Read Hmong Njua 1 Vaajntxwv 1 Bible Online

1 Vaajntxwv 1 - Hmong Njua bible

1 Vaajntxwv 1

¹Thaus Vaajntxwv Daviv laug heev lawm, txawm yog muab choj rua nwg vuv tuab npaum le caag los yeej tsi suv nwg le.

²Yog le ntawd, Daviv cov numtswv txhaj has rua Daviv has tas, “Vaajntxwv, thov koj tso lug rua peb moog nrhav ib tug ntxhais nkaujxwb lug nrug koj nyob tu koj, hab pw huv koj xubndlag kuas suv koj.”

³Puab txhaj moog saib tej hluas nkauj kws zoo nkauj tshaaj plawg huv tebchaws Yixalayees, puab pum ib tug hluas nkauj nyob huv Sunees. Nwg npe hu ua Anpisas hab yog ib tug ntxhais kws zoo nkauj heev, puab txawm coj nwg lug rua vaajntxwv.

⁴Txawm yog Anpisas zoo nkauj heev hab nwg zuv rawv tu vaajntxwv xwb los vaajntxwv yeej tsi nrug nwg pw ua nam txiv le lawm.

⁵Thaus Axaloos tuag lawm, Daviv cov tub kws tseem ua neej nyob, Adauniyas yog tug hlub. Nwg nam yog Hankis. Adauniyas yog ib tug kws zoo raug heev, Daviv yeej tsi tau tshev nwg ib lus lossis nug nwg has tas, “Vim le caag koj ua le ko?” Adauniyas xaav ua vaajntxwv. Nwg npaaj tau ib cov tsheb neeg, ib cov neeg hab tsib caug leej txivneej nrug nwg ua ke.

⁶

⁷Nwg moog saablaaj rua Yau-am, (tug kws nwg nam hu ua Xeluyas), hab saablaaj rua Anpiyathas kws yog tug povthawj, mas obtug pum zoo paab nwg.

⁸Tabsis tug povthawj Xadaus, Npenayas kws yog Yehauyadas tug tub, Nathaas kws yog tug cev Vaajtswv lug, Sime-is, Le-is hab cov tubrog kws zuv Daviv, tsi kaam tuaj Adauniyas tog.

⁹Muaj ib nub Adauniyas moog tua yaaj, tua nyuj hab tua tej mivnyuas nyuj kws rog rog fij rua sau lub pobzeb naab, ze rua ntawm lub qhovdlej Elaunkees. Nwg caw Vaajntxwv Daviv cov tub ibtxha hab vaajntxwv cov numtswv kws nyob huv lub xeev Yudas tuaj nrug nwg koom rooj mov ntawd,

¹⁰tabsis nwg tsi caw nwg tug kwv nraab Xalumoos lossis Nathaas kws yog tug cev Vaajtswv lug, lossis Npenayas lossis cov tubrog kws zuv vaajntxwv ib tug le.

¹¹Nathaas moog cuag Npasenpas kws yog Xalumoos nam hab nug has tas, “Koj tsi nov has tas Hankis tug tub Adauniyas, nwg tub tsaa nwg ua vaajntxwv lawm los? Hab Vaajntxwv Daviv yeej tsi paub dlaabtsi txug zaaj nuav le.

¹²Yog koj xaav tseg koj hab koj tug tub Xalumoos txujsa, mas kuv yuav paab koj tuav tswvyim,

¹³koj ca le moog cuag Vaajntxwv Daviv taamsim nuav hab nug nwg has tas, ‘Vaajntxwv, koj tub yog tug coglug tseg ruaj khov rua kuv lawm has tas, koj yuav ca kuv tug tub Xalumoos ua vaajntxwv hloov koj chaw nua ne? Yog le caag nwgnuav Adauniyas tub ua vaajntxwv lawm?’ ”

¹⁴Nathaas has ntxiv tas, “Ces thaus koj tseem taabtom nrug Vaajntxwv Daviv sis thaam, kuv yuav lawv koj qaab tuaj hab paab ua timkhawv rua koj txug zaaj nuav.”

¹⁵Yog le ntawd, Npasenpas txhaj moog cuag vaajntxwv rua huv nwg lub txaaj. Vaajntxwv laug heev lawm, mas Anpisas kws yog tug hluas nkauj nyob huv Sunees tuaj, nyob rawv huv tu vaajntxwv.

¹⁶Npasenpas moog txhus caug ndlua nyo hau ntshis hawm vaajntxwv, vaajntxwv nug has tas, “Koj xaav tau dlaabtsi?”

¹⁷Npasenpas teb has tas, “Vaajntxwv, koj tub tuav tug TSWV kws yog koj tug Vaajtswv lub npe coglug ruaj khov tseg rua kuv lawm has tas, koj yuav ca kuv tug tub Xalumoos ua vaajntxwv hloov koj chaw tom qaab koj.

¹⁸Tabsis nwgnuav Adauniyas tub sawv ua vaajntxwv lawm, hab koj tub tsi paub txug zaaj nuav hlo le.

¹⁹Nwg muab ntau tug nyuj, ntau tug yaaj hab tej mivnyuas nyuj kws rog rog tua hlawv ua khoom fij hab nwg caw koj cov tub ibtxha, tug povthawj Anpiyathas hab Yau-am kws yog koj tug thawj tubrog moog koom nwg rooj mov ntawd, tabsis nwg tsi caw koj tug tub Xalumoos le.

²⁰Vaajntxwv, taagnrho tsoom pejxeem Yixalayees puavleej tog ntsoov koj, saib koj yuav qha puab has tas, koj tsaa leejtwg lug ua vaajntxwv hloov koj chaw.

²¹Yog koj tsi mob sab rua zaaj nuav, ntshai thaus dlua koj lawm, luas yuav ntxeev sab ua phem rua kuv tug tub Xalumoos hab kuv.”

²²Thaus Npasenpas tseem taabtom has tej lug nuav, Nathaas txawm tuaj txug ndlua huv loog.

²³Ces muaj tuabneeg moog has rua vaajntxwv has tas, Nathaas kws yog tug cev Vaajtswv lug tuaj cuag koj, Nathaas txawm moog rua huv hab txhus caug ndlua ntawm vaajntxwv xubndlag.

²⁴Ces Nathaas has tas, “Vaajntxwv, koj puas tau has kuas tsaa Adauniyas ua vaajntxwv hloov koj?

²⁵Nub nua nwg tub moog muab ntau tug nyuj, ntau tug yaaj hab tej mivnyuas nyuj kws rog rog tua hlawv ua khoom fij. Nwg caw taagnrho koj cov tub, Yau-am kws yog koj tug thawj tubrog hab tug povthawj Anpiyathas, taamsim nuav puab taabtom nrug nwg noj haus hab qw ntshu nrooj has tas, ‘Thov kuas vaajntxwv Adauniyas muaj sa nyob txhab naj moog pua xyoo!’

²⁶Tabsis nwg tsi caw kuv lossis tug povthawj Xadaus lossis Npenayas lossis Xalumoos le.

²⁷Vaajntxwv, koj tub tso cai rua puab ua tej nuav, ua caag koj tsi qha rua koj tej numtswv paub has tas, tug twg yog tug lug ua vaajntxwv hloov koj chaw?”

²⁸Vaajntxwv Daviv teb has tas, “ca le moog hu Npasenpas rov lug huv nuav.”

²⁹Vaajntxwv has rua Npasenpas tas, “Kuv coglug rua koj ntawm tug TSWV kws muaj sa nyob hab yog tug kws cawm kuv dlim ntawm kuv tej kev txomnyem,

³⁰nub nua kuv yuav tsaa koj tug tub Xalumoos ua vaajntxwv hloov kuv chaw lawv le tej lug kws kuv tuav tug TSWV kws yog cov Yixalayees tug Vaajtswv lub npe coglug tseg rua koj lawm.”

³¹Npasenpas nyo hau ntshis hawm hab has tas, “Thov kuas vaajntxwv kws yog kuv tug tswv muaj sa nyob moog ibtxhis tsi kawg lauj!”

³²Vaajntxwv Daviv tso tuabneeg moog hu Xadaus, Nathaas hab Npenayas kuas tuaj cuag nwg. Thaus puab tuaj txug huv lub loog lawm,

³³Vaajntxwv has rua puab tas, “Mej coj kuv cov numtswv kws saib kuv tej num nrug mej moog, hab muab kuv tug neeg luav rua kuv tug tub Xalumoos caij, hab coj nwg nqeg moog lawm nraag lub qhovdlej Nkihoos,

³⁴kuas Xadaus hab Nathaas obtug muab roj laub rua sau nwg taubhau tsaa nwg ua cov Yixalayees tug vaajntxwv. Mej ca le tshuab raaj tshuab xyu hab qw has tas, ‘Thov kuas Vaajntxwv Xalumoos muaj sa nyob txhab naj moog pua xyoo!’

³⁵Hab mej ca le nrug nwg lug, nwg yuav lug nyob sau kuv lub zwmtxwv hloov kuv chaw. Kuv yuav tsaa nwg ua tug kaav taagnrho cov Yixalayees hab cov Yudas.”

³⁶Npenayas teb has tas, “Kuv yuav ua kuas tav lawv le koj has ko. Amees! Thov tug TSWV kws yog koj tug Vaajtswv paab kuas muaj lawv le ntawd.

³⁷Tug TSWV nrug nraim vaajntxwv nyob le caag, thov kuas nwg nrug nraim Xalumoos nyob ib yaam le ntawd, hab thov kuas nwg kev tswjfwm tseem vaammeej tshaaj ntu kws koj tswjfwm.”

³⁸Yog le ntawd, Xadaus, Nathaas, Npenayas hab cov tubrog kws zuv vaajntxwv txhaj le muab Xalumoos tsaws caij Vaajntxwv Daviv tug neeg luav hab coj nwg nqeg moog rua nraag lub Qhovdlej Nkihoos.

³⁹Tug cevlug Xadaus muab fwj roj txiv ntoo kws nwg nqaa huv tug TSWV lub Tsevntaub lug laub rua sau Xalumoos taubhau. Ces puab txawm tshuab raaj tshuab xyu hab taagnrho cov pejxeem suavdlawg qw ntshu nrooj has tas, “Thov kuas Vaajntxwv Xalumoos muaj sa nyob txhab naj moog pua xyoo lauj!”

⁴⁰Ces puab suavdlawg lawv Xalumoos qaab lug, qw lomzem zoo sab hab tshuab raaj tshuab xyu nrov dloog dlaj ua aav tseeg nkawg lug tsev.

⁴¹Thaus Adauniyas hab nwg cov qhua kws tseem taabtom noj mov, puab puavleej nov suab raaj suab xyu nrov. Yau-am txawm nug has tas, “Tej suab kws nrov dloog dlaj tom nroog tuaj yog dlaabtsi?”

⁴²Thaus kws nwg tseem has lug tsi tau xaus, tug povthawj Anpiyathas tug tub Yaunathaas tuaj txug ndlua. Ces Adauniyas txawm hu has tas, “Koj ca le lug ntawm nuav, koj yeej yog tuabneeg zoo, mas koj yuav coj tej xuv zoo tuaj qha rua kuv paub.”

⁴³Yaunathaas teb has tas, “Tsi yog le koj has ko! Vaajntxwv Daviv tub tsaa Xalumoos ua vaajntxwv lawm.

⁴⁴Nwg tso Xadaus, Nathaas, Npenayas hab nwg cov tubrog kws zuv vaajntxwv coj Xalumoos moog. Puab muab nwg tsaws caij vaajntxwv tug neeg luav,

⁴⁵ces Xadaus hab Nathaas tub muab roj laub rua nwg taubhau tsaa nwg ua vaajntxwv nraag lub qhovdlej Nkihoos lawm. Puab suavdlawg txhaj rov lug rua huv nroog, puab qw ntshu nrooj zoo sab kawg, hab taamsim nuav cov pejxeem taabtom qw muaj kev lomzem heev. Mas yog cov suab kws puastaab koj nov ntawd ntaag.

⁴⁶Nwgnuav Xalumoos tub ua vaajntxwv lawm.

⁴⁷Tsi yog le ntawd xwb, cov numtswv puavleej moog hawm Vaajntxwv Daviv hab has rua nwg tas, ‘Thov koj tug Vaajtswv ua rua Xalumoos lub npe nyob muaj koob muaj meej tshaaj koj, hab thov kuas Xalumoos kev tswjfwm vaammeej tshaaj ntu kws koj tswjfwm.’ Ces Vaajntxwv Daviv txawm nyo ntshis rua sau nwg lub txaaj pehawm

⁴⁸hab thov has tas, ‘Peb ca le ua tug TSWV kws yog cov Yixalayees tug Vaajtswv tsaug, nub nua nwg pub kuv caajceg ib tug lug ua vaajntxwv hloov kuv chaw, hab tseem ca kuv muaj sa nyob tau pum kag ntaag!’ ”

⁴⁹Ces Adauniyas cov qhua ntshai heev, puab txawm ca le sawv tsiv nyag moog nyag tsev taag lawm.

⁵⁰Adauniyas ntshai Xalumoos heev, nwg txhaj tsiv moog rua tom tug TSWV lub Tsevntaub hab tuav ob tug kub sau lub thaaj.

⁵¹Muaj tuabneeg moog has rua Xalumoos has tas Adauniyas ntshai koj kawg le, nwg taabtom moog tuav ob tug kub sau lub thaaj hab has tas, “Nub nua thov kuas Vaajntxwv Xalumoos coglug rua kuv has tas, nwg yuav tsi tua nwg tug tubkhai povtseg.”

⁵²Xalumoos teb has tas, “Yog nwg ua tuabneeg ncaaj nceeg, txawm yog nwg ib txuj nyuas plaubhau los yeej yuav tsi tu le; tabsis yog nwg ua tuabneeg ntxeev sab rua kuv, ces nwg yeej yuav raug tua tuag xwb.”

⁵³Vaajntxwv Xalumoos tso tuabneeg moog coj Adauniyas nqeg sau lub thaaj lug. Adauniyas txhaj lug cuag vaajntxwv hab nyo ntshis hawm nwg, hab Vaajntxwv has rua nwg tas, “Koj ca le moog tsev.”