Read Hmong Njua 2 Xamuyees 22 Bible Online

2 Xamuyees 22 - Hmong Njua bible

2 Xamuyees 22

¹Thaus tug TSWV cawm Daviv dlim ntawm Xa-ules hab Daviv cov yeebncuab lug, Daviv hu zaaj nkauj nuav ua tug TSWV tsaug:

²Tug TSWV yog tug kws tsomkwm kuv; nwg yog kuv lub chaw nkaum kws ruaj khov.

³Kuv tug Vaajtswv yog tug tsomkwm kuv, hab tub yog muaj nwg kuv txhaj tau nyob kaaj sab lug. Nwg tiv thaiv kuv ib yaam le dlaim thaiv nav ntaaj; Nwg tiv thaiv kuv hab muab kuv tso rua qhov chaw thaajyeeb lug. Nwg yog kuv tug Cawmseej, nwg tsomkwm kuv hab paab kuv dlim txujkev puamtsuaj.

⁴Tsimnyog kuv qhuas tug TSWV, kuv tsaa suab hlo thov tug TSWV hab nwg cawm kuv dlim ntawm kuv cov yeebncuab.

⁵Kev tuag nphau nphwv nyob puagncig kuv; Txujkev puamtsuaj npau phwj yog tuaj qhwv nkaus kuv.

⁶Txujkev tuag kws txaus ntshai nyob puagncig kuv, hab lub qhov ntxaa cuab lug thaiv kuv kev tsi pub kuv dlhau.

⁷Thaus kuv ntsib kev nyuaj sab ntxhuv plawv kuv hu kuv tug TSWV xwb; kuv hu kuv tug Vaajtswv paab kuv. Huv nwg lub tuamtsev nwg nov kuv tej lug thov; Nwg noog kuv lub suab quaj thov nwg paab.

⁸Ces lub nplajteb txawm qeeg hab ua zug koog; ncej ntug quaj qeeg nkawg nyob tsi tswm, rua qhov Vaajtswv chim heev!

⁹Paa nchu auv nab huv nwg qhovntswg tuaj, nplaim tawg hab ncaig tawg cig laam lug huv nwg qhovncauj.

¹⁰Nwg muab lub ntuj dlua qheb hlo hab nqeg plhuav nrug cov fuab tsaus dlub ncab huv nwg qaab xibtaws lug.

¹¹Nwg caij tug qhelus yaa ceev heev, pum nwg nyob rawv sau ob phob tis cua.

¹²Nwg ua qhov tsaus ntuj thaiv nwg; tauv fuab tuab kws muaj naag nyob puagncig nwg;

¹³Muaj xub laim ua txaim tawg cig lab vog ntawm nwg xubndlag.

¹⁴Tug TSWV ua xub nroo qeeg nkawg sau ntuj tuaj, hab nov Vaajtswv tug muaj Fwjchim Luj kawg nkaus lub suab.

¹⁵Nwg tua nwg xibxub neevnti tuaj, hab nwg cov yeebncuab tsiv ri sua; nwg ua kuas muaj tsaglig xub laim lab vog muab puab lawv tawm tsiv.

¹⁶Qaab thu dlej havtxwv pum kev laam lug hab tsi muaj ib yaam dlaabtsi thaiv tau tej ncej txheem nplajteb, thaus tug TSWV npautawg, nwg tshev nwg cov yeebncuab nyooj lawg.

¹⁷Tug TSWV cev teg sau tuaj tuav kuv; nwg npu kuv tawm huv dlej qhov kws tub tshaaj plawg lug.

¹⁸Nwg cawm kuv dlim ntawm kuv cov yeebncuab lub fwjchim, dlim ntawm cov kws ntxub kuv, hab cov kws muaj zug dlua kuv.

¹⁹Luas tuaj tawmtsaam kuv thaus kuv raug kev txomnyem, tabsis tug TSWV tsomkwm kuv.

²⁰Nwg coj kuv lug nyob rua ntawm qhov chaw dlaav; nwg cawm kuv, rua qhov nwg txaus sab rua kuv.

²¹Tug TSWV muab nqe zug rua kuv, rua qhov kuv ua ncaaj nceeg; nwg foom koob moov rua kuv, rua qhov kuv tsi tau ua txhum.

²²Kuv ua lawv le tug TSWV txuj kevcai; kuv tsi tso kuv tug Vaajtswv tseg le.

²³Kuv ua lawv le nwg tej kevcai qha; kuv tsi tawv ncauj, kuv noog nwg tej lug saamfwm.

²⁴Nwg paub has tas kuv tsi tau ua txhum, rua qhov kuv yeej ceevfaaj nraim tsi ua yuam kev.

²⁵Yog le ntawd, nwg txhaj muab nqe zug rua kuv, rua qhov kuv ua ncaaj nceeg, vim nwg paub has tas kuv tsi tau ua txhum.

²⁶Tug TSWV, koj yeej ua ncaaj nceeg rua cov tuabneeg kws muab sab npuab koj, hab ua zoo rua cov tuabneeg kws ua zoo rua koj.

²⁷Koj ua sab dlawb paug rua cov tuabneeg dlawbhuv, tabsis koj ntxub ntxaug cov tuabneeg sab phem sab nkhaus.

²⁸Koj cawm cov tuabneeg kws txu fwjchim, tabsis koj txu cov tuabneeg kws khaavtheeb lub fwjchim.

²⁹Tug TSWV, koj yog kuv lub teeb, koj ua rua kuv txujkev tsaus ntuj pum kev kaaj nrig.

³⁰Koj pub kuv muaj zug ntaus yeej kuv cov yeebncuab hab muaj peevxwm kovyeej puab tej kev tawmtsaam.

³¹Tej kws Vaajtswv ua puavleej zoo, tug TSWV tej lug yog lug tseeb. Nwg zoo le dlaim thaiv nav ntaaj rua txhua tug kws vaamkhom nwg.

³²Tug TSWV tuab leeg txhaj yog Vaajtswv; Vaajtswv tuab leeg txhaj yog tug tsomkwm peb.

³³Tug Vaajtswv nuav yog kuv qhov chaw nraim cev kws ruaj khov, nwg ua rua kuv txuj hauv kev kaaj nrig.

³⁴Nwg ua rua kuv ob txhais kutaw tsuj khov ib yaam le tej rau muaslwj; nwg tsomkwm kuv nyob kaaj sab lug sau tej roob.

³⁵Nwg qha kuv ntaus rog, kuv txhaj muaj peevxwm tua tau raab neevnti kws muaj zug kawg nkaus.

³⁶Tug TSWV, koj tsomkwm kuv hab cawm kuv dlim; koj txujkev paab ua rua kuv muaj fwjchim luj.

³⁷Koj tsomkwm tsi pub luas nteg tau kuv, hab kuv tsi qaug ib zag le.

³⁸Kuv caum kuv cov yeebncuab hab tua yeej puab; kuv tsi tso tseg moog txug thaus kuv ua rua puab puamtsuaj taag.

³⁹Kuv muab puab ntaus qaug taag hab puab sawv tsi taug le; puab pw nrum sav nroog ntawm kuv kutaw.

⁴⁰Koj txhawb kuv tug zug, kuv txhaj muaj zug sis tua huv tshaav rog; hab pub kuv yeej kuv cov yeebncuab.

⁴¹Koj ua rua kuv cov yeebncuab tsiv tawm ntawm kuv hauv ntej moog; kuv ua rua txhua tug kws ntxub kuv raug puamtsuaj taag huv tuabsi.

⁴²Puab nrhav kev paab, tabsis tsi muaj leejtwg paab puab; puab thov tug TSWV, tabsis nwg tsi teb puab.

⁴³Kuv muab puab tsoo tawg mog nyoos ib yaam le tej moov aav; kuv tsuj puab ib yaam le tsuj tej aav nkus huv plawv kev.

⁴⁴Koj cawm kuv dlim ntawm cov tuabneeg kws ntxeev sab rua kuv, hab koj ca kuv ua tug kaav ntau tsaav tuabneeg; tej tsaav tuabneeg kws kuv tsi tau paub dlua los nwgnuav tub lug zwm rua kuv lawm.

⁴⁵Tej tuabneeg txawv tebchaws los tuaj qhau hau hawm kuv huv tuabsi; thaus puab nov kuv has, puab yeej fwm hab noog kuv tej lug.

⁴⁶Puab qaug zug hab tawm tej tug tshee naa huv puab tej chaw nyob tuaj.

⁴⁷Tug TSWV kws muaj sa nyob, ua tsaug kws koj yog tug tsomkwm kuv; ca le pav Vaajtswv tug kws cawm kuv lub koob kuas nrov nchaa moo lug!

⁴⁸Nwg paab kuv tua yeej kuv cov yeebncuab, nwg muab ntau tsaav tuabneeg rua kuv kaav

⁴⁹hab cawm kuv dlim ntawm kuv cov yeebncuab. Tug TSWV, koj paab kuv tua yeej kuv cov yeebncuab lawm tag; hab paab kuv dlim ntawm cov tuabneeg limham kws tuaj txuv kuv.

⁵⁰Yog le ntawd, kuv ua koj tsaug taabmeeg txhua tsaav tuabneeg; kuv hu nkauj qhuas koj tuab leeg xwb.

⁵¹Vaajtswv paab nwg tug vaajntxwv muaj yeej luj kawg nkaus le; nwg yeej hlub tug kws nwg xaiv tseg lawm; nwg hlub Daviv hab Daviv cov xeebntxwv moog ibtxhis le.