Read Hmong Njua 2 Xamuyees 4 Bible Online

2 Xamuyees 4 - Hmong Njua bible

2 Xamuyees 4

¹Thaus Xa-ules tug tub Isenpauses nov has tas, Aneles raug tua tuag rua huv lub nroog Henploos lawm, nwg ntshai heev hab cov pejxeem Yixalayees ntxhuv sab kawg le.

²Isenpauses muaj ob tug numtswv, obtug yog ob tug thawjcoj ntawm paab kws pheej moog fuab luas tej khoom, Npa-anas hab Lekhas yog Limoos ob tug tub. Obtug yog xeem Npeenyamees kws nyob huv lub nroog Npelaus. (Lub nroog Npelaus yeej muab tu ua xeem Npeenyamees tug lawm.

³Cov tuabneeg kws ibtxwm nyob huv lub nroog ntawd txhaj tsiv moog rua huv lub nroog Nkita-ees hab nyob qhov ntawd lug txug naj nub nua le.)

⁴Xa-ules tug xeebntxwv kws yog Yaunathaas tug tub Mefinpauses noobnyoog muaj tsib xyoos nkaus rua thaus Xa-ules hab Yaunathaas raug tua tuag. Ces thaus kws nov xuv peg lub nroog Yexelees tuaj has tas, Xa-ules hab Yaunathaas raug tua tuag lawm. Tug quaspuj kws tu nwg txhaj puag hlo nwg tsiv tawm moog; tabsis tug quaspuj ntawd maaj heev, txhaj nplaam teg ua nwg poob, ces nwg txhaj saav ceg lawm.

⁵Lekhas hab Npa-anas, tuavhuv moog tom Isenpauses tsev hab moog kuas txug tod thaus nub ntseg kws nwg taabtom moog pw tsaug zug.

⁶Thaus ntawd tug quaspuj kws tsoov nplej ntawm qhovrooj txawm tsaug zug lawm hab, ces Lekhas hab Npa-anas obtug txawm nkaag moog rua huv tsev.

⁷Thaus obtug moog rua huv tsev, obtug txawm moog rua huv Isenpauses lub txaaj. Nwg taabtom pw tsaug zug. Ces obtug ca le muab nwg tua tuag kag lawm. Obtug txav nwg lub taubhau nqaa lug, hab maub ib mos lug txug rua huv lub haav Yauladees.

⁸Obtug nqaa nwg lub taubhau lug qha rua Daviv huv lub nroog Henploos hab has rua Daviv has tas, “Ntawm nuav yog koj tug yeebncuab Xa-ules tug tub Isenpauses kws naj nub nrhav koj tua povtseg lub taubhau. Nub nua tug TSWV pub rua vaajntxwv kws yog kuv tug tswv ua pauj Xa-ules hab nwg cov xeebntxwv lawm.”

⁹Daviv teb obtug has tas, “Kuv thov coglug rua tug TSWV kws muaj sa nyob, tug kws cawm kuv dlim ntawm tej xwmtxheej phem!

¹⁰Tug tuabneeg kws lug cuag kuv huv lub nroog Xikelas hab qha kuv txug qhov Xa-ules tuag, nwg xaav has tas yog nwg coj xuv zoo lug qha kuv. Kuv tub nteg nwg hab muab nwg tua povtseg lawm. Qhov ntawd yog nqe zug kws kuv muab rua nwg, qhov kws nwg coj xuv lug qha rua kuv ntawd ntaag!

¹¹Yeej tsimnyog rau txim nyaav tshaaj ntawd rua cov tuabneeg sab phem kws moog tua tug tuabneeg tsi muaj txim dlaabtsi thaus nwg pw tsaug zug huv nwg lub tsev? Nwgnuav kuv yuav tua meb pauj qhov kws meb tua nwg hab yuav muab meb caajceg tua kuas tu noob nrho huv nplajteb nuav moog!”

¹²Daviv txhaj has kuas nwg cov tubrog muab Lekhas hab Npa-anas obtug tua hab muab obtug teg taw txav huv tuabsi povtseg. Puab coj obtug moog dlai ze rua ntawm lub paag dlej huv lub nroog Henploos, hab puab coj Isenpauses lub taubhau moog log rua ntawm Aneles lub qhov ntxaa huv lub nroog Henploos.