Read Hmong Njua 2 Xamuyees 17 Bible Online

2 Xamuyees 17 - Hmong Njua bible

2 Xamuyees 17

¹Tau tsi ntev lug tom qaab nuav, Ahithaufees has rua Axaloos has tas, “Thov ca kuv moog xaiv kaum ob txheeb leej txivneej nrug kuv, hab mo nuav kuv yuav moog caum Daviv qaab.

²Kuv yuav tua nwg thaus nwg lim hab qaug zug heev. Nwg yuav ntshai hab taagnrho nwg cov tuabneeg yuav tsiv tsi saib qaab. Kuv yuav tua vaajntxwv tuab leeg xwb,

³hab kuv yuav coj taagnrho nwg cov tuabneeg rov qaab lug thawj koj, ib yaam le tug nkauj nyaab rov lug thawj nwg tug quasyawg. Koj los tsuas nrhav tua nwg tuab leeg hab xwb. Dlua le cov yuavtsum tseg ca.”

⁴Cov lug nuav raug Axaloos hab cov Yixalayees tej thawjcoj sab kawg le.

⁵Axaloos has tas, “Mej ca le moog hu Husais lug taamsim nuav, saib nwg yuav has le caag rua peb.”

⁶Thaus Husais lug txug ndlua, Axaloos nug Husais has tas, “Tej lug nuav yog Ahithaufees has qha rua peb; koj puas pum zoo rua peb ua lawv le ntawd? Yog koj tsi pum zoo, thov qha saib peb yuav ua le caag?”

⁷Husais teb has tas, “Cov lug kws Ahithaufees qha rua koj nuav tsi yog lug zoo.

⁸Koj yeej paub has tas, ‘Koj txiv Daviv hab nwg cov tuabneeg tua rog ua tau heev, hab nyaum cuag tug maum dlais kws tuabneeg moog muab nwg cov mivnyuas ntaag. Koj txiv yog ib tug tubrog kws yeej ibtxwm txawj tua rog heev hab mo ntuj nwg yeej tsi nrug nwg cov tuabneeg nyob ua ke le.

⁹Taamsim nuav nwg yeej moog nkaum huv tej qhov tsua lossis lwm qhov chaw lawm. Ces thaus Daviv tawm lug tua koj cov tuabneeg, ces txhua tug kws nov zaaj nuav yuav has tas koj cov tuabneeg swb lawm.

¹⁰Thaus ntawd cov tubrog kws sab tawv, tsi paub ntshai ib yaam le tej tsuv ntxhuav, yuav ca le ntshai, rua qhov txhua tug Yixalayees yeej paub has tas, koj txiv yog ib tug kws ntaus rog ua tau hab nwg cov tuabneeg yog cov kws muaj sab tawv tua rog heev.

¹¹Kuv pum zoo mas koj ca le sau taagnrho cov Yixalayees kws nyob thoob plawg saab tebchaws tom nuav moog txug ndlua saab tebchaws tom u tuaj ua ke, kuas coob npaum le tej xuabzeb ntawm ntug havtxwv hab koj ca le ua tug ntaus thawj loo moog rua huv tshaav rog.

¹²Txawm yog Daviv nyob qhov twg los peb yeej yuav nrhav tau nwg xwb, peb ca le tua nwg thaus nwg tsi tau ceevfaaj has tas yuav muaj tej xwm nuav. Ces nwg hab nwg cov tuabneeg txhaj yuav tsi muaj ib tug dlim le.

¹³Yog puab tsiv lug rua huv nroog, peb cov tuabneeg yuav nqaa hlua moog khi lub nroog ntawd tug ntsaa yeej caab kuas qaug taag moog rua nraag kwj haa. Tsi pub kuas tshuav ib lub nyuas pobzeb seem nyob sau ncov roob le.’ ”

¹⁴Axaloos hab cov Yixalayees has tas, “Husais zaaj tswvyim zoo dlua Ahithaufees zaaj tswvyim!” Tug TSWV ua rua Ahithaufees tej tswvyim kws zoo tsi muaj kuab lawm, txhaj tsi muaj leejtwg ua lawv le ntawd, yog le ntawd, tej kev puamtsuaj txhaj lug raug Axaloos.

¹⁵Husais txawm moog pav tej lug kws nwg tau has rua Axaloos hab cov Yixalayees tej thawjcoj noog, hab coj Ahithaufees tej lug moog pav huv tuabsi rua Xadaus hab Anpiyathas kws yog ob tug povthawj noog.

¹⁶Husais has ntxiv tas, “Taamsim nuav ca le tso tuabneeg moog has rua Daviv paub, kuas nwg tsi xob pw nraag tug dlej kws hlaa moog rua tom taj suabpuam, tabsis kuas nwg ca le hlaa tug Dlej Yauladees moog kuas dlhau plawg rua saab tim u, nwg hab nwg cov tuabneeg txhaj tsi raug nteg hab tsi raug tua.”

¹⁷Anpiyathas tug tub Yaunathaas hab Xadaus tug tub Ahima-as nyob rawv ntawm lub qhovdlej txhawv Elaunkees kws nyob saab nrau ntug nroog Yeluxalees tog, rua qhov ntshai nyob tsaam muaj tuabneeg pum obtug moog huv lub nroog. Muaj ib tug ntxhais qhev naj zag coj tej xuv tuaj qha rua obtug. Obtug maam le moog qha rua Vaajntxwv Daviv paub.

¹⁸Tabsis muaj ib nub ib tug mivnyuas tub pum obtug, nwg txawm lug qha rua Axaloos; yog le ntawd obtug txhaj maaj nrooj tsiv moog nkaum rua huv ib tug txivneej lub tsev huv Npahulees. Tug txivneej ntawd muaj ib lub qhov tshij nyob ze nwg lub tsev, ces obtug txhaj nqeg moog nkaum huv lub qhov tshij ntawd.

¹⁹Tug txivneej ntawd tug quaspuj muab ib dlaim ntaub lug nthuav npug thoob plawg lub qhov tshij hab muab nplej w thoob plawg rua sau, kuas tsi muaj leejtwg paub has tas, muaj tuabneeg nyob huv.

²⁰Axaloos cov numtswv tuaj rua huv tsev hab nug tug quaspuj ntawd has tas, “Ahima-as hab Yaunathaas obtug nyob qhov twg?” Tug quaspuj ntawd teb has tas, “Obtug hlaa dlej moog rua saab tim u lawm.” Cov txivneej ntawd nrhav obtug, tabsis tsi pum obtug le, puab txhaj rov qaab moog rua tom lub nroog Yeluxalees lawm.

²¹Tom qaab kws puab moog dlhau lawm, Ahima-as hab Yaunathaas obtug tawm huv qhov tshij lug hab moog qha rua Vaajntxwv Daviv paub. Obtug moog qha rua Daviv paub txug tej kws Ahithaufees tau nrhav tswvyim tawmtsaam Daviv hab has tas, “Mej ca le hlaa dlej moog saab tim u.”

²²Yog le ntawd, Daviv hab nwg cov tuabneeg txhaj hlaa tug dlej Yauladees thaus kaaj ntug txoog, puab tub hlaa dlhau dlej taag rua saab tim u lawm.

²³Thaus Ahithaufees paub has tas, tsi muaj tuabneeg pum zoo ua lawv le nwg has, nwg txhaj le muab eeb pem rua sau nwg tug neeg luav hab caij tsiv rov moog rua tim nwg lub qub zog lawm. Tom qaab kws nwg tu nwg tej khoom tav taag, nwg txawm moog dlai tuag. Luas coj nwg moog log rua huv nwg tsev tuabneeg lub qhov ntxaa.

²⁴Thaus Axaloos hab cov Yixalayees hlaa tug Dlej Yauladees tuaj, Daviv tub moog txug rua huv lub nroog Mahana-ees lawm.

²⁵(Axaloos tsaa Amaxas ua tug thawj tubrog hloov Yau-am chaw. Amaxas yog Yetheles kws yog cov tuabneeg Yisamayees tug tub; nwg nam hu ua Anpinkayis kws yog Nahases tug ntxhais, hab yog Xeluyas kws yog Yau-am nam tug nam hluas.)

²⁶Axaloos hab nwg cov tuabneeg tuaj tsuam yeej rua huv lub xeev Nkile-as.

²⁷Thaus Daviv moog txug huv lub nroog Mahana-ees, nwg txawm ntsib Nahases tug tub Saunas kws nyob tim lub nroog Lanpas huv tebchaws Amoos, hab ntsib Amiyees tug tub Makhis kws nyob huv lub nroog Laudenpas, hab Npaxilais kws nyob huv lub nroog Launkelees huv xeev Nkile-as.

²⁸Puab peb leeg nuav nqaa taig, laujkaub aav, choj pua chaw, nplej, ntsab, moov pobkws, mov kib, taum laag, taum mog, zib ntaab, roj mig nyuj qhuav, kua mig nyuj hab ob peb tug yaaj tuaj pub rua Daviv hab nwg cov tuabneeg tau siv hab tau noj. Rua qhov puab paub has tas Daviv hab nwg cov tuabneeg tub tshaib plaab hab tsaug heev tom roob mojsaab qhua lawm.