Read Hmong Njua 2 Xamuyees 18 Bible Online

2 Xamuyees 18 - Hmong Njua bible

2 Xamuyees 18

¹Vaajntxwv Daviv sau zog nwg cov tuabneeg lug ua ke, muab faib ua tej paab ib txheeb leej, tej paab ib puas leej hab tsaa cov thawj lug saib puab.

²Daviv txhaj xaa puab tawm moog ua peb paab, nrug Yau-am hab nwg tug kwv Anpisais hab Ithais kws tuaj huv lub nroog Nkas tuaj. Puab ib leeg coj ib paab. Hab vaajntxwv has rua nwg cov tuabneeg tas, “Kuv yuav nrug mej moog.”

³Tabsis puab teb has tas, “Koj tsi xob moog, txawm yog peb cov seem thim tsiv ntawm cov yeebncuab rov lug lossis peb raug tua tuag ib nraab lawm los yeej tsi tseemceeb dlaabtsi, rua qhov koj yog tug tseemceeb tshaaj peb kaum txeeb leej. Yog le ntawd, koj nyob huv nroog nuav txhij tuabneeg tuaj paab peb zoo dlua.”

⁴Vaajntxwv teb has tas, “Kuv yuav ua txhua yaam lawv le mej xaav kuas kuv ua.” Ces nwg txawm moog sawv ntawm roojvaag saib nwg cov tuabneeg tawm moog ua tej paab ib txheeb leej, hab tej paab ib puas leej.

⁵Daviv has rua Yau-am, Anpisais hab Ithais has tas, “Yog mej hlub kuv, thov mej tsi xob ua phem rua tug tub hluas Axaloos!” Cov tubrog puavleej nov Daviv has le ntawd rua nwg cov thawj tubrog.

⁶Daviv cov tubrog tawm moog rua tom roob mojsaab hab tua cov Yixalayees huv thaaj Haav Zoov kws yog cov Efalayees cheebtsaam aav.

⁷Cov Yixalayees swb Daviv cov tubrog; yog ib qhov poob tsaam txaus ntshai kawg le, nub ntawd xwb muaj neeg nkaum txheeb leej raug tua tuag.

⁸Puab sis tua tawg ri sua moog thoob plawg rua peg tej roob mojsaab, hab cov tuabneeg kws tuag rua huv haav zoov tseem coob tshaaj cov kws raug tua tuag rua huv tshaav rog.

⁹Ces thaus ntawd Axaloos txawm ntsib Daviv cov tuabneeg. Axaloos caij ib tug neeg zaag, tug neeg zaag dlha moog nkaag rua huv ib tsob qaab ntoo qheb, Axaloos lub cejdlaab txhaj dlaig nkaus rua sau nkhib ntoo. Tug neeg luav dlha dlhau plawg lawm ca Axaloos dlai ncuv rua sau.

¹⁰Daviv cov tuabneeg ib tug lug pum Axaloos, nwg txhaj moog qha rua Yau-am has tas, “Kuv pum Axaloos khuam dlai ncuv rua sau tug nkhib ntoo qheb.”

¹¹Yau-am teb has tas, “Yog koj pum nwg tag, ua caag koj tsi muab nwg tua kag? Kuv yuav muab kaum dlaim nyaj hab ib txuj hlaab rua koj.”

¹²Tabsis tug txivneej ntawd teb has tas, “Txawm yog koj yuav muab ib txheeb dlaim nyaj rua kuv los kuv yuav tsi muab kuv tug ntivteg moog tawmtsaam vaajntxwv tug tub lub cev le. Peb suavdlawg puavleej nov vaajntxwv tej lug kws nwg has rua koj, has rua Anpisais hab Ithais has tas, ‘Yog mej hlub kuv, thov tsi xob ua phem rua tug tub hluas Axaloos.’

¹³Yog has tas kuv tsi noog vaajntxwv lug, kuv muab Axaloos tua lawm, vaajntxwv yeej yuav paub xwb, rua qhov thaus nwg nov, koj yuav tsi paab kuv dlaws zaaj nuav.”

¹⁴Yau-am teb has tas, “Kuv tsi xaav nkim sijhawm nrug koj has ntxiv lawm.” Yau-am txhaj rhu hlo nwg peb raab muv nkaug kag Axaloos hauvsab thaus kws Axaloos tseem tsi tau tuag, hab khuam ncuv rua sau tug nkhib ntoo qheb.

¹⁵Ces Yau-am cov tubrog kaum leej txhaj hlaa hlo moog rua ntawm Axaloos hab muab nwg loos tuag kag lawm.

¹⁶Yau-am tshuab raaj tshuab xyu kuas tseg tsi xob sis tua, cov tubrog txhaj thim rov qaab lug tsi caum cov Yixalayees ntxiv lawm.

¹⁷Puab muab Axaloos lub cev txu lug hab kwv moog pov rua huv ib lub qhov tub tub huv haav zoov, hab muab pobzeb txhub lub qhov ntawd ua ib pawg ca. Taagnrho cov Yixalayees, nyag txhaj tsiv nyag rov moog tsev taag lawm.

¹⁸Thaus kws Axaloos tseem ua neej nyob, nwg puab tau ib tug pemthuam rua huv lub Haav Vaajntxwv, ca ua chaw ncu txug nwg, rua qhov nwg tsi muaj tub lug ris nwg lub npe. Yog le ntawd, txhaj muab tug pemthuam ntawd hu lawv le nwg lub npe hab naj nub nua tseem paub has tas yog Axaloos tug pemthuam.

¹⁹Ces Xadaus tug tub Ahima-as txhaj thov Yau-am has tas, “Ca kuv coj tej xuv nuav moog qha rua vaajntxwv paub has tas, tug TSWV tub cawm nwg dlim ntawm nwg cov yeebncuab lawm.”

²⁰Yau-am teb has tas, “Tsi xob moog; nub nua koj tsi xob coj ib yaam xuv dlaabtsi moog qha rua vaajntxwv paub le. Lwm nub tsaiv koj maam le moog, rua qhov nub nua yog nub kws vaajntxwv tug tub tuag.”

²¹Yau-am has rua nwg tug tubqhe kws yog tuabneeg Sudaas has tas, “Koj ca le moog qha tej kws koj pum ntawd rua vaajntxwv paub.” Tug tubqhe txhaj le nyo ntshis hawm hab moog lawm.

²²Ahima-as pheej thov has tas, “Txawm yog le caag los xij, thov ca kuv coj tej xuv nuav moog qha rua vaajntxwv hab.” Yau-am nug has tas, “Mivtub, vim le caag koj xaav moog? Koj yeej yuav tsi tau nqe zug dlaabtsi le los sav!”

²³Ahima-as rov has dlua tas, “Txawm yog le caag los xij, kuv xaav moog xwb.” Yau-am teb has tas, “Koj ca le moog.” Yog le ntawd, Ahima-as txhaj dlha taug txujkev kws moog rua nraag lub Haav Yauladees, hab moog txeeb kag tug tubqhe ntawd ntej lawm.

²⁴Daviv taabtom nyob ntawm lub roojvaag nroog saab huv hab saab nrau kis nruab nraab. Tug tub faajxwm nce moog rua sau tug ntsaa yeej hab sawv sau roojvaag; saib moog rua tim ncauj ke, nwg pum ib tug txivneej dlha taug kev lug.

²⁵Nwg hu qha rua vaajntxwv, vaajntxwv teb has tas, “Yog nwg tuab leeg lug xwb, ces yog nwg coj xuv zoo lug ntaag!” Tug txivneej ntawd dlha lug ze zuj zug.

²⁶Tug tub faajxwm rov pum dlua ib tug dlha lug hab, nwg txhaj hu rua tug tu lub roojvaag has tas, “Saib tid saib, muaj dlua ib tug txivneej dlha lug hab.” Vaajntxwv teb has tas, “Tug ntawd los yog coj xuv zoo lug hab.”

²⁷Tug faajxwm has tas, “Kuv saib mas tug txivneej kws dlha ua ntej zoo le yog Ahima-as ntaag.” Vaajntxwv has tas, “Nwg yog ib tug tuabneeg zoo, nwg txhaj coj xuv zoo lug.”

²⁸Ahima-as lug txhus caug ndlua rua ntawm vaajntxwv xubndlag hawm hab has tas, “Vaajntxwv, ua tug TSWV kws yog koj tug Vaajtswv tsaug, nwg tub paab koj yeej cov tuabneeg kws ntxeev sab rua koj lawm!”

²⁹Vaajntxwv nug has tas, “Tug tub hluas Axaloos puas noj qaab nyob zoo?” Ahima-as teb has tas, “Vaajntxwv, thaus koj tug thawj tubrog Yau-am tso kuv lug, kuv pum suavdlawg ntxhuv sab kawg le, tabsis kuv tsi muaj cuabkaav qha rua koj paub has tas yog muaj xwm dlaabtsi.”

³⁰Vaajntxwv has tas, “Koj lug ntawm nuav.” Ces nwg txawm txaav zog moog sawv ntawd.

³¹Tug tubqhe kws yog tuabneeg Sudaas lug txug hab has rua vaajntxwv has tas, “Vaajntxwv, kuv muaj xuv zoo qha rua koj! Nub nua tug TSWV tub paab koj yeej cov tuabneeg kws ntxeev sab rua koj lawm!”

³²Vaajntxwv nug has tas, “Tug tub hluas Axaloos puas noj qaab nyob zoo hab?” Tug tubqhe teb has tas, “Kuv thov kuas tej xwmtxheej kws raug nwg ntawm poob moog raug koj cov yeebncuab ib yaam nkaus, hab raug txhua tug kws ntxeev sab rua koj.”

³³Vaajntxwv tu sab kawg le. Nwg txhaj nce moog rua huv chaav kws nyob sau lub roojvaag hab moog quaj sau. Thaus nwg taabtom nce moog, nwg quaj has tas, “Kuv tug mivtub! Kuv tug tub Axaloos! Axaloos kuv tug mivtub! Yog hloov tau ca kuv tuag hloov koj chaw, Axaloos kuv tug mivtub! Kuv tug tub!”