws nrug Daviv moog puavleej muab ntaub kauv taubhau hab quaj ib yaam nkaus.

³¹Thaus muaj tuabneeg moog qha rua Daviv has tas, Ahithaufees koom teg nrug Axaloos ntxeev sab lawm, Daviv txhaj thov Vaajtswv has tas, “Tug TSWV, thov koj ca le muab Ahithaufees tej tswvyim hloov kuas tsi muaj qaabhau!”

³²Thaus Daviv nce nto plawg sau lub ncov roob kws yog qhov chaw pehawm Vaajtswv, Daviv tug phoojywg Husais kws yog cov tuabneeg Alekhis tug kws Daviv ntseeg sab tshaaj plawg txhaj tuaj ntsib Daviv. Husais muab nwg cev rig tsho dlua ndluag ua kaaj quas nab hab tsuab aav rua sau taubhau.

³³Daviv has rua Husais has tas, “Yog koj nrug kuv moog los koj yuav paab tsi tau kuv dlaabtsi,

³⁴Tabsis yog koj rov moog rua huv lub nroog hab has rua Axaloos has tas, txij nuav moog koj yuav ua tug tu Axaloos ntawm lub sab ncaaj nceeg ib yaam le koj tu nwg txiv. Koj txhaj yog tug kws muaj cuabkaav taav tau tej lug kws Ahithaufees has.

³⁵Xadaus hab Anpiyathas kws yog ob tug povthawj los tseem nyob huv; Txhua yaam kws koj nov huv vaajntxwv lub loog, ca le pav qha rua obtug noog.

³⁶Ahima-as hab Yaunathaas kws yog obtug ob tug tub puavleej nrug ob tug nyob huv hab, koj ca le kuas obtug xaa txhua lu lug kws koj nov tuaj qha rua kuv paub huv tuabsi.”

³⁷Yog le ntawd, Husais kws yog Daviv tug phoojywg txhaj rov qaab moog txug rua huv lub nroog tawm thawj thaus Axaloos lug txug ndlua hab.