Read Hmong Njua 2 Xamuyees 6 Bible Online

2 Xamuyees 6 - Hmong Njua bible

2 Xamuyees 6

¹Daviv hu cov tubrog Yixalayees kws txawj tua rog tshaaj plawg tuaj sis sau ua ke dlua ib zag ntxiv, suav taagnrho muaj peb caug txheeb leej,

²hab Daviv coj puab moog rua ntawm lub nroog Npa-alas huv xeev Yudas, kuas kwv lub Phijxaab kws ntim Vaajtswv tej lug cog tseg kws muaj tug TSWV kws muaj fwjchim luj kawg nkaus lub npe, tug TSWV lub zwmtxwv nyob sau ob tug qhelunpees ob phob tis.

³Puab tsaws lub Phijxaab huv Anpinadas lub tsev kws nyob sau pov roob lug rua sau lub tsheb nyuj tshab. Anpinadas tug tub Uxahas hab Ahi-aus ua ob tug coj kev,

⁴Ahi-aus yog tug kws moog ua ntej.

⁵Daviv hab cov Yixalayees dlha seev cev hu nkauj kawg puab tug zug qhuas tug TSWV. Puab ntaus nkauj nogncaas luj, nkauj nogncaas miv, ntaus nruag, tshuab raaj hab npuaj nruag ua ke.

⁶Thaus kws puab lug txug rua ntawm Nakoos lub tshaav ntaus nplej, tug txiv nyuj dlawm ua rua lub tsheb nyuj qaij hlo, Uxahas txhaj cev loo teg moog tuav nkaus lub Phijxaab.

⁷Taamsim ntawd tug TSWV kws yog Vaajtswv chim heev rua Uxas, nwg txhaj tua Uxahas tuag kag rua ntawm lub phijxaab ib saab, rua qhov Uxahas saib tsi taug lub Phijxaab.

⁸Yog le ntawd, txhaj muab qhov chaw ntawd hu ua Peles Uxahas lug txug naj nub nua. Daviv npautawg, vim tug TSWV chim hab rau txim rua Uxahas.

⁹Daviv ntshai Tug TSWV heev, nwg has tas, “Nwgnuav kuv yuav ua le caag coj tau lub Phijxaab nuav nrug kuv moog?”

¹⁰Yog le ntawd, Daviv txhaj txav txim sab tsi coj lub phijxaab nrug nwg moog rua huv lub nroog Yeluxalees; tabsis nwg coj lub phijxaab ncaim kev moog tso rua huv Aunpes Edoos lub tsev, Aunpes Edoos yeej ibtxwm nyob huv lub nroog Khas.

¹¹Lub Phijxaab nyob huv Aunpes Edoos tsev tau peb hlis, tug TSWV txhaj foom koob moov rua Aunpes Edoos hab nwg tsev tuabneeg.

¹²Vaajntxwv Daviv nov has tas, tub yog vim lub Phijxaab tug TSWV txhaj foom koob moov rua Aunpes Edoos tsev tuabneeg hab txhua yaam kws nwg muaj; yog le ntawd, Daviv txhaj tuaj kwv lub Phijxaab huv Aunpes Edoos tsev moog tso rua huv lub nroog Yeluxalees hab muaj kev zoo sab kawg le.

¹³Thaus cov txivneej kws kwv lub Phijxaab moog rau kaujruam lawm, Daviv kuas puab nreg tog nwg muab ib tug txiv nyuj hab ib tug mivnyuas nyuj rog rog tua fij rua tug TSWV tsaiv.

¹⁴Daviv sa ib dlaim thaav ntxwv ntaub maag ntawm nwg lub dluav, Daviv dlha seev cev kawg nkaus nwg tug zug qhuas tug TSWV.

¹⁵Daviv hab cov pejxeem Yixalayees kwv lub Phijxaab lug tso rua huv lub nroog Yeluxalees, puab zoo sab qw ntshu nrooj hab tshuab raaj tshuab xyu nrov dloog dlaj lug.

¹⁶Thaus puab taabtom kwv lub Phijxaab lug rua huv nroog, Mikhas kws yog Xa-ules tug ntxhais saib ntawm qhovrais moog pum Daviv seev cev hab dlha ncig cov seev cev ntawd, nwg txawm ntxub Daviv tuabywv rua nruab sab.

¹⁷Puab kwv lub Phijxaab lug tso rua huv lub tsevntaub kws Daviv npaaj tseg rua lub Phijxaab ntawd. Ces Daviv muab tsaj tua hlawv fij rua tug TSWV ua kev sis raug zoo.

¹⁸Thaus Daviv muab tsaj tua hlawv fij rua tug TSWV taag lawm, nwg txhaj tuav tug TSWV kws muaj Fwjchim Luj kawg nkaus lub npe foom koob moov rua cov pejxeem,

¹⁹hab muab zaub mov faib rua puab txhua tug. Daviv muab zaub mov faib rua cov Yixalayees txhua tug quaspuj hab txivneej, ib leeg ib lub ncuav, ib dlaim nqaj, hab mivntsiv txiv maab qhuav. Ces puab nyag txawm rov moog nyag tsev lawm.

²⁰Tom qaab ntawd, thaus Daviv rov lug tsev, nwg yuav lug foom koob moov rua nwg tsev tuabneeg, Mikhas txawm tawm tuaj tog Daviv. Mikhas has tas, “Nub nua cov Yixalayees tug vaajntxwv ua rua nwg tau ntsejmuag luj kawg le! Nwg ua tug nam vwm ntsuav labqaab taabmeeg nwg cov numtswv tej ntxhais qhev!”

²¹Daviv teb has tas, “Kuv seev cev qhuas tug TSWV tug kws xaiv kuv hab tsaa kuv ua tug thawjcoj nwg tsaav tuabneeg Yixalayees hloov koj txiv hab nwg cov xeebntxwv chaw. Kuv tseem yuav seev cev qhuas tug TSWV,

²²hab kuv yuav ua kuas kuv poob ntsejmuag tshaaj nuav ntxiv, kuv yuav txu fwjchim kawg nkaus le. Txawm yog koj saib kuv tsi muaj nqes dlaabtsi los cov ntxhais qhev ntawd yuav muab kuv saib muaj nqes heev.”

²³Mikhas kws yog Xa-ules tug ntxhais, yeej ibtxwm tsi muaj mivnyuas.