Read Hmong Njua 1 Vaajntxwv 11 Bible Online

1 Vaajntxwv 11 - Hmong Njua bible

1 Vaajntxwv 11

¹Xalumoos nyam ntau tug quaspuj kws yog tuabneeg txawv tebchaws. Dlua le cov Iziv tug vaajntxwv tug ntxhais lawm, nwg tseem yuav cov Hitis, cov Mau-am, cov Edoos hab cov Xidoos tej ntxhais lug ua quaspuj hab.

²Xalumoos tseem moog yuav cov tuabneeg kws tug TSWV txwv kuas cov Yixalayees tsi xob yuav tej ntxhais lug ua quaspuj, rua qhov puab yuav coj cov Yixalayees moog pe puab tej vaajtswv.

³Xalumoos yuav xyaa pua tug quaspuj kws yog ntxhais vaajntxwv hab peb puas tug kws tsi yog ntxhais vaajntxwv, cov quaspuj ntawd txhaj ua rua nwg tso Vaajtswv tseg,

⁴hab thaus kws nwg laug lawm, nwg cov quaspuj ntawd txhaj coj nwg moog pe cov tuabneeg txawv tebchaws tej vaajtswv. Nwg tsi muab lub sab npuab tug TSWV kws yog nwg tug Vaajtswv le nwg txiv Daviv lawm.

⁵Nwg moog pe cov Xidoos tug vaajtswv Atates, hab moog pe cov Amoos tug vaajtswv Maulej kws phem qas kawg le.

⁶Nwg tau ua txhum rua tug TSWV, hab tsi ua lawv le tug TSWV lub sab nyam le nwg txiv Daviv ua.

⁷Nyob rua sau lub roob huv lub nroog Yeluxalees saab nubtuaj, Xalumoos ua tau ib lub chaw pe cov Mau-am tug vaajtswv Khemaus, hab ib lub chaw pe cov Amoos tug vaajtswv Maulej.

⁸Hab nwg tseem ua ntau lub chaw rua nwg cov quaspuj kws yog tuabneeg txawv tebchaws, tau hlawv xyaab hab hlawv khoom fij rua puab tej vaajtswv.

⁹Tug TSWV kws yog cov Yixalayees tug Vaajtswv, tau lug rua Xalumoos pum ob zag, hab has kuas nwg tsi xob moog pe cov tuabneeg txawv tebchaws tej vaajtswv hlo le. Txawm le ntawd los Xalumoos tsi noog tug TSWV tej lug, nwg tau tso tug TSWV tseg, yog le ntawd, tug TSWV txhaj chim heev rua Xalumoos

¹⁰

¹¹hab has rua Xalumoos has tas, “Vim koj rhuav tej lug kws koj cog tseg nrug kuv lawm, hab koj tsi noog kuv tej lug, kuv has rua koj has tas, kuv yuav muab lub tebchaws tshem tawm ntawm koj moog, hab muab rua koj cov numtswv ib tug kaav.

¹²Tabsis vim kuv tej lug kws kuv tau cog tseg rua koj txiv Daviv lawm, kuv yuav tsi muab tshem tawm thaus koj tseem ua neej nyob, yuav yog tam kws koj tug tub ua tug kaav, kuv maam le tshem.

¹³Hab kuv yuav tsi tshem lub tebchaws kuas taag ntawm nwg moog, vim kuv tau coglug tseg rua kuv tug tubkhai Daviv hab lub nroog Yeluxalees kws yog lub nroog kuv xaiv ca ua kuv tug, kuv yuav tseg ib xeem rua nwg kaav xwb.”

¹⁴Yog le ntawd, tug TSWV txhaj tshoov Hadas kws yog ib tug ntawm cov Edoos tug vaajntxwv tsev tuabneeg sab, kuas ntxeev sab tawmtsaam Xalumoos.

¹⁵Ua ntej ntau xyoo lug lawm, thaus Daviv moog ntaus lub tebchaws Edoos, nwg tug thawj tubrog Yau-am tau moog log cov tuabneeg sis tua tuag. Yau-am hab nwg cov tubrog nyob huv tebchaws Edoos tau rau lub hlis, lub sijhawm ntawd puab muab txhua tug txivneej huv tebchaws Edoos tua tuag taag huv tuabsi lawm,

¹⁶

¹⁷tsuas tshuav Hadas hab nwg txiv cov tubkhai kws yog tuabneeg Edoos leej puav kws tsiv moog rua nraag tebchaws Iziv txhaj dlim xwb. (Thaus ntawd Hadas tseem yog mivnyuas yau).

¹⁸Puab tsiv tawm huv Midias moog rua huv Palaas, txawm muaj qee leej txivneej nyob huv koom nrug puab, ces puab txawm moog rua nraag tebchaws Iziv hab moog cuag Falaus kws yog cov Iziv tug vaajntxwv, nwg txhaj tu lub tebchaws hab muab ib lub tsev rua Hadas nyob hab pub zaub mov rua Hadas noj.

¹⁹Hadas yog Falaus ib tug phoojywg zoo heev, Falaus txhaj muab nwg tug quaspuj kws npe hu ua Tanpenes tug nam hluas rua Hadas yuav ua quaspuj.

²⁰Hadas tug quaspuj yug tau ib tug tub rua Hadas, nwg tis npe hu ua Nkenunpas, nam vaajntxwv Falaus coj tug tub ntawd moog tu huv lub loog, hab nwg yeej nrug vaajntxwv cov tub luj hlub ua ke.

²¹Thaus Hadas tseem nyob nraag tebchaws Iziv, nwg nov xuv has tas, Daviv tuag lawm hab Yau-am kws yog tug thawj tubrog los tuag lawm, Hadas txhaj has rua Falaus has tas, “Thov ca kuv rov qaab moog peg kuv lub tebchaws.”

²²Falaus teb has tas, “Puas yog tseem tshuav tej yaam kws kuv muab tsi txaus rua koj, koj txhaj xaav rov moog peg koj lub tebchaws?” Hadas teb has tas, “Tsi yog, thov ca le tso kuv rov moog xwb.”. Ces nwg txawm rov lug rua peg nwg lub tebchaws lawm. Cov Edoos tug vaajntxwv Hadas, yog cov Yixalayees ib tug yeebncuab kws phem hab nruj tsiv heev.

²³Vaajtswv tseem tshoov Eli-adas tug tub Lexoos sab, kuas ntxeev sab tawmtsaam Xalumoos hab. Lexoos yog tug kws tsiv tawm ntawm nwg tug tswv kws yog cov Xaunpas tug Vaajntxwv Hadadexes,

²⁴hab moog ua ib tug thawj tubsaab kws ua txhum kevcai luj kawg le. (Qhov nuav tshwmsim tom qaab kws Daviv moog tua yeej Hadadexes hab muab cov Xilias kws koom teg nrug nwg tua tuag taag lawm). Ces Lexoos hab nwg cov tuabneeg txhaj tsiv moog nyob peg Damaxes, Lexoos cov tuabneeg txhaj muab Lexoos tsaa ua vaajntxwv kaav tebchaws Xilias.

²⁵Lexoos yog cov Yixalayees ib tug yeebncuab nyob rua Xalumoos tam.

²⁶Muaj dlua ib tug txivneej tig rov tawmtsaam Vaajntxwv Xalumoos. Tug ntawd yog Xalumoos ib tug numtswv ntaag, nwg yog Nenpas tug tub Yelaunpau-aas kws nyob huv lub nroog Xeledas peg lub xeev Efalayees. Yelaunpau-aas nam hu ua Xeluas hab yog ib tug puj ntsuag.

²⁷Qhov kws Yelaunpau-aas ntxeev sab rua Vaajntxwv Xalumoos, vim Xalumoos ua lub Tsev Milus hab khu tug ntsaa yeej kws thaiv nwg txiv Daviv lub nroog.

²⁸Yelaunpau-aas yog ib tug tub hluas kws muaj zug khov kho, thaus Xalumoos pum has tas Yelaunpau-aas yog ib tug kws mob sab ua num heev, Xalumoos txhaj tsaa nwg ua tug saib taagnrho cov tub zug kws nyob huv lub xeev Manaxes hab lub xeev Efalayees.

²⁹Muaj ib nub, thaus Yelaunpau-aas taabtom taug kev nraag Yeluxalees lug, Ahiyas kws yog tug cev Vaajtswv lug huv lub nroog Silaus tuaj ntsib Yelaunpau-aas tom ib tog kev ntawm roob mojsaab.

³⁰Ahiyas hle hlo nwg lub tsho tshab luj lug dlua rhe ua kaum ob dlaim,

³¹hab has rua Yelaunpau-aas tas, “Koj ca le nqaa kaum dlaim moog rua koj, vim tug TSWV kws yog cov Yixalayees tug Vaajtswv has rua koj tas, ‘Kuv yuav muab lub tebchaws tshem tawm ntawm Xalumoos moog, hab kuv yuav muab kaum xeem rua koj kaav.

³²Tsuas pub Xalumoos kaav ib xeem lawm xwb, rua qhov kuv tseem hlub kuv tug tubkhai Daviv hab lub nroog Yeluxalees, lub nroog nuav kuv tau xaiv huv lub tebchaws Yixalayees lug ua kuv tug lawm.

³³Kuv ua le nuav tub yog vim Xalumoos tso kuv tseg hab moog pe cov tuabneeg txawv tebchaws tej vaajtswv: cov Xidoos tug vaajtswv kws yog tug mlom quaspuj Atates; cov Mau-am tug vaajtswv Khemaus, hab cov Amoos tug vaajtswv Maulej. Xalumoos tsi noog kuv lug; Xalumoos tau ua txhum tsi ua lawv le kuv tej kevcai hab kuv tej lug saamfwm le nwg txiv Daviv noog kuv lug hab coj lawv le kuv tej kevcai.

³⁴Tabsis kuv yuav tsi muab lub tebchaws tshem taagnrho ntawm Xalumoos moog, rua qhov kuv tseem yuav ca nwg muaj fwjchim kaav moog kuas taag nwg tam. Kuv ua le nuav tub yog kuv hlub kuv tug tubkhai Daviv, nwg yog tug kws kuv xaiv hab yog tug kws ua lawv le kuv tej kevcai hab tej lug saamfwm.

³⁵Kuv yuav tshem lub tebchaws ntawm Xalumoos tug tub moog, hab kuv yuav muab kaum xeem rua koj,

³⁶tabsis kuv yuav tseg ib xeem rua Xalumoos tug tub kaav, kuv yuav ca kuv tug tubkhai Daviv cov xeebntxwv kaav huv lub nroog Yeluxalees kws yog lub nroog kuv xaiv lug ua qhov chaw rua suavdlawg pehawm kuv.

³⁷Yelaunpau-aas, kuv yuav tsaa koj ua vaajntxwv kaav cov Yixalayees, koj yuav tau kaav taagnrho tej cheebtsaam aav kws koj xaav kaav.

³⁸Yog koj noog kuv tej lug txhua lu, coj koj lub neej lawv le kuv tej kevcai hab ua lawv le kuv tej lug saamfwm kws kuv muab rua koj, ib yaam le kuv tug tubkhai Daviv tau ua lug lawm, kuv yuav nrug nraim koj moog ibtxhis. Kuv yuav tsaa koj ua vaajntxwv kaav cov Yixalayees hab yuav ca koj cov xeebntxwv ua vaajntxwv hloov koj chaw, ib yaam le kuv pub rua Daviv ntaag.

³⁹Vim Xalumoos tej kev txhum, kuv txhaj yuav rau txim rua Daviv cov xeebntxwv, tabsis tsi yog rau txim moog ibtxhis.’ ”

⁴⁰Yog le ntawd, Xalumoos txhaj pheej nrhav Yelaunpau-aas tua povtseg; tabsis nwg tsiv moog cuag cov Iziv tug vaajntxwv Sisas hab moog nyob nraag txug nub kws Xalumoos tuag.

⁴¹Dlua le lwm yaam kws Xalumoos ua, tsi has nwg teg num lossis nwg lub tswvyim kev txawj ntse, puavleej muab sau ca rua huv phoo ntawv kws teev Xalumoos lub neej lawm.

⁴²Xalumoos ua vaajntxwv nyob huv Yeluxalees hab kaav lub tebchaws Yixalayees tau plaub caug xyoo.

⁴³Xalumoos tuag luas coj nwg moog log rua huv Daviv lub nroog, hab nwg tug tub Lehaunpau-aas ua vaajntxwv hloov nwg chaw.