Read Hmong Njua 2 Xamuyees 5 Bible Online

2 Xamuyees 5 - Hmong Njua bible

2 Xamuyees 5

¹Txhua xeem Yixalayees tuaj cuag Daviv huv lub nroog Henploos hab has rua nwg tas, “Peb suavdlawg puavleej yog koj roj ntshaa hab nqaj tawv,

²yaav taag lug, txawm yog Xa-ules yog peb tug vaajntxwv los koj yeej yog tug kws coj cov Yixalayees moog ntaus rog xwb, hab tug TSWV yeej coglug rua koj, kuas koj yuavtsum ua tug coj nwg tsaav tuabneeg hab ua tug kaav puab.”

³Yog le ntawd, cov Yixalayees cov thawjcoj tuaj cuag Vaajntxwv Daviv huv lub nroog Henploos. Daviv coglug rua puab, puab muab roj laub rua Daviv taubhau tsaa nwg ua vaajntxwv kaav tebchaws Yixalayees.

⁴Thaus Daviv ua vaajntxwv, nwg noobnyoog muaj peb caug xyoo, hab nwg kaav tau plaub caug xyoo.

⁵Nwg kaav cov Yudas nyob huv lub nroog Henploos tau xyaa xyoo hab rau hli, nwg kaav cov Yixalayees hab cov Yudas nyob huv lub nroog Yeluxalees tau peb caug peb xyoos.

⁶Thaus kws Daviv coj nwg cov tuabneeg moog tua lub nroog Yeluxalees, cov tuabneeg Yenpus kws nyob huv xaav has tas Daviv yuav tsi muaj peevxwm tua yeej lub nroog ntawd ib zag le, yog le ntawd, puab txhaj has rua Daviv has tas, “Koj yuav nkaag lug tsi tau huv nuav; txawm yog cov tuabneeg dligmuag hab saav ceg los yeej muaj cuabkaav lawv koj tawm rov qaab.”

⁷(Tabsis Daviv tub txeeb tau puab lub chaw faajxwm sau Xi-oos hab muab qhov chaw ntawd hu ua “Daviv lub Nroog).”

⁸Nub ntawd Daviv has rua nwg cov tuabneeg has tas, “Mej cov yog leejtwg yuav tua cov Yenpus, nwg ca le nkaag moog rua huv tug kwj dleg hab moog tua cov tuabneeg dligmuag hab saav ceg kws kuv ntxub ntawd povtseg.” (Tub yog vim le nuav txhaj muaj lug sau tseg has tas, “Tsi xob pub cov tuabneeg dligmuag hab saav ceg moog rua huv tug TSWV lub tsev.”)

⁹Tom qaab kws txeeb tau lub chaw faajxwm lawm, Daviv txhaj moog nyob rua huv hab muab qhov chaw ntawd tis npe hu ua, “Daviv lub Nroog.” Nwg tsim lub nroog ncig lub Milaus, pib kag ntawm lub ncov roob saab nubtuaj qhov chaw kws luas tub muab aav txhub lawm.

¹⁰Daviv muaj fwjchim luj heev zuj zug, rua qhov tug TSWV kws yog Vaajtswv tug muaj Fwjchim Luj kawg nkaus nrug nraim nwg.

¹¹Vaajntxwv Hilaas kws kaav lub nroog Tiles khaiv tuabneeg tuaj cuag Daviv. Nwg muab ntoo Cab tuaj pub rua Daviv, hab khaiv cov tuabneeg txua ntoo hab cov tuabneeg txaug pobzeb tuaj ua ib lub loog rua Daviv nyob.

¹²Hab Daviv paub has tas, tug TSWV tsaa nwg ua tsaav tuabneeg Yixalayees tug vaajntxwv, tsaa nwg lub tebchaws kuas vaammeej hab txhawb nwg tsaav tuabneeg lub neej.

¹³Tom qaab kws Daviv tsiv huv lub nroog Henploos lug nyob huv lub nroog Yeluxalees lawm, nwg yuav ntau tug quaspuj ntxiv, nwg txhaj muaj tub muaj ntxhais coob heev.

¹⁴Cov mivnyuas kws yug huv lub nroog Yeluxalees muaj npe lawv le nuav: Samuas, Saunpas, Nathaas, Xalumoos,

¹⁵Inpehas, Elisuas, Nefes, Yafias,

¹⁶Elisamas, Eli-adas, hab Elifeles.

¹⁷Muaj tuabneeg moog qha rua cov Filitees has tas, Daviv ua vaajntxwv kaav cov Yixalayees lawm. Yog le ntawd, puab cov tubrog txhaj le tuaj puav nteg Daviv. Thaus Daviv nov le ntawd, nwg txhaj le nqeg moog rua huv lub yeej.

¹⁸Cov Filitees tuaj txug huv lub haav Lefa-ees hab tsuam yeej rua huv.

¹⁹Daviv txhaj nug tug TSWV has tas, “Puas tsimnyog kuv moog tua cov Filitees ntawd? Koj puas paab kuv tua kuas yeej puab hab?” Tug TSWV teb has tas, “Koj ca le moog tua puab! Kuv yuav pub kuas koj tua yeej.”

²⁰Yog le ntawd, Daviv txhaj moog rua huv Npa-aas Pelaxees hab nwg tua yeej cov Filitees. Daviv has tas, “Tug TSWV tsoo ua rua kuv cov yeebncuab tawg tsiv ri sua ib yaam le dlej nyaab.” Yog le ntawd, luas txhaj muab qhov chaw ntawd hu ua Npa-aas Pelaxees.

²¹Thaus cov Filitees tawg tsiv taag lawm, puab tso puab tej mlom tseg, ces Daviv hab nwg cov tuabneeg txhaj nqaa cov mlom ntawd lug.

²²Tom qaab ntawd cov Filitees rov qaab tuaj rua huv lub Haav Lefa-ees, hab rov moog tsuam chaw nyob qhov ntawd dlua.

²³Daviv rov nug tug TSWV ib zag ntxiv, tug TSWV teb has tas, “Tsi xob tua puab saab tom nuav moog, tabsis koj ca le tshuv kev moog tuaj saab tom qaab kws ze cov ntoo zaub kaab tua puab.

²⁴Thaus koj nov lub suab tuabneeg moog kev sau cov ntsis ntoo zaub kaab, ces koj ca le nqeg teg tua, rua qhov kuv yuav moog ua koj ntej tua kuas cov tubrog Filitees swb.”

²⁵Daviv ua lawv le tug TSWV has, nwg txhaj muaj peevxwm lawv cov Filitees tsiv tawm huv Nkenpas taug kev rov qaab moog txug ndlua ntawm Nkexes.