Read Hmong Njua 2 Xamuyees 23 Bible Online

2 Xamuyees 23 - Hmong Njua bible

2 Xamuyees 23

¹Yexais tug tub Daviv yog tug tuabneeg kws Vaajtswv tsaa ua tug muaj fwjchim luj kawg nkaus, nwg yog tug kws Yakhauj tug Vaajtswv xaiv lug ua vaajntxwv, hab nwg yog tug kws sau cov nkauj kws zoo tshaaj plawg rua cov Yixalayees hu. Tej lug nuav yog Daviv cov lug has thaus kawg:

²Tug TSWV tug ntsujplig has rua kuv; nwg tej lug nyob ntawm kuv tug nplaig;

³Cov Yixalayees tug Vaajtswv tau has tseg lawm; Tug kws tsomkwm cov Yixalayees has le nuav rua kuv, “Tug vaajntxwv kws kaav ncaaj nceeg, hab kaav lug ntawm txujkev fwm Vaajtswv,

⁴nwg zoo ib yaam le lub nub ci thaus sawv ntxuv kws tsi muaj fuab le, yog lub nub kws ua rua tej nroj tsuag ntsais tsa thaus lug naag taag.”

⁵Vaajtswv yuav foom koob moov ntau npaug rua kuv cov xeebntxwv, rua qhov nwg tau coglug ruaj khov rua kuv moog ibtxhis; hab lu lug cog tseg ntawd yuav tsi muab rhuav ib zag le, yog lu lug cog tseg kws tsi txawj hloov. Tej ntawd yog tej kws kuv xaav tau; qhov ntawd yuav yog kuv txujkev muaj yeej, hab Vaajtswv yuav muab tej ntawd rua kuv lawv le nwg tau coglug tseg.

⁶Tabsis cov tuabneeg kws tsi fwm Vaajtswv, puab zoo ib yaam le tej xuavpaug kws muab sau povtseg; tsi muaj tuabneeg xaav muab teg kov le lawm.

⁷Mej yuavtsum muab cuabyeej hlau lossis muv hlau moog sua lawm xwb; puab yuav raug hlawv kub nyab kuas taag dlu lug.

⁸Cov tuabneeg nuav yog Daviv cov tubrog kws nto moo tej npe: Tug ib yog Yauses Npasenpes kws nyob huv lub nroog Takhemoos ua tug thawj ntawm “Peb Leeg” Nwg muab nwg tug muv nrug yim pua leej txivneej sis nkaug hab nwg muab puab nkaug tuag taag rua huv tshaav rog.

⁹Tug ob kws nto moo ntawm peb leeg yog Daudaus tug tub Ele-axas kws yog cuab Ahaus. Muaj ib nub nwg hab Daviv twv nrug cov Filitees kws taabtom tuaj txoos ua ke rua ntawm tshaav rog. Cov Yixalayees swb thim rov qaab,

¹⁰tabsis Ele-axas sawv nreg nroog tua cov Filitees moog txug thaus nwg tsaug npaab hab tsaa tsi taug nwg raab ntaaj lawm. Nub ntawd tug TSWV muaj yeej luj kawg le. Tom qaab kws tej ntawd dlhau lawm, cov Yixalayees maam le rov lug rua huv qhov chaw kws Ele-axas nyob hab lug hle cov tuabneeg kws Ele-axas tua tuag tej rig tsho hlau.

¹¹Tug peb kws nto moo ntawm peb leeg ntawd yog Akhees tug tub Samas kws nyob huv lub nroog Halas. Cov Filitees tuaj txoos ua ke rua ntawm Lehis kws yog ib thaaj teb taum mog. Cov Yixalayees tsiv cov Filitees,

¹²tabsis Samas sawv nreg nroog ntawm nwg lub chaw huv thaaj teb ntawd tiv tua cov Filitees. Nub ntawd tug TSWV muaj yeej luj kawg le.

¹³Thaus yuav txug lub caij pib sau qoobloo, peb leeg ntawm “Peb Caug Leej” ntawd, txawm nqeg moog rua nraag lub qhov tsua Adulas, qhov chaw kws Daviv nyob. Thaus ntawd cov Filitees taabtom tuaj tsuam yeej rua huv lub Haav Lefayees.

¹⁴Lub sijhawm ntawd Daviv moog nyob sau roob hab muaj ib paab tubrog Filitees kaav hlo lub nroog Npelehees.

¹⁵Daviv ncu tsev heev, nwg txhaj seev has tas, “Yuav ua le caag kuv txhaj khaiv tau ib tug moog cug cov dlej huv lub qhov tshij kws nyob ntawm roojvaag nroog Npelehees lug rua kuv haus!”

¹⁶Ces peb tug tubrog kws nto moo ntawd txhaj le dlha ceev heev moog phua plhawv cov Filitees lub yeej moog cug cov dlej huv lub qhov tshij kws nyob ntawm lub roojvaag nroog Npelehees, hab nqaa lug rua Daviv. Tabsis Daviv tsi kaam haus cov dlej ntawd, nwg muab laub fij rua tug TSWV,

¹⁷Daviv has tas, “Thov kuv tug Vaajtswv txwv tsi xob pub kuv haus cov dlej nuav! Puas tsimnyog kuv haus cov ntshaav kws yog cov tuabneeg nuav txujsa? Vim puab muab puab txujsa moog pauv txhaj nqaa tau cov dlej nuav lug.” Nwg txhaj tsi kaam haus cov dlej ntawd. Tej nuav yog peb tug tubrog kws sab tawv ntawd moog nqaa tau lug.

¹⁸Anpisais kws yog Yau-am tug kwv, (Obtug nam hu ua Xeluyas) ua tug thawj ntawm “Peb caug leej kws Nto Moo ntawd.” Nwg siv nwg raab ntaaj tua peb puas leej txivneej hab muab puab tua tuag taag huv tuabsi. Nwg txhaj yog tug kws nto moo ntawm “Peb Caug Leej” ntawd.

¹⁹Nwg yog tug kws nto moo tshaaj ntawm “Peb Caug Leej” ntawd hab nwg tau ua puab tug thawjcoj, tabsis nwg tseem nto moo tsi npaum le “Peb Leeg” ntawd hab.

²⁰Yehauyadas tug tub Npenayas kws nyob huv lub nroog Kaxees tuaj, nwg yog ib tug kws nto moo heev hab. Nwg muaj sab tawv ua tau ntau yaam zoo. Nwg tua ob tug tubrog Mau-am kws ua tau kawg nkaus tuag huv tuabsi lawm. Muaj ib nub kws lug dlaus hlub heev los nwg tseem nqeg moog tua tau ib tug tsuv ntxhuav huv qhov aav lug hab.

²¹Hab nwg tseem tua ib tug tubrog Iziv kws luj heev tuag. Tug tuabneeg Iziv ntawd nqaa ib raab muv, tabsis Npenayas muab qws ntaus tug tuabneeg Iziv ntawd hab txeeb tau nwg raab muv ntawm nwg teg lug, hab muab tug tubrog Iziv ntawd nkaug tuag lawm.

²²Tej ntawd tub yog teg num kws Npenayas ua. Nwg yog ib tug ntawm “Peb caug Leej.” ntawd.

²³Nwg yog ib tug kws nto moo heev ntawm “Peb Caug Leej”. Nwg tseem tsi nto moo npaum le “Peb Leeg” ntawd hab. Daviv txhaj tsaa nwg ua tug thawj saib cov tubrog kws zuv Daviv.

²⁴Xaam taagnrho “Peb Caug Leej” ntawd muaj npe lawv le nraag nuav: 1 Yau-am tug kwv Axahees Daudaus tug tub Ehanas kws nyob huv Npelehees Samas hab Elikas kws nyob huv Halaus tuaj Helexas kws yog tuabneeg Peletes, Ikes tug tub Ilas kws nyob huv Tekau-as tuaj, Anpi-exes kws nyob huv Anathaus tuaj, Menpunais kws yog tuabneeg Husas, Zalemoos kws yog tuabneeg Ahus, Mahalais kws nyob huv Netaufas tuaj, Npa-anas tug tub Heles kws nyob huv Netaufas, Linpais tug tub Ithais kws nyob huv Nkinpe-as xeev Npeenyamees tuaj, Npenayas kws nyob huv Pilathoos tuaj, Hidais kws nyob huv lub haav ze rua ntawm Nka-as tuaj, Anpi-Anpoos kws yog tuabneeg Alanpas, Amaves kws nyob huv Npahulees tuaj, Eliyanpas kws nyob huv Sa-anpoos yog Yasees cov tub, Yaunathaas, Samas kws yog tuabneeg Halales, Salas tug tub Ahiyas kws nyob huv Halas tuaj, Ahanpais tug tub Elifelej kws nyob huv Ma-akas tuaj, Ahithaufees tug tub Eli-(...)