Read Hmong Njua 2 Xamuyees 8 Bible Online

2 Xamuyees 8 - Hmong Njua bible

2 Xamuyees 8

¹Tom qaab nuav, muaj ib nub Daviv moog tua cov Filitees dlua ib zag, nwg tua yeej cov Filitees hab txeeb tau lub nroog Methe-amas ntawm cov Filitees lug.

²Daviv tua yeej hlo lub tebchaws Mau-am. Nwg muab cov tuabneeg kws nwg nteg tau pw rua huv aav, hab peb leeg twg, nwg coj ob leeg moog tua povtseg, tseg ib tug ca xwb. Yog le ntawd, cov tuabneeg Mau-am txhaj tau ua nwg qhev hab them se rua nwg.

³Daviv moog tua yeej cov Xaunpas tug Vaajntxwv Hadadexes kws yog Lehaus tug tub, thaus kws Hadadexes taabtom taug kev rov tuaj tsuam yeej rua huv cheebtsaam ntawm tug Dlej Efalates saab peg.

⁴Daviv nteg tau Hadadexes cov tubrog caij neeg ib txheeb xyaa pua leej hab neeg nkaum txheeb leej tubrog moog kutaw. Daviv tseg ib puas tug neeg kuas txaus nkaus hai cov tsheb neeg xwb, dlua le cov seem nwg muab txu leeg rawg huv tuabsi.

⁵Thaus cov Xilias kws nyob huv lub nroog Damaxes tso tubrog moog paab Vaajntxwv Hadadexes, Daviv tua cov tubrog Xilias tuag lawm neeg nkaum ob txheeb leej.

⁶Mas Daviv txhaj tsuam ntau lub yeej tubrog rua huv puab cheebtsaam aav hab puab tau ua Daviv qhev hab them se rua nwg. Tug TSWV ua rua Daviv tua yeej txhua qhov chaw.

⁷Daviv txeeb tau Hadadexes cov numtswv tej thaiv nav ntaaj nqaa huv tuabsi lug ca rua huv lub nroog Yeluxalees.

⁸Daviv tseem muab tau tej tooj dlaag kws zoo heev huv lub nroog Npetas hab Npelauthais kws Hadadexes kaav nqaa huv tuabsi lug lawm hab.

⁹Vaajntxwv Tau-is kws kaav lub nroog Hamas nov has tas, Daviv tua yeej Hadadexes cov tubrog lawm,

¹⁰yog le ntawd, Tau-is txhaj tso nwg tug tub Yaulaas tuaj cuag Vaajntxwv Daviv hab qhuas qhov kws nwg tua yeej Hadadexes tug kws tau ua rog tawmtsaam Tau-is ntau zag lug lawm. Yaulaas coj kub, nyaj hab tooj tuaj pub rua Daviv.

¹¹Vaajntxwv Daviv muab tej ntawd fij rua tug TSWV, kuas tau siv huv lub Tuamtsev, nrug tej nyaj tej kub kws nwg txeeb tau ntawm tej lub tebchaws kws nwg tua yeej:

¹²Edoos, Mau-am, Amoos, Filitees, Amalej hab tej kws nwg fuab ntawm cov Xaunpas tug Vaajntxwv Hadadexes kws yog Lehaus tug tub lug.

¹³Daviv lub koob meej nrov nchaa moo lug txij thaus kws nwg moog tua cov Edoos tuag kaum yim txheeb leej huv lub Haav Ntsev lug.

¹⁴Nwg tsuam ntau lub yeej tubrog nyob thoob plawg huv lub tebchaws Edoos hab cov Edoos tau lug ua Daviv qhev. Tug TSWV pub Daviv tua yeej txhua qhov chaw.

¹⁵Daviv kaav taagnrho tsaav tuabneeg Yixalayees hab ua rua nwg tsaav tuabneeg muaj kev sis humxeeb hab muaj kev ncaaj nceeg.

¹⁶Xeluyas tug tub Yau-am yog tug thawj tubrog; Yehausafas kws yog Ahilus tug tub, ua tug tuav tej ntaub ntawv.

¹⁷Xadaus tug tub Ahitus hab Anpiyathas tug tub Ahimelej ua ob tug povthawj; Xelayas ua tug teev ntawv.

¹⁸Yehauyadas tug tub Npenayas, ua tug saib cov tubrog kws zuv Daviv; hab Daviv cov tub ua cov numtswv luj.