Read Hmong Njua 2 Xamuyees 7 Bible Online

2 Xamuyees 7 - Hmong Njua bible

2 Xamuyees 7

¹Vaajntxwv Daviv nyob ruaj khov huv nwg lub loog hab tug TSWV tsomkwm tsi pub yeebncuab ua phem rua nwg.

²Vaajntxwv has rua Nathaas kws yog tug cev Vaajtswv lug has tas, “Koj saib, kuv nyob huv lub tsev kws muab ntoo cab ua, tabsis Vaajtswv lub Phijxaab nyob huv lub tsevntaub xwb.”

³Nathaas teb has tas, “Koj yuav ua dlaabtsi, koj ca le ua, rua qhov tug TSWV nrug nraim koj.”

⁴Tabsis mo ntawd tug TSWV has rua Nathaas has tas,

⁵“Koj ca le coj kuv tej lug nuav moog has rua kuv tug tubkhai Daviv has tas, ‘Koj tsi yog tug yuav ua lub Tuamtsev rua kuv.

⁶Txij thaus kuv tso cov Yixalayees tawm nraag tebchaws Iziv lug txug naj nub nua, kuv yeej tsi nyob huv lub Tuamtsev; kuv nyob huv lub Tsevntaub kws muab kwv tshais chaw taag moog le xwb.

⁷Thaus kuv nrug cov Yixalayees taug kev ntawd, kuv yeej tsi tau nug cov thawjcoj kws kuv tsaa ntawd has tas, vim le caag mej tsi muab ntoo cab lug ua lub Tuamtsev rua kuv?’

⁸“Koj ca le moog has qha rua kuv tug tubkhai Daviv has tas, tug TSWV kws muaj Fwjchim luj kawg nkaus has rua nwg tas, ‘Koj yeej yog tug yug yaaj kws nyob tom tej taj nraag xwb. Kuv coj koj lug hab tsaa koj ua tug kaav kuv tsaav tuabneeg Yixalayees.

⁹Txhua qhov kws koj moog, kuv yeej nrug nraim koj, hab kuv tub ua rua koj tej yeebncuab swb koj taag lawm. Kuv yuav tsaa koj ua ib tug thawjcoj kws muaj meejmom tshaaj plawg nyob huv lub nplajteb nuav.

¹⁰Kuv xaiv ib thaaj chaw rua kuv tsaav tuabneeg Yixalayees nyob, kuas puab txhaj muaj ib thaaj chaw nyob ua puab tug, txhaj yuav tsi muaj leejtwg tuaj tsimtxom puab; cov tuabneeg sab phem txhaj yuav tsi tsimtxom puab ntxiv le thaus u lawm,

¹¹txij thaus puab lug nyob huv lub tebchaws nuav, kuv tsaa cov thawjcoj lug kaav kuv tsaav tuabneeg Yixalayees, kuv yuav paab kuas koj dlim ntawm koj cov yeebncuab, hab kuv yuav pub kuas koj muaj xeebntxwv fuamvaam coob heev.

¹²Thaus koj tuag, luas yuav coj koj moog log nrug koj cov yawmkoob, kuv yuav tsaa koj cov tub ib tug lug ua vaajntxwv hloov koj hab nwg yuav tuav lub tebchaws nyob ruaj khov.

¹³Nwg yuav ua lub Tuamtsev rua kuv, hab kuv yuav pub nwg caajceg tau ua vaajntxwv moog ibtxhis le.

¹⁴Kuv yuav ua nwg txiv hab nwg yuav ua kuv tug tub. Thaus nwg ua txhum, kuv yuav rau txim rua nwg ib yaam le leej txiv rau txim rua nwg tug tub.

¹⁵Tabsis kuv yuav tsi tshem kuv txujkev paab tawm ntawm nwg ib yaam le kuv tshem tawm ntawm Xa-ules tug kws kuv muab txu kuas koj tau ua vaajntxwv.

¹⁶Koj yuav muaj xeebntxwv fuamvaam coob hab kuv yuav pub koj lub tebchaws nyob ruaj khov moog ibtxhis. Koj tug nom yuav tsi poob moog ib simneej le.’ ”

¹⁷Nathaas qha txhua yaam nuav rua Daviv lawv le Vaajtswv has rua Nathaas lawm.

¹⁸Vaajntxwv Daviv moog rua huv tug TSWV lub tsevntaub sis ntsib, hab nyob tsawg thov Vaajtswv has tas, “Tug TSWV kws kaav txhua tsaav yaam, kuv hab kuv tsev tuabneeg tub tsi tsimnyog tau tej kws koj ua rua kuv le.

¹⁹Txawm yog kuv tau tej ntawd los tug TSWV kws kaav ib puas tsaav yaam, koj tseem pub kuv ntau tshaaj tej ntawd hab; koj tau coglug tseg has tas, koj yuav pub kuv cov xeebntxwv ua vaajntxwv moog lawm yaav tom ntej. Tug TSWV kws kaav ib puas tsaav yaam, koj tseem ca ib tug tuabneeg pum tej nuav hab.

²⁰Kuv tsi paub yuav has le caag rua koj ntxiv lawm! Koj yeej paub has tas kuv yog koj tug tubkhai.

²¹Txhua yaam tseemceeb kws koj tau qha rua kuv taag lug nuav, tub yog koj ua lawv le koj pum zoo hab koj npaaj tseg lawm.

²²Tug TSWV kws kaav ib puas tsaav yaam, koj yog tug kws muaj fwjchim luj kawg nkaus! Yeej tsi muaj leejtwg yuav zoo npaum le koj. Peb tsuas paub koj tuab leeg txhaj yog Vaajtswv xwb.

²³Tsi muaj ib tsaav tuabneeg nyob huv lub nplajteb nuav yuav zoo le tsaav tuabneeg Yixalayees kws koj tau cawm dlim ntawm txujkev ua luas qhev lug ua koj tsaav tuabneeg. Tej txujci luj hab tseemceeb kws koj ua paab puab, tau ua rua koj lub koob meej nrov nchaa moo lug thoob plawg lub nplajteb nuav. Koj lawv txhua tsaav tuabneeg tawm hab tshem puab tej mlom ua ntu zug moog ua koj tsaav tuabneeg ntej, cov tuabneeg kws koj coj nraag tebchaws Iziv lug yeej yog koj tug.

²⁴Tug TSWV, koj yeej xaiv tsaav tuabneeg Yixalayees ua koj tug moog ibtxhis, hab koj yeej yog puab tug TSWV.

²⁵“Tug TSWV kws yog Vaajtswv, nwgnuav thov koj ca le ua kuas tav lawv le koj tau coglug tseg rua kuv hab kuv cov xeebntxwv, hab ca le ua lawv le koj has tas koj yuav ua ntawd ntaag.

²⁶Koj lub koob meej txhaj yuav nrov nchaa moo lug moog ibtxhis hab tej tuabneeg suavdlawg yuav has tas, ‘Tug TSWV kws muaj fwjchim luj kawg nkaus yog tug Vaajtswv kws kaav tsaav tuabneeg Yixalayees.’ Hab koj yuav tsaa kuv caajceg ua vaajntxwv moog ibtxhis le.

²⁷Tug TSWV kws muaj fwjchim luj kawg nkaus yog tsaav tuabneeg Yixalayees tug Vaajtswv! Kuv muaj cuabkaav tsaa ncauj thov koj le nuav, rua qhov koj tau qha txhua yaam rua kuv kws yog koj tug tubkhai, hab koj tau has rua kuv tas, koj yuav tsaa kuv cov xeebntxwv ua vaajntxwv.

²⁸“Tug TSWV kws kaav ib puas tsaav yaam, koj yog Vaajtswv tag, koj yeej ibtxwm ua lawv le koj tej lug cog tseg, hab koj tau coglug zoo kawg nkaus rua kuv.

²⁹Kuv thov koj foom koob moov rua kuv cov xeebntxwv kuas puab muab sab npuab koj. Koj yog tug TSWV kws kaav txhua tsaav yaam, koj tau coglug le nuav, mas kuv cov xeebntxwv yuav tau koj tej koob moov moog ibtxhis.”