Read Hmong Njua 2 Xamuyees 21 Bible Online

2 Xamuyees 21 - Hmong Njua bible

2 Xamuyees 21

¹Lub sijhawm kws Daviv ua vaajntxwv kaav lub tebchaws muaj kev tshaib plaab tau peb xyoos txwm nkaus. Yog le ntawd, Daviv txhaj moog nug tug TSWV txug zaaj ntawd, tug TSWV has tas, “Tub yog Xa-ules hab nwg tsev tuabneeg ua txhum, vim puab tua tuabneeg; nwg muab cov tuabneeg huv Nkinpe-oos tua tuag taag.”

²(Cov tuabneeg kws nyob huv Nkinpe-oos tsi yog tuabneeg Yixalayees; puab yog cov tuabneeg Amaules ib paab nyuas tsawg heev kws cov Yixalayees tau coglug rua puab has tas, yuav tsomkwm puab, tabsis Xa-ules moog muab puab tua tuag taag lawm, rua qhov Xa-ules mob sab heev rua cov Yixalayees hab cov Yudas.)

³Yog le ntawd, Daviv caw cov Nkinpe-oos tuaj cuag nwg hab has rua puab tas, “Mej xaav kuas kuv ua dlaabtsi paab mej? Kuv yuav ua le caag txhaj le pauj tau tej kws luas ua rua mej taag lug lawm, mej txhaj yuav foom koob moov rua tug TSWV tsaav tuabneeg.”

⁴Puab teb has tas, “Peb tau nrug Xa-ules hab nwg tsev tuabneeg sis tshe txaus lawm, txawm yog yuav muab nyaj muab kub lug khu peb hab muab cov Yixalayees ib tug twg tua pauj los peb yeej tsi txaus sab le.” Daviv txhaj nug has tas, “Yog le ntawd, mej xaav kuas kuv ua dlaabtsi paab mej?”

⁵Puab teb has tas, “Xa-ules yeej xaav muab peb tua kuas tu noob nrho, tsi xaav kuas peb ib tug seem nyob huv lub tebchaws Yixalayees nuav le.

⁶Yog le ntawd, yuavtsum muab nwg xyaa tug tub xeebntxwv cob rua peb, hab peb yuav muab puab dlai taabmeeg tug TSWV rua huv lub nroog Nkinpe-as kws yog Xa-ules lub nroog kws tug TSWV tau xaiv nwg ua vaajntxwv.” Vaajntxwv teb has tas, “Kuv yuav muab puab cob rua mej teg.”

⁷Tabsis vim Daviv hab Yaunathaas tau coglug khov heev rua tug TSWV lawm, Daviv txhaj tseg Yaunathaas tug tub Mefinpauses kws yog Xa-ules tug xeebntxwv ca.

⁸Txawm le ntawd los Daviv tseem moog nteg Amaunis hab Mefinpauses kws yog A-iyas tug ntxhais Lixenpas ob tug tub kws nwg yug rua Xa-ules hab Daviv moog nteg Xa-ules tug ntxhais Melas tsib tug tub kws Melas yug rua Npaxilais tug tub Adeyees huv Mehulas coj lug rua puab huv tuabsi.

⁹Hab Daviv muab puab cob rua cov Nkinpe-oos. Cov Nkinpe-oos txhaj coj puab moog dlai taabmeeg tug TSWV, ces xyaa leej ntawd txhaj tuag ua ke huv tuabsi lawm. Puab raug tua tuag rua thaus lub caij ntuj naag tu kws taabtom pib hlais nplej.

¹⁰Xa-ules tug nam yau Lixenpas kws yog A-iyas tug ntxhais, txhaj muab ntaub tsaaj coj moog ua ib lub tsev pheebsuab rua nwg nyob sau lub pobzeb kws puab tso cov tuag, hab nwg nyob huv lub tsev ntawd thaus pib hlais nplej moog txug thaus lub caij ntuj naag nqeg. Nruab nub nwg zuv tsi pub noog lug ze cov tuag, hab mo ntuj nwg zuv tsi pub tej tsaj lug ze cov tuag ntawd.

¹¹Thaus Daviv nov tej kws Lixepas ua ntawd,

¹²Daviv txhaj moog muab Xa-ules hab Xa-ules tug tub Yaunathaas cov pobtxhaa ntawm cov Yanpes huv Nkile-as lug. (Puab moog nyag tej pobtxhaa ntawd huv lub plawv nroog Npes Saas, ntawm qhov chaw kws cov Filitees muab Xa-ules hab Yaunathaas dlai nub kws puab tua Xa-ules tuag rua sau lub Roob Nkinpau-as ntaag.)

¹³Daviv khaws Xa-ules, Yaunathaas hab xyaa tug txivneej kws luas muab dlai nrug obtug ua ke ntawm cov pobtxhaa huv tuabsi lug.

¹⁴Ces puab txhaj muab Xa-ules hab Yaunathaas obtug cov pobtxhaa coj moog log rua huv Xa-ules txiv Kises lub qhov ntxaa ntawm lub nroog Xelas huv xeev Npeenyamees. Puab ua txhua yaam lawv le vaajntxwv has kuas puab ua. Tom qaab ntawm Vaajtswv txhaj teb tej lug kws puab thov paab puab lub tebchaws.

¹⁵Cov Filitees hab cov Yixalayees rov ua rog dlua, ces Daviv hab nwg cov tuabneeg txhaj moog tua cov Filitees. Thaus puab taabtom sis tua ntawd Daviv tsaug muas heev.

¹⁶Muaj ib tug txivneej luj heev hu ua Inpinpenaus nqaa ib raab muv tooj nyaav xyaa choj hab rau laag hab nwg ris ib raab ntaaj tshab. Nwg xaav has tas, nwg yuav tua kuas tau Daviv povtseg.

¹⁷Tabsis Xeluyas tug tub Anpisais txaav zog lug paab Daviv ntaus tug tuabneeg luj heev ntawd hab muab tua tuag kag lawm. Daviv cov tubrog coglug rua Daviv kuas nwg tsi xob nrug puab moog tua rog ntxiv lawm. Puab has tas, “Peb cov Yixalayees ca sab rua koj xwb, peb tsi xaav ca cov Yixalayees lub teeb tuag.”

¹⁸Tom qaab nuav rov muaj kev sis tua nrug cov Filitees huv lub nroog Nkaunpes dlua, thaus ntawd Xinpekas kws nyob huv Husas txhaj tua ib tug tuabneeg luj heev kws hu ua Xelas tuag lawm hab.

¹⁹Rov muaj kev sis tua nrug cov Filitees ntxiv huv lub nroog Nkaunpes. Yais tug tub Ehanas kws nyob huv lub nroog Npelehees txhaj tua Nkauli-am kws nyob huv lub nroog Nkas tuag. Nkauli-am muaj ib raab muv, tug vug tuab ib yaam le lub nqog ntus ntaub.

²⁰Tseem rov muaj kev sis tua nyob huv lub nroog Nkas. Nyob huv muaj ib tug txivneej luj sab hab nwg nyam sis tua heev. Nwg ib saab teg muaj rau tug ntivteg hab ib saab kutaw muaj rau tug ntivtaw.

²¹Nwg tsawm foom cov Yixalayees, ces Yaunathaas kws yog Daviv tijlaug tug tub Samas muab tug txivneej ntawd tua tuag kag.

²²Plaub tug txivneej nuav yog cov tuabneeg luj sab heev, puab yeej yog cov tuabneeg kws yug nyob huv lub nroog Nkas. Puab raug Daviv hab nwg cov tuabneeg muab tua tuag taag huv tuabsi lawm.