Read Hmong Njua 1 Vaajntxwv 12 Bible Online

1 Vaajntxwv 12 - Hmong Njua bible

1 Vaajntxwv 12

¹Lehaunpau-aas moog rua huv Sekhees, qhov chaw kws cov Yixalayees nyob saab Qaumteb tuaj txoos ua ke tsaa nwg ua vaajntxwv.

²Thaus Nenpas tug tub Yelaunpau-aas kws tsiv Vaajntxwv Xalumoos moog nkaum rua nraag tebchaws Iziv lawm, nov xuv txug zaaj nuav, nwg txhaj le rov nraag tebchaws Iziv lug.

³Taagnrho cov Xeem kws nyob saab Qaumteb tso tuabneeg moog hu Yelaunpau-aas tuaj, ces puab suavdlawg txawm ua ke moog cuag Lehaunpau-aas hab has rua nwg tas,

⁴“Koj txiv Xalumoos ua nruj ua tsiv hab muab tej num nyaav heev rua peb ua. Yog koj txu kuas peb tau ua num sib, hab pub peb muaj kev kaaj sab, peb yuav txaus sab ua koj pejxeem moog le.”

⁵Lehaunpau-aas teb has tas, “Peb nub sau nuav mej rov tuaj cuag kuv, kuv maam le teb mej.” Yog le ntawd, puab txawm rov qaab moog tsev lawm.

⁶Vaajntxwv Lehaunpau-aas moog nrug cov laug kws ibtxwm yog nwg txiv Xalumoos cov tuavxaam saablaaj. Nwg nug puab has tas, “Mej yuav paab tswvyim rua kuv rov moog teb cov pejxeem le caag?”

⁷Puab teb has tas, “Yog koj xaav kuas cov pejxeem poog koj, mas koj yuav tau teb kuas lawv le puab sab nyam, puab txhaj yuav ua koj cov pejxeem hab muab sab npuab koj moog le.”

⁸Tabsis Lehaunpau-aas tsi yuav tej lug kws cov laug ntawd qha, nwg txawm moog nrug cov tuavxaam hluas kws nrug nwg ib phaum saablaaj.

⁹Nwg nug puab has tas, “Mej paab kuv tuav tswvyim saib yuav teb le caag rua cov pejxeem kws tuaj thov kuv has tas, ‘Thov koj muab tej num nyaav kws koj txiv muab rua peb ua txu kuas sib mivntsiv?’ ”

¹⁰Puab teb has tas, “Koj teb rua puab le nuav: ‘Kuv tug rwg teg tseem luj dlua kuv txiv lub dluav!’

¹¹Mej has tas, ‘Tej num kws kuv txiv muab rua mej ua nyaav heev; mas kuv tseem yuav muab tej num kws nyaav tshaaj ntawd rua mej ua hab. Nwg muab hlua tsaaj nplawm mej xwb; kuv yuav muab hlua tawv nplawm mej.’ ”

¹²Peb nub tom qaab Yelaunpau-aas hab cov pejxeem rov tuaj cuag Vaajntxwv Lehaunpau-aas, lawv le nwg has rua puab lawm.

¹³Vaajntxwv tsi yuav tej lug kws cov laug qha, nwg txhaj le has lug nyaav rua cov pejxeem,

¹⁴lawv le cov tuavxaam hluas qha. Nwg has tas, “Tej num kws kuv txiv muab rua mej ua nyaav heev; tabsis kuv tseem yuav muab tej num kws nyaav tshaaj ntawd rua mej ua hab. Kuv txiv muab hlua tsaaj nplawm mej xwb, tabsis kuv yuav muab hlua tawv nplawm mej.”

¹⁵Qhov kws Vaajntxwv tsi noog cov pejxeem lug ntawd, tub yog ua kuas tav lawv le tej lug kws tug TSWV kuas Ahiyas kws yog tug cev Vaajtswv lug kws nyob huv lub nroog Silaus moog has rua Nenpas tug tub Yelaunpau-aas ntaag.

¹⁶Thaus cov pejxeem pum has tas, vaajntxwv tsi noog puab tej lug lawm, puab txhaj qw has tas, “Muaj qaabhau dlaabtsi moog nrug Daviv hab nwg tsev nyuas tuabneeg ntawd ua ke! Puab tub tsi tau ua ib yaam dlaabtsi paab peb le los sav? Cov Yixalayees, ca le rov qaab moog tsev los mas! Ca Lehaunpau-aas, rov kaav nwg xwb txhaj zoo!” Yog le ntawd, cov Yixalayees txhaj ntxeev sab,

¹⁷ca Lehaunpau-aas ua vaajntxwv kaav cov tuabneeg kws nyob huv lub xeev Yudas xwb.

¹⁸Ces Vaajntxwv Lehaunpau-aas txhaj tso Adaunilaas tug kws saib cov tub zug moog cuag cov Yixalayees, tabsis puab muab pobzeb ntaus nwg tuag lawm. Thaus muaj tej nuav lawm, Lehaunpau-aas txhaj dlha ceev nrooj moog nce nwg lub tsheb neeg hab rov qaab moog rua nraag lub nroog Yeluxalees lawm.

¹⁹Txij nub ntawd lug, cov Yixalayees kws nyob saab Qaumteb txhaj ntxeev sab rua Daviv cov xeebntxwv lug le lawm.

²⁰Thaus cov Yixalayees nov has tas, Yelaunpau-aas rov nraag tebchaws Iziv lug lawm, puab txhaj caw nwg tuaj nrug puab saablaaj, hab puab muab nwg tsaa ua cov Yixalayees tug vaajntxwv. Tsuas yog tshuav cov Yudas tuab xeem txhaj tseem muab sab npuab Daviv cov xeebntxwv xwb.

²¹Thaus Lehaunpau-aas lug txug rua huv nroog Yeluxalees, nwg txhaj txhij tau ib puas yim caum txheeb leej tubrog kws sab tawv heev huv xeem Yudas hab xeem Npeenyamees. Nwg yuam kuas puab moog tua cov Yixalayees saab qaumteb hab txeeb kuas tau lub tebchaws rov lug rua nwg kaav.

²²Tabsis Vaajtswv has rua Semayas kws yog tug cev Vaajtswv lug

²³kuas coj tej lug nuav moog has rua Lehaunpau-aas hab taagnrho cov tuabneeg kws yog xeem Yudas hab Npeenyamees has tas,

²⁴“Mej tsi xob moog tua mej cov kwvtij kws yog cov Yixalayees hlo le. Mej suavdlawg ca le rov qaab moog tsev. Yeej yog kuv pum zoo txhaj muaj tej xwm nuav tshwmsim tuaj.” Puab noog tug TSWV tej lug hab puab nyag txawm rov moog nyag tsev lawm.

²⁵Cov Yixalayees tug vaajntxwv Yelaunpau-aas moog txhim ntsaa yeej thaiv lub nroog Sekhees kws nyob peg laaj roob Efalayees hab nwg nyob peg tau ib ntus. Ces nwg muab lub nroog ntawd tso tseg hab moog khu lub nroog Penu-ees.

²⁶Nwg xaav has tas, “Yog kuv cov pejxeem pheej moog tua tsaj fij rua tug TSWV nyob nraag lub Tuamtsev huv nroog Yeluxalees, nyob tsaam puab yuav ca le muab sab npuab cov Yudas tug Vaajntxwv Lehaunpau-aas, ces puab yuav muab kuv tua povtseg.”

²⁸Tom qaab kws nwg xaav tau le ntawd lawm, nwg txawm muab kub nchuav tau ob tug mlom nyuj hab has rua cov pejxeem has tas, “Mej pheej moog pehawm Vaajtswv nraag lub nroog Yeluxalees tau ntev lug lawm, cov Yixalayees, mej saib saib, ob tug mlom nuav yog mej ob tug vaajtswv kws coj mej tsiv nraag tebchaws Iziv lug ntaag!”

²⁹Nwg coj ob tug mlom nyuj ntawd ib tug moog teeb rua huv lub nroog Npethees, ib tug moog teeb rua huv lub nroog Daas.

³⁰Yog le ntawd, cov pejxeem txhaj ua txhum taag, puab moog pe ob tug mlom ntawd huv lub nroog Npethees hab huv lub nroog Daas.

³¹Yelaunpau-aas tseem moog ua tej tsev teev mlom rua sau tej ncov roob hab tsaa tej tuabneeg kws tsi yog xeem Levis ua povthawj.

³²Yelaunpau-aas teem sijhawm rua lub yim hli nub kaum tsib, ca ua nub ua kevcai rooj noj rooj haus ib yaam le ua nraag tebchaws Yudas. Nwg muab tsaj tua hlawv rua sau lub thaaj txi tug mlom nyuj kws nwg teeb rua huv lub nroog Npethees. Hab nwg tsaa ib cov povthawj tu lub chaw teev mlom kws nwg ua rua huv lub nroog Npethees ntawd.

³³Thaus txug lub yim hli nub kaum tsib, yog nub kws nwg teem tseg, nwg txawm moog peg lub nroog Npethees hab tua tsaj txi tug mlom ntawd sau lub thaaj ua kevcai lawv le nwg tau teem tseg rua cov Yixalayees lawm.