Read Hmong Njua 2 Xamuyees 3 Bible Online

2 Xamuyees 3 - Hmong Njua bible

2 Xamuyees 3

¹Cov kws tuaj Xa-ules tsev tuabneeg tog hab cov kws tuaj Daviv tsev tuabneeg tog ua rog sis tua tau ntev loo. Txawm le ntawd los Daviv pheej muaj zug zuj zug ntxiv xwb, tabsis Xa-ules tsev tuabneeg qaug zug zuj zug lawm.

²Cov nuav yog Daviv rau tug tub kws yug huv lub nroog Henploos: Anoos, nwg nam hu ua Ahinau-as kws nyob huv Yexelees;

³Khile-as, nwg nam hu ua Anpinkayis kws yog Nanpaas tug quaspuj kws Daviv yuav huv Kalemees lug; Axaloos, nwg nam hu ua Makhas kws yog Vaajntxwv Talemais kws kaav lub nroog Nkesus tug ntxhais;

⁴Adauniyas, nwg nam hu ua Hankis; Sefatiyas nam hu ua Anpitas;

⁵Ile-as nam hu ua Elas. Taagnrho cov tub nuav puavleej yug huv lub nroog Henploos.

⁶Ntu kws cov tuabneeg tuaj Daviv tog hab cov kws tuaj Xa-ules tsev tuabneeg tog pheej ua rog tsi tseg ntawd, Aneles yog tug kws muaj fwjchim luj zuj zug ntawm cov tuabneeg kws tuaj Xa-ules tog.

⁷Muaj ib nub Xa-ules tug tub Isenpauses tau lam has tas, Aneles moog nrug Xa-ules tug nam yau Lixefas kws yog Ayas tug ntxhais pw.

⁸Qhov nuav ua rua Aneles chim heev. Nwg txhaj has tas, “Koj xaav has tas kuv yuav ntxeev sab rua Xa-ules nua los? Koj xaav has tas kuv yog tug txhawb cov Yudas nua los? Thaus xubthawj kuv yeej ibtxwm leeg tej teebmeem kws koj txiv Xa-ules hab nwg cov kwvtij, nwg cov phoojywg tau ua lug lawm, hab kuv tub tsi pub koj swb Daviv ib zag le; ua caag nub nua koj tseem laam lam has tas, kuv ua txhum rua tug quaspuj ntawd hab!

⁹Tug TSWV yeej coglug rua Daviv lawm has tas, nwg yuav muab lub tebchaws tshem ntawm Xa-ules hab nwg cov xeebntxwv, tug TSWV yuav tsaa Daviv ua vaajntxwv kaav cov Yixalayees hab cov Yudas, txij ndlua saab tebchaws tom nuav moog txug ndlua saab tebchaws tom u. Yog kuv tsi ua kuas tav le kws has lug nuav, mas thov Vaajtswv tua kuas kuv tuag!”

¹¹Isenpauses ntshai Aneles heev has tsi taug ib lu lug le.

¹²Aneles txhaj tso tuabneeg moog has rua Daviv, thaus kws Daviv tseem nyob huv lub nroog Henploos has tas, “Leejtwg yuav kaav lub tebchaws nuav? Koj ca le nrug kuv sis coglug, kuv txhaj yuav paab has kuas cov Yixalayees lug tuaj koj tog.”

¹³Daviv teb has tas, “Zoo lawm! Kuv yuav nrug koj sis coglug, tabsis kuv xaav tau ib yaam ntawm koj tsaiv: Thaus koj tuaj cuag kuv, koj yuavtsum coj Xa-ules tug ntxhais Mikhas tuaj rua kuv. Yog koj tsi ua le ntawd, koj yuav tsi pum kuv ib zag le.”

¹⁴Hab Daviv tso tuabneeg moog has rua Xa-ules tug tub Isenpauses has tas, “Ca le xaa Mikhas kws yog kuv tug quaspuj tuaj rua kuv! Kuv tub muab cov Filitees ib puas dlaim tawv noov them nwg nqe tshoob yuav nwg ua kuv tug quaspuj lawm.”

¹⁵Yog le ntawd, Isenpauses txhaj moog coj Mikhas ntawm nwg tug quasyawg Patiyees kws yog Laises tug tub lug.

¹⁶Patiyees quaj lawv nwg qaab tuaj txug huv lub nroog Npahulees. Tabsis thaus Aneles has tas, “Koj ca le rov qaab moog tsev!” Nwg txhaj rov qaab moog tsev lawm.

¹⁷Aneles moog cuag cov Yixalayees cov thawjcoj hab has rua puab tas, “Mej yeej xaav tau Daviv ua mej tug vaajntxwv lug ntev lawm.

¹⁸Nwgnuav yog sijhawm rua mej lawm lauj. Mej yuavtsum ncu ntsoov qhov kws tug TSWV tub tau has lawm tas, ‘Kuv yuav siv kuv tug tubkhai Daviv lug paab kuv tsaav tuabneeg Yixalayees kuas dlim ntawm cov Filitees hab ntawm puab cov yeebncuab.’ ”

¹⁹Aneles has ib yaam le ntawd rua xeem Npeenyamees, hab nwg tuaj cuag Daviv huv lub nroog Henploos, nwg pav tej kws xeem Npeenyamees hab cov Yixalayees txaus sab coglug ntawd rua Daviv noog.

²⁰Thaus Aneles tuaj, nwg coj tau neeg nkaum leej txivneej tuaj cuag Daviv huv lub nroog Henploos, Daviv ua ib rooj mov rua puab noj.

²¹Aneles has rua Daviv has tas, “Kuv yuav rov moog taamsim nuav hab coj taagnrho cov Yixalayees lug cuag kuv tug vaajntxwv. Puab yuav zoo sab txais koj ua puab tug vaajntxwv, hab koj yuav tau txais tej kws koj xaav tau hab yuav tau kaav taagnrho lub tebchaws nuav.” Daviv txhaj tso Aneles rov qaab moog tsev.

²²Tom qaab kws Yau-am hab Daviv cov numtswv moog fuab luas tej khoom rov lug, puab nqaa tau tej khoom ntau heev nrug puab lug. Thaus ntawd, Aneles tsi nrug Daviv nyob huv nroog Henploos lawm, rua qhov Daviv tso nwg rov qaab moog tsev kaaj sab lug lawm.

²³Thaus Yau-am hab nwg cov tuabneeg lug txug tsev, muaj tuabneeg moog qha rua Yau-am has tas, Aneles tuaj cuag Vaajntxwv Daviv hab Daviv tso Aneles rov qaab moog tsev kaaj sab lug lawm.

²⁴Yog le ntawd, Yau-am txhaj moog cuag Vaajntxwv hab has rua nwg tas, “Koj ua dlaabtsi le nuav? Aneles tuaj cuag koj, vim le caag koj tseem tso nwg rov qaab moog tsev le ntawd hab?

²⁵Nwg tuaj ntawm nuav yog tuaj dlaag koj hab tuaj saib txhua yaam kws koj ua hab txhua txujkev kws koj moog xwb. Tsimnyog koj paub txug zaaj nuav!”

²⁶Tom qaab kws Yau-am ncaim Daviv lawm, nwg txhaj tso tuabneeg moog nrhav Aneles hab puab moog coj tau Aneles ntawm lub Qhovdlej Xilas lug; tabsis Daviv tsi paub txug zaaj nuav hlo le.

²⁷Thaus Aneles lug txug rua huv lub nroog Henploos, Yau-am txhaj nqug kag Aneles moog rua ntawm roojvaag ib saab, Aneles xaav has tas ntshai yog Yau-am yuav nrug nwg thaam tuabywv, tabsis Yau-am txawm rhu rag nkaug kag Aneles plaab. Qhov kws Aneles raug tua tuag tub yog vim nwg tua Yau-am tug kwv Axahees lawm.

²⁸Thaus Daviv nov xuv le ntawd, nwg txhaj has tas, “Tug TSWV yeej paub kuv hab kuv cov pejxeem tsi raug lub txim kws tua Aneles ntawd.

²⁹Thov kuas lub txim ntawd poob rua sau Yau-am hab nwg tsev tuabneeg xwb! Thov kuas Yau-am caajceg txhua tam muaj ib tug raug tej kaab mob ua paug lossis kaab mob ruas, lossis qaug zug zig, tsuas ua tau num quaspuj lossis raug tua tuag rua huv tshaav rog lossis tsi muaj noj txaus.”

³⁰Qhov kws Yau-am hab nwg tug kwv Anpisais tuavhuv tua Aneles, vim Aneles tua obtug tug kwv Axahees thaus sis tua huv tshaav rog ntawm Nkinpe-oos.

³¹Ces Daviv has kuas Yau-am hab nwg cov tuabneeg dlua puab tej rig tsho povtseg, muab tej rig tsho ntaub tsaaj lug naav hab paam Aneles. Thaus tawm huv lub tsev paam tuag moog, Vaajntxwv Daviv txhaj lawv lub hleb qaab.

³²Muab Aneles log rua huv lub nroog Henploos, Vaajntxwv tsaa hlo suab quaj nrov heev ntawm qhov ntxaa hab taagnrho cov pejxeem suavdlawg puavleej quaj ib yaam nkaus.

³³Daviv hu ib zaaj nkauj quaj ntsuag rua Aneles le nuav: “Vim le caag Aneles raug tua tuag zoo le tej tuabneeg ruag?

³⁴Nwg ob txhais teg tub tsi raug luas khi nwg ob txhais taw tsi raug luas xauv; nwg tuag ib yaam le tej tuabneeg muaj txim kws tua tuabneeg tuag ntaag!” Hab cov pejxeem suavdlawg rov quaj nyav Aneles dlua ib zag ntxiv.

³⁵Cov pejxeem txhaj tuaj nplig Daviv sab ib nub kuas nwg ca le noj mov, tabsis nwg tau coglug has tas, “Thov Vaajtswv muab kuv tua kuas kuv tuag, yog kuv tseem noj ib yaam dlaabtsi ua ntej lub nub poob qho.”

³⁶Puab pum has tas zaaj nuav zoo hab txaus sab. Txhua yaam kws vaajntxwv ua puavleej txaus cov pejxeem sab kawg le.

³⁷Taagnrho Daviv cov pejxeem hab cov pejxeem Yixalayees puavleej paub has tas, vaajntxwv tsi nrug koom teg tua Aneles.

³⁸Vaajntxwv txhaj has rua nwg cov numtswv tas, “Mej puas paub has tas, nub nua cov Yixalayees tug thawjcoj kws tseemceeb heev raug tua tuag lawm?

³⁹Txawm yog Vaajtswv tub xaiv kuv lug ua vaajntxwv ntaag los nub nua kuv yeej qaug zug kawg le. Xeluyas cov tub nuav ua nruj ua tsiv rua kuv kawg le. Mas thov tug TSWV rau txim rua cov tuabneeg nuav lawv le tej kev phem kws puab tau ua ntawd!”