Read Hmong Njua 2 Xamuyees 16 Bible Online

2 Xamuyees 16 - Hmong Njua bible

2 Xamuyees 16

¹Thaus Daviv moog dlhau sau lub ncov roob lawm, nwg txawm ntsib Xinpas kws yog Mefinpauses tug tubkhai, nwg caab ob tug neeg luav thauj ob puas lub ncuav, ib puas pob txiv maab qhuav hab ib naab tawv cawv txiv maab puv nkaus.

²Vaajntxwv Daviv nug Xinpas has tas, “Koj coj tej nuav tuaj moog ua dlaabtsi ntau ua luaj?” Xinpas teb has tas, “Ob tug neeg luav nuav yog muab pub rua vaajntxwv tsev tuabneeg caij, cov ncuav hab cov txiv maab qhuav nuav muab rua koj cov tuabneeg tau noj, hab cov cawv txiv maab nuav yog muab rua puab tau haus thaus puab nqhes tom roob mojsaab qhua.”

³Vaajntxwv nug Xinpas has tas, “Koj tug tswv Xa-ules tug xeebntxwv Mefinpauses nyob qhov twg?” Xinpas teb has tas, “Nwg tseem nyob huv lub nroog Yeluxalees, rua qhov nwg ca sab has tas, taamsim nuav cov Yixalayees taabtom yuav muab nwg yawm Xa-ules lub tebchaws tso rua nwg tuav.”

⁴Vaajntxwv has rua Xinpas has tas, “Txhua yaam kws yog Mefinpauses tug puavleej yog koj le huv tuabsi.” Xinpas teb has tas, “Vaajntxwv, kuv yog koj tug tubkhai, thov kuas kuv ua lawv le koj lub sab nyam moog le.”

⁵Thaus Daviv moog txug huv lub nroog Npalauhees, Nkelas tug tub Sime-is kws yog Xa-ules cov kwvtij tuaj tog Daviv kev hab tsawm foom Daviv taug kev tuaj.

⁶Txawm yog Daviv nyob huv plawv nwg cov tuabneeg hab nwg cov tubrog faajxwm los Sime-is tseem khaws pobzeb laim tuaj rua Daviv hab nwg cov numtswv.

⁷Sime-is tshev Daviv has tas, “Nam tuabneeg tua tuabneeg! Ca le tsiv tawm moog! Koj ca le tsiv moog! Nam tuabneeg sab phem limham!

⁸Koj txeeb Xa-ules lub tebchaws kaav, taamsim nuav tug TSWV txhaj rau txim rua koj, rua qhov koj tua Xa-ules tsev tuabneeg. Tug TSWV txhaj muab koj lub tebchaws tso rua koj tug tub Axaloos kaav, koj raug kev puamtsuaj, vim koj yog nam tuabneeg tua tuabneeg!”

⁹Anpisais kws nwg nam hu ua Xeluyas has rua vaajntxwv has tas, “Vaajntxwv, vim le caag koj ca nyuas dlev ntawd tshev koj mob ua luaj? Thov ca kuv moog muab nwg lub nyuas cejdlaab txav kag kuas tu nrho rua tod saib!”

¹⁰Vaajntxwv has rua Anpisais hab nwg tug tijlaug Yau-am has tas, “Tej nuav tsi yog meb num. Qhov kws nwg tshev kuv ntawd yog tug TSWV kuas nwg tshev, leejtwg yuav muaj peevxwm nug tau has tas, vim le caag nwg txhaj tshev kuv?”

¹¹Daviv has rua Anpisais hab Daviv cov numtswv has tas, “Txawm yog kuv tug tub kag los nwg tub nyaag nrhw tua kuv povtseg; vim le caag mej yuav quavntsej tug nyuas tuabneeg Npeenyamees ntawd ua dlaabtsi? Tug TSWV yeej kuas nwg tshev kuv lawm, ca nwg nyob nwg hab ca nwg tshev nwg.

¹²Tej zag tug TSWV yuav pum kuv tej kev nyuaj sab hab nwg yuav muab tej lug tshev ntawd hloov moog ua lug foom koob moov rua kuv.”

¹³Yog le ntawd, Daviv hab nwg cov tuabneeg txawm taug kev moog lawm. Sime-is tuaj peg qaum kev nrug puab moog hab muab puab tshev dlua toj ndlais; nwg tshev hab muab pobzeb ntaus hab tseem tsuab aav w rua puab.

¹⁴Thaus vaajntxwv hab nwg cov tuabneeg moog txug ntawm tug dlej Yauladees, puab lim heev puab txhaj moog su rua qhov ntawd.

¹⁵Axaloos hab cov Yixalayees kws tuaj nwg tog, puavleej nrug nwg lug rua huv lub nroog Yeluxalees, hab Ahithaufees nrug puab lug ua ke.

¹⁶Thaus Husais kws yog Daviv tug phoojywg kws Daviv ntseeg sab heev, ntsib Axaloos, nwg qw has tas, “Thov kuas vaajntxwv muaj sa nyob ntev! Thov kuas vaajntxwv muaj sa nyob ntev!”

¹⁷Axaloos nug has tas, “Koj ua le ko yog koj fwm koj tug phoojywg Daviv nua los? Vim le caag koj tsi nrug nwg moog?”

¹⁸Husais teb has tas, “Kuv yuav ua le caag moog tau? Kuv yuav nyob nrug tug kws tug TSWV hab cov Yixalayees tau xaiv lawm. Kuv yuav nrug koj nyob xwb.

¹⁹Kuv tseem yuav moog tu leejtwg hab, yog has tas kuv tsi tu kuv tug tswv tug tub? Thaus u kuv tu koj txiv le caag lawm, nwgnuav kuv yuav tu koj ib yaam le ntawd.”

²⁰Axaloos tig hlo moog has rua Ahithaufees has tas, “Taamsim nuav peb lug nyob huv nuav lawm, koj sim paab peb tuav tswvyim saib peb yuav ua le caag txhaj zoo?”

²¹Ahithaufees teb has tas, “Koj ca le moog nrug koj txiv cov nam yau kws nwg muab tso tseg tu lub loog pw, kuas txhua tug tuabneeg Yixalayees txhaj paub has tas, koj txiv saib koj zoo le nwg tug yeebncuab hab koj cov phoojywg txhaj muab sab npuab koj.”

²²Yog le ntawd, puab txhaj tsaa tau ib lub tsevntaub rua ntawm lub loog rua Axaloos, ces Axaloos txawm moog nrug nwg txiv cov nam yau pw taabmeeg suavdlawg saib ntsoov.

²³Lub sijhawm ntawd, txhua lu lug kws Ahithaufees has ntawd zoo ib yaam le yog Vaajtswv tej lug ntaag; Daviv hab Axaloos obtug lub neej tshwmsim lawv le Vaajtswv tej lug.