Read Hmong Njua 2 Xamuyees 20 Bible Online

2 Xamuyees 20 - Hmong Njua bible

2 Xamuyees 20

¹Muaj ib tug txivneej hu ua Senpas, nyob huv lub nroog Nkilenkas, nwg yog Npikelis tug tub kws yog xeem Npeenyamees. Nwg yog ib tug tuabneeg sab phem heev. Nwg tshuab raaj tshuab xyu hab hu has tas, “Cov Yixalayees, peb tub tsi muaj feem nrug Daviv, peb tsi xob nrug nwg moog!”

²Yog le ntawd, cov Yixalayees txhaj tso Daviv tseg hab nrug Senpas moog lawm, tabsis cov Yudas tseem muab sab npuab Daviv hab lawv nwg qaab tom tug dlej Yauladees lug txug rua huv lub nroog Yeluxalees.

³Thaus Daviv lug txug huv lub nroog Yeluxalees, nwg muab nwg kaum tug nam yau kws nwg tso tseg tu lub loog, cais hlo rua ib lub tsev hab tso cov faajxwm zuv. Nwg muab txhua yaam kws puab xaav tau xaa moog rua puab, tabsis nwg tsi moog nrug puab pw le lawm. Nwg tu ib qhov chaw rua puab nyob ib yaam le tej puj ntsuag moog taag puab simneej le.

⁴Vaajntxwv has rua Amaxas has tas, “Koj ca le moog hu cov Yudas tuaj ua ke hab pigkig koj yuavtsum nrug puab tuaj rua ntawm nuav.”

⁵Amaxas moog hu puab, tabsis nwg tsi rov tuaj lawv le lub sijhawm kws vaajntxwv teem kuas nwg tuaj.

⁶Yog le ntawd, vaajntxwv txhaj has rua Anpisais has tas, “Npikelis tug tub Senpas tseem yuav ua phem rua peb heev tshaaj Axaloos ua hab. Koj ca le coj kuv cov tuabneeg moog lawv nwg qaab, tej zag nwg yuav nyob huv tej nroog kws txhim ntsaa yeej khov kho, kuas nwg tau chaw tsiv nkaum peb.”

⁷Yog le ntawd, Yau-am cov tuabneeg, cov tubrog hab taagnrho cov tubrog kws seem huv Yeluxalees txhaj nrug Anpisais moog caum Npikelis tug tub Senpas.

⁸Thaus puab moog txug ntawm lub pobzeb luj huv Nkinpe-oos, Amaxas moog ntsib puab ntawd. Yau-am yeej naav rawv cev rig tsho sis tua nrug ib raab ntaaj ntxig rua huv naab hab muab hlaab paav khov kho rua ntawm dluav. Ces thaus Yau-am naam zog moog raab ntaaj txawm hlauv hlo.

⁹Yau-am has rua Amaxas has tas, “Kuv tug phoojywg, koj puas noj qaab nyob zoo?” Ces nwg cev loo nwg saab teg xis moog tuav nkaus Amaxas cov fwjtxwv le yuav nwj Amaxas.

¹⁰Amaxas tsi ceevfaaj kws yuav muab ib yaam dlaabtsi lug thaiv kuas tau raab ntaaj, ces Yau-am txhaj tuab nkaug Amaxas plaab tshaab plawg ua nyuv tshau lug rua huv aav. Amaxas tuag kag taamsim ntawd, hab Yau-am yeej tsi tau loos ntxiv le lawm. Yau-am hab nwg tug kwv Anpisais rau sab ntso moog caum Senpas qaab.

¹¹Yau-am cov tuabneeg ib tug sawv ib saab ntawm Amaxas lub cev tuag hu has tas, “Txhua tug kws tuaj Yau-am hab Daviv tog ca le lawv Yau-am qaab!”

¹²Amaxas tuag xyaab leeg hab tsau ntshaav tsawv huv plawv kev. Yau-am ib tug tubrog pum has tas, txhua tug puavleej lug sawv taag ua ib pawg rua ntawd lawm, nwg txhaj muab lub cev tuag hai tawm huv plawv kev moog tso rua tom haav puamkhaab hab muab ib dlaim choj npug rua.

¹³Ces tom qaab kws muab tug tuag ntawd tshem tawm huv plawv kev lawm, puab txhua tug txhaj lawv Yau-am qaab moog caum Senpas.

¹⁴Senpas moog dlhau plawg cov Yixalayees tug nrimteb moog rua huv lub nroog Anpees Npethees Ma-akas, hab taagnrho Npikelis cov kwvtij puavleej sau nthwv tuaj nrug nwg moog rua huv lub nroog.

¹⁵Yau-am cov tuabneeg nov has tas, Senpas nyob huv nroog, yog le ntawd puab txhaj moog vij lub nroog ntawd. Puab muab aav lug meem saab ntsaa yeej nrau hab khawb huv taw ntsaa yeej kuas tug ntsaa yeej qaug.

¹⁶Muaj ib tug quaspuj ntse heev nyob huv lub nroog ntawd, nwg qw huv lub nroog tuaj has tas, “Mej ca le noog! Mej ca le noog kuv has! Has rua Yau-am kuas ca le lug ntawm nuav; kuv xaav nrug nwg thaam!”

¹⁷Yau-am txawm txaav zog moog ze tug quaspuj ntawd, tug quaspuj ntawd nug has tas, “Koj yog Yau-am los?” Yau-am teb has tas, “Kuv yog Yau-am ntaag.” Tug quaspuj ntawd has tas, “Koj ca le noog kuv has.” Yau-am teb has tas, “Kuv yeej noog koj has.”

¹⁸Tug quaspuj ntawd txawm has tas, “Luas ibtxwm has tas, ‘Ca le moog nrhav tej lug teb ntawm Anpees,’ puab ua le ntawd txhaj sis has hum lawm.

¹⁹Peb muaj kev thaajyeeb hab kev ncaaj nceeg nyob huv lub tebchaws Yixalayees nuav. Vim le caag koj pheej nrhav kev muab lub nroog kws yog leej nam huv lub tebchaws Yixalayees nuav rhuav povtseg? Puas yog koj xaav nqog tej kws yog tug TSWV tug?”

²⁰Yau-am teb has tas, “Kuv tsi ua kuas puamtsuaj ib zag le. Kuv tsi laam rhuav tshem lossis ua kuas peb lub nroog nuav puamtsuaj!

²¹Tsi yog peb txhobtxwm ua le ntawd. tabsis muaj ib tug txivneej hu ua Senpas kws yog Npikelis tug tub. Nwg ntxeev sab rua Vaajntxwv Daviv hab tsiv peg lub nroog Efalayees tuaj rua huv nuav lawm. Yog mej muab tau tug tuabneeg nuav cob rua peb, kuv yuav tso lub nroog nuav tseg.” Tug quaspuj ntawd has tas, “Peb yuav muab nwg lub taubhau pov tuaj rua mej.”

²²Ces tug quaspuj ntawd txhaj moog cuag cov tuabneeg huv lub nroog lawv le nwg npaaj sab lawm, puab txhaj muab Senpas lub taubhau txav pov tuaj rua Yau-am saab ntsaa yeej nrau. Yau-am txhaj tshuab raaj tshuab xyu kuas nwg cov tuabneeg tso lub nroog ntawd tseg, puab txhaj rov lug tsev lawm. Yau-am rov lug cuag vaajntxwv rua huv lub nroog Yeluxalees.

²³Yau-am yog cov Yixalayees tug thawj tubrog; Yehauyadas tug tub Npenayas yog tug saib cov tubrog kws zuv Daviv;

²⁴Adaunilaas yog tug saib cov ua num; Ahilus tug tub Yehausafas yog tug saib cov tuav ntaub ntawv;

²⁵Sevas yog tug teev ntawv, Xadaus hab Anpiyathas yog ob tug povthawj,

²⁶hab Ilas kws nyob huv lub nroog Ya-ilas yog Daviv tug povthawj hab.